Hibru
Mata ngo woi Hibru nanoha irim toctocyi
Yongburoc mata: Oro bapiya ngo numaho sinom irim togocma wo wömai non tuctugo makombimon. Kombic kombic amna auho wömai kombingidang, Polho togoc. Oro, bapiya ngo wömai Yuda nano au Duicha kombing tobing imongidung-ma ‘yuha’ yongo irim toctocyi. Imanang amna auho wömai torop wo mepmo imu-ya kombing tobic tobicno sing kauna yu wo imu fatfatha kombigung. Worocha tongga amna bapiya ngo irim togocma yu ‘torop worochon kombing tobic tobicno tong koing towa’ yongo Duicho ‘nontha’ yongo youp inobarac sinom togocma worochon foro inong tuctuc togoc. Au wömai ingoroc: Duicho yong tuctuc amna osuc idungmahu o sum yaruhu o amna moröma Mösehu yu ambarac yanggiratno sinom tac. O au wömai ingoroc: Duic yu öret socsoc amna noni sinom. Mösehon yong moröng kiap worocho wömai yapmu boinno momdec itacma worochon dogunogon. Yong moröng kiap boinno wömai Yesuho tun öngkuboc.
Oro mata moröma au wömai kombing tobic tobicha yac. Sapta 11dec wömai non owi amna moröma osuc idungma yuhon kombing tobic tobicno orongi sinom aamon. Nonu worocha kombingmanaina worochon torocgon itongitnahamon.
1
Kopotorocho matano Mananohon dugodecma ninogoc
1 Oro osuc wömai Kopotorocho yongburoc matano inoin yong tuctuc amnanihon ducdecma ombu sakungnoni inongidoc. Woi bongono bongono orin toroc kiap ihono ihonodec inongidoc. 2 Wo-hong önga, guroc ngorochon bödec bödecno urop eng fomtacan, bongono ngocin wömai Kopotorocho yongburoc matano inoin Mananohon ducdec ninogoc. Manano wömai Kopotorocho ‘manomano ambarachon Morömo engoc’ yongo soworegoc. O Mananoho oburodecgon wömai Kopotorocho mom saguroc ambarac dongyun öngkubung. 3 Oro Manano yu woi Kopotorochon yaguno mitimobaracnodec worochon toroc itac. O yu wömai Kopotorochon idit orin toroc kiapmo nindauna nonu yudec agomon. O Mananohon matano woi inoyabitno gesöbarac sinom itmuna mom sa guroc manomano ambarac imongtoc tong imuna worocho youpno angitgon tongidang. O Mananoho ep goröcdec wömuno noni dongyun bödegocmaha tongga nonu sacsago idamon. Ihoroc tongo yu öngga Kopotorochon obu arocne wocin abamo sogitmuna iditac. O Kopotoroc yu woi manomano ambarachon öngitno sinom itac.
Kopotorochon Manano yu sum yaru yanggiratdup tac
4 Worocha tongga Nandöng Kopotoroc yu Manano ma morö sinom imuna yuho sum yaru idangma wo ambarac yanggiratno sinom tac. 5 Foro wömai ingoroc: Osuc Kopotorocho Yesu mata ingoroc inogoc:
“Goc nachain Manana sinom. Önga nocho gochon Nandönga öngkupat.” (Buk Song 2:7)
Oro, mata ihorocno wömai yu sum yaru auha mainogoc. Muno, Mananohagon wömai inogoc. O mata au ingoroc:
“Noc naka wömai yuhon fano engot. O yuho wömai nochon Manana engoc.” (2 Samuel 7:14)
6 Oro Kopotorocho Manano borongoma guroc ngocin siuna ebocan, bongono wocin wömai yu ingoroc yogoc:
“Kopotorochon sum yaruni ambaracho yuha yong moröng imarut.” (Lo 32:43)
7 Worochoi oro sum yaruniha wömai Kopotorocho mata ingoroc yogoc:
“Kopotorochon sum yaruni yui youp wabkaracni. Yui sum koingohu o ep aranggum simbang ihorocno idang.” (Buk Song 104:4)
8 Wohong Mananoha wömai mata au ingoroc irim toctocyi itac:
“Kopotoroc, gakain mom toboruca woi iditnoho iditno engoc. O gocu owi amnayai nongnongo kiapdecgon yangtoreangoroc. 9 O gocu nongnongo idit kiapha toup kombingitaroc mahong wömuno toctoc kiapha ayam tong imongitaroc. Worocha Kopotoroc, gakain Kopotorocaho ‘nucaihon morömano iti’ yongo gangsoworengga irot ogep moröma sinom gamogoc.” (Buk Song 45:6, 7)
10 Oro Mananoha wömai Kopotorocho wönggon mata au ingoroc inogoc:
“Moröma, osuc sinom gocu guroc ngorochon forodongno ito gaboroc. O gakain oburaho wömai mom tobingo onoce sigoroc. 11 Mom orin guroc yu bisong ongontahamoroc mahong gakai iditnoho iditno idtongungoroc. Mom orin guroc yu woi tec osucno simbang genggeng yongga youpno muno idtahamoroc. 12 Woi amnaho auyai abam yoroc moin tuna fongyu ongidangma worochon toroc wömai gocho mom orin guroc fongyi ongonahing. Woi amnaho tec tohomumöc-no mongurac tong idangma worochon toroc gocho mom orin guroc mongurac tangoroc. Wohong gocu wömai mongurac matongitaroc. Muno, gakai bödec bödeca muno, gocu iditnoho idtongungoroc.” (Buk Song 102:25-27)
13 Oro sum yaru auha wömai Kopotorocho mata ingoroc mainogoc:
“Goc nochon obu arocne idiya ongga nocho gakain ayamai gaka unenne fohong yuangot.” (Buk Song 110:1)
14 Oro, sum yaru yu woi sum simbang itmuya Kopotorochon mongorec youp tong idang. Tuna Kopotorocho yu inong muuna ongga owi amna inoha soworec soworecyi yu tongfat yengidang.