3
Ént mek énér i konámp Jono farákápnámp kar
1 Taiberius 15 yopwar fek Sisar yak nánko, Pontius Pailat Judia distrik mek Gavman Tokwae yak. Am ke fek te Herot distrik Galili poukeyakánko, maomp naenáp Filip distrik Ituria, Trakonitis poukeyak, tá Lisanias distrik Abilene poukeyakámpono. 2 Táte Anas ntia Kaiafas pris taokeyakep arop yak. Aeapo maok, am ke fek Jon Sekaraiamp táráp arop yak mo apár mek akwapá yak nánko, Kwaro náráp kar man sánk. 3 Aenánko maok, Jon ént Jordan mekamp apár mek am mwaek yárakrá koumteouráp aropan ‘Yumo te yiráp kwatae nɨnɨk pwarará ént mek nér napo, Kwaro yiráp kwatae nɨnɨk tirá épérano’ ria kar farákáp. ✡Ap 13:24; 19:4 4 Profet Aisaia kumwinámp buk fek am kar yak námp te ará:
“Arop yak mo apár meknámp arop ankárankao wumwirá,
‘Kwar Tokwae korop naenámp mwae nánapria
fwapokwapenke.
5 Apár wi yakápnámp tokoprá,
faonkwe furuk popomprá,
kápae kare mwae kup korokorenámp ékékérrá
yumwia waenámp tirá épéria fwapi pwarenke.
6 Aeria maok, Kwaro nomwan érékép naeria tére námp ponankor arop fwap nke mwanapon.’ ” ✡Ais 40:3-5
7 Aeránko maok, kápae kare koumteouráp arop, Jono ént mek nérrá kákanoria korop napo maok, mao sérrá, “Yumo fou-tákam niamp aropono! Yumo yiráp kwatae nɨnɨk taki fákeyakápria ént mek néria napo, Kwaro yumwan yopor mo naenámpria nape? 8 Yumo yae-párák kare paokop nap fek kwatae nɨnɨk younkwe mwaek sɨrarrá Kwaronámpok korop nap érik yénképano. Tá yumoku kok sérarrá, ‘Yino Abrahamomp ou fekamp tárápu ara, yinan Kwar te yopor mo, fwap naenámpan mpwe’ kwapono. Aerá sénapan ono yumwan sérrá: Kwar yumwan wampwe kwaeri pwarará, fwap mámá yumwi kápae karean Abrahamomp tárápu arárria kák naenámpono. ✡Ap 26:20; Jo 8:39 9 Ankomwar wae yao karámp naenámp nánapi yak námpono. Yao ponankor kwapwe kare ki tank mo i konámp te, kar-tokopea yaomwi mek épér mwanapono.” ✡Mt 7:15-20
10 Aerá séránko maok, arop ponankor man turunkrá, “Ae te yino mokop mwanámpono?” 11 Aerapo maok, nopok Jono am fárákapan sérrá, “Arop siot anánkaopwe námp kwamp te, arop ankwapao mo nánko te ankwap man sánkano. Táte arop ankwapao fɨr mo nánko, yumo fɨr tank nánko te man sánk kipo.”
12 Takis sámp konap arop ankwap fárákapao kuri ént mek nér mwaria koropea maok, Jonén sérrá, “Tisa, yino te mokop mwanámpono?” ✡Lu 7:29 13 Tá Jono am fárákapan nopok sérrá, “Yumo takis mani sámp mwaria te, ankár gavmano sérinámp kare fek saráp sámp kipo. Yumo yiráp nɨnɨk fek am kámákarrá sámp kwapono.”
14 Soldia ankwap fákárerao kor man turunkrá, “Yino te apae mokop mwanámpon?” Jono nopok am fárákapan sérrá, “Yumo aropan fupukrá maomp yaekamp mani pouroukoupria, aropan kwekárrá koti kwapon. Yumoku yiráp tére fekamp mani sámp nap te, wae támaonoria warákár kipo.”
15 Aeránko maok, koumteouráp aropao maomp yonkwae kour kwapwe nkea maok, nɨnɨk tokwaeria sérrá, “Jon máte Krais támaoi kane?” 16 Aerapo maok, Jono wawia nopok kar pwarokwaprá sérrá, “Ono yumwan ént kar fek ént mek nérrá kák nampono. Nánkár wakmwaek arop ankwap korop námpao maok, maomp kárákáre te onomp kárákáreran kámákár akwap námpono. Ono te apárok kánanke kare nampara, maomp pukamp su fekamp paok aokorop nanamp pwi mo nampono. Mao te yumwan Yiki Kor Spirit ntiaka yaomwi fek nérrá kák naenámpono. ✡Jo 3:28; Ap 1:5; 13:25 17 Mao námokuráp sabol yaek sayakrá, wit yorokwaerá narek épérrá tɨri poporokomprá, wit kare wit koupoukour konap nap mek kákea pwarará, tɨri te ankár torokwar mo i konámp yaomwi mek yank naenámpon.”
18 Jon kápae kare karan kor koumteouráp arop méranáponoria farákápria maok, Kwaromp Kwapwe Kare Kar farákápámpon.
Jono Herotomp kwatae nɨnɨk érik sérimp kar
19 Aeria maok, táte Jono arop poukeyak konámp arop tokwae Herotén yoporimp te maomp nánaeramp yupu Herodias námoku sámpea yakria maok, ankwap kápae kare kwatae nɨnɨk nánko, man yopori námpono. ✡Mt 3:11-12; Mk 1:7-8; Jo 1:24-34 20 Táte Herot kwatae nɨnɨk ankwap yumuntuk pap námp te, Jonén kalabus mek pap námp aránon. ✡Mt 14:3-4; Mk 6:17-18
Jono Jisasén ént mek anámpá papámp kar
21 Heroto Jonén oukoumwan fákapá pap monámp fek, koumteouráp arop Jon ént mek nérrá kákámp fek Jisaso kor koropea ént mek anámp. Ént mek anámpea pwatea, Kwarén kar toropwaprá yak nánko maok, yámar me fákárámp akwap. 22 Aenánko maok, am meknámp Yiki Kor Spirit ék. Aropao am nke napo maok, ant yuriamp pourou niampao Jisasomp pourouk éká tank. Aenánko maok, yámar meknámp arop kar niamp wumwiria sérrá, “Amo te onokump tárápono. Amo kwapwe kare nap te, ono amwan warákár tokwaeria yonkwae kárámp nampono.” ✡Mt 17:5; Lu 9:35; Jo 1:32-34
Jisasomp appeyaenáp fákáreramp e
Matyu 1:1-17
23 Jisaso wae 30 yopwaria tére naerianánko maok, koumteouráp aropamp nɨnɨk te, mao te Josepomp tárápan mpweapon:
Josep am te Helimp táráp.
24 Heli te Matatomp táráp.
Matat te Livaimp táráp.
Livai te Melkimp táráp.
Melki te Janaimp táráp.
Janai te Josepomp táráp.
25 Josep te Matatiasomp táráp.
Matatias te Amosomp táráp.
Amos te Nahumomp táráp.
Nahum te Eslimp táráp.
Esli te Nagaimp táráp.
26 Nagai te Matomp táráp.
Mat te Matatiasomp táráp.
Matatias te Semenomp táráp.
Semen te Josekomp táráp.
Josek te Jodamp táráp.
27 Joda te Joananomp táráp.
Joanan te Resamp táráp.
Resa te Serubabelomp táráp.
Serubabel te Sialtielomp táráp.
Sialtiel te Nerimp táráp.
28 Neri te Melkimp táráp.
Melki te Adimp táráp.
Adi te Kosamomp táráp.
Kosam te Elmadamomp táráp.
Elmadam te Éromp táráp.
29 Ér te Josuamp táráp.
Josua te Elieseromp táráp.
Elieser te Jorimomp táráp.
Jorim te Matatomp táráp.
Matat te Livaimp táráp.
30 Livai te Simeonomp táráp.
Simeon te Judamp táráp.
Juda te Josepomp táráp.
Josep te Jonamomp táráp.
Jonam te Eliakimomp táráp.
31 Eliakim te Meleamp táráp.
Melea te Menamp táráp.
Mena te Matatamp táráp.
Matata te Natanomp táráp.
Natan te Devitomp táráp.
32 Devit te Jesimp táráp.
Jesi te Obetomp táráp.
Obet te Boasomp táráp.
Boas te Salmonomp táráp.
Salmon te Nasonomp táráp.
33 Nason te Aminadapomp táráp.
Aminadap te Atminomp táráp.
Atmin te Arnimp táráp.
Arni te Hesronomp táráp.
Hesron te Peresomp táráp.
Peres te Judamp táráp.
34 Juda te Jekopomp táráp.
Jekop te Aisakomp táráp.
Aisak te Abrahamomp táráp.
Abraham te Teramp táráp.
Tera te Nahoromp táráp.
35 Nahor te Serukomp táráp.
Seruk te Reump táráp.
Reu te Pelekomp táráp.
Pelek te Eberomp táráp.
Eber te Selamp táráp.
36 Sela te Kainanomp táráp.
Kainan te Arpaksatomp táráp.
Arpaksat te Siemomp táráp.
Siem te Noamp táráp.
Noa te Lamekomp táráp.
37 Lamek te Metuselamp táráp.
Metusela te Inokomp táráp.
Inok te Jaretomp táráp.
Jaret te Mahalalelomp táráp.
Mahalalel te Kainanomp táráp.
38 Kainan te Enosomp táráp.
Enos te Setomp táráp.
Set te Adamomp táráp.
Adam te Kwaromp táráp.