1 4 Nau sessaiaane king ang ghe ruula, eghe tokala me eghe mene annaala saa llo Kuin Vasti eghe gheleila etana, me tee eghe mene annaa va liuna avalua o me eghe ghaa vella ninamuu ngateva ta Vasti. 2 Vara me kasina tani lo atoa taumattu laghe uungu ekalakalanginaaili me laghe kaakarangaaili ta king laghe auliaala kateva ninannaa va, “Urooroo tani pae toa aliki vause masinaaili taataraira me karika laghe kila taita. 3 Me usui righi taita tale isaa o provinsi uaaitaraa me la ghaa mae ila o aliki vause atoa masi taataraa ila isaa o eSusa, nongina uneita gavmani eteva etokatoka. Nau ila mae rekata, ulaa ghatokaila tale ale ateva uatoka vause akapa atoa etana. Uatokaila ta nimane Hegai, ia kaakati ia, kapuna ia king, me uunguaane tani aitaraa vause atoa. Me ila o vause atoa nau la nim toka, la toka mangimangi ila tale oeli me la amolumolu vilikiira tale asease voto tani gheleila me taataraaira emene masina tau lao. 4 Me nau utara teva va ualoannaia, urooroo tani ghaaia me ugheleia ekoliaa Kuin Vasti.” Nau king ghe nongola eghe masimasiaala ia o inangari etoa, liuna avalua o me eghe aimuli usi teeia.

5 Me elome tale ia o masaliki taatara ateae eSusa, kateva taumattu aJiu ia tee ghe tokatoka, ararina ateae ta Mordekai, tamana ta Jair. Jair tuvuna ta Simei, natuna ia Kis, ararimangalina Benjamin. 6 Nebukanesa kingi ia eBabilon, ghe ghaala taumattu nge Jerusalem nau ang ghe lao sio, me tee Jehoiakin, kingi nge Jiuda, laghe kuneilala me laghe sioainilala eBabilon. 7 Hadasa nengane tallae ia Mordekai, mene kateae ararina Hadasa ta Esta. Mordekai ghe aaitarainiela me ghe namuula poli karika tamane me kinna ia o aliki vause ateva. Esta masi aliki vause ateva, me masinaaili taataraane. Mordekai ghe ghaaiela me ghe natuna vause tuungiela nau kinna me tamane lalu ghe matela.

8 Nau King Serksis ghe alokoila kinatama inangari ateva tale ila akapa ta provinsi etoa va oroi ila aliki vause la tau mae tale ale aliki vause, me aue ila toka ta aitaraane Hegai. Me Esta ghe lao sio nongina masalikina ateae king me Hegai ghe aaitarainia. Hegai ghe aaitaraa tee ale ateva vausena atoa king laghe tokatoka etana. 9 Hegai ghe masiaala Esta nau ghe taraiela me nannaane ghe tokala ta Esta, me gharavaengaili ghe tau lao sio voto tani ghelei vilikina me taataraane emasinaaili, me tee masi inana me lo atiulu rum masinaaili ia tale mene kasina rum tale ia o ale ateva vause atoa laghe tokatoka etana. Hegai ghe suimatoongala ghaitu (7) masi aliki vause laghe tokatoka tale masalikina ateae king tani aitaraa Esta.

10 Esta karika ghe aulia ngaotula va ia aliaa ia, me eaa ghe kasula me see ila kapuna atoa, poli Mordekai ghe paoala. 11 Mordekai nau ekapa ghe laalateaa nonga nongina vause atoa laghe tokatoka valavala ateae ghe taatalieinia tani tara sa ateva elutu ta Esta.

12 Erooroo kateae ninamanama laghe aitaraala aliki vause atoa tani ghelei vilikiira emasinaaili. Ghaonomo (6) ulana laghe mangila mangila tale oeli eteva laghe gheleiela tale murr. Me mene ghaonomo ulana laghe mangimangi teela oeli masinaaili ngusungusuaane. 13 Me emulina, nau vause ateva eanna tani lao tanganue king, easae ghinna ta aloannaane tani ghelei taataraane emasinaaili, me ghe kasukasu vuli tanganue vause atoa me ghe laolao tanganue king. 14 Elo alai elao tanganue king, me elue talaua la mene laoainia tale aiaghaluena ateva aleira vause atoa. Ia o voto ateva Sasgas ghe aaitara lo atoa vause karika vausena tuungi ila king me karika laghe kiikiriaa lao ta king. Arova king ghe masimasieinia ghe kolokolo ararina me ghe laolao.

15 Nauna Esta (vause ateva Mordekai ghe aitarainiela, vause ateva natuna ia aloane ta Abiail) tani lao ta king. Karika ghe mene annala righi ghinna ta llo nonga Hegai ghe uela va easae. Me Esta ghe ghaala aloannaaira akapa taumattu ngatoa laghe tariela. 16 Liuna avalua o Esta laghe ghaaie lao sio tanganuena King Serkis. Ia o ninamanama ateae, aiaaghaituna ia (7) ta king Serksis tani kingi, me elome ta kasangaulu ulana ateva ta Tebet laghe laoaa sio Esta.

17 Me king ghe saiila Esta me ghe annaailiiela tale mene kasina tana vause, me tee ghe gheleila aloannaane king ghe namungailiila ta ngetana tale mene kasina vause karika ghe kila taita. Liuna avalua o ghe atoka saela kou nguru eteva unna ia kuin ta uruna me ghe gheleila ghe ghaala liuna ateva Kuin Vasti. 18 Me king ghe gheleila kinatama ninamanama ateae tani oneoneaa Esta, ghe kolo akapala namu ngakapa atoa tau ngai toitoi ila ta gavman. Ghe auliaala va ila akapa provinsi etoa laghe ainoannala tale ia o nau eteva me king ghe nim tau lao sio masi voto atoa ta taumattu ngatoa.

19 Nau eteva vause atoa karika laghe kila taita laghe mene velu eitauaala aiaaghaluene, king ghe gheleila Mordekai eghe namuula tale paa ngalena ateva. 20 Me Mordekai ghe aulia ngalokoila arau ta Esta va erou mene aotu va aliaa ia me eaa ghe kasula. Liuna avalua o me Esta eghe aimuli usi teela isaa o inangari, nongina ghe gheelei arau nau aliki ia.

21 Nau Mordekai ang ghe ghaala niuungu ta King Serksis, ghalua taumattu lalu ghe sessailalua ta king, me ilalu ghe aloanna tani uvi emate king. Arariirarua ta Biktana me Teres. Ilalua oia taumattu ngalua lalu ghe aitoiaa atamana ateae king. 22 Kateva nau Mordekai eghe nongo saopilaluela ta lalu ghe loeloe aisulia vaalua tani uvi emate king, me ghe lao sio tani aotu kiena Kuin Esta. Me Kuin Esta ghe auliaala ta king me ghe uela ta king va Mordekai ia ghe auliaala. 23 Nau eteva king ghe kilela va koronna ia inangari eteva, eghe uela va la avukalailalue sae tale ai me la nau ematelalua. Me laghe piti elokoi siola tale vuku eteva la pitipiti kiukiuna king.