3
Aitiutiu tale ssavoto
1 Katu ngateva muennaaili ia tale mene kasina ghaata kkena karika ita ghaitaraa Vau ngepona Iaue ghe gheleila. Ghe uela ta vause ateva va, “Sa ateva God ghe tani aulieiniela? Karika amalu mene nama righi ue ngai tale ai etoa elome tale utana atingiu?”
2 Vause ateva ghe liula me ghe uela ta katu ngateva va, “Angalu rooroo tani nama ue ngai tale ai etoa tale utana atingiu, 3 me God ghe uela va karika nonga angalu rooroo tani nama ue ngai tale ai eteae etiitingina elome polaki tale utana atingiu, me angalu rau mene tuli teeia, arova angalu ghelei evaluela o, aue angalu mate.”
4 Me katu ngateva ghe uela ta vause ateva va, “Karika poi aue amalu mate! 5 Poli God ekilakila va nau eteva amalu namaia, nannaaimalua aue eoti, me aue amalu nongina God, amalu kila masina me sesa.”
6 Nau eteva vause ateva ghe tarala va ue ngai tale ai eteae masina tani nama, me masinaaili taataraane, me tee tani ghaa alomasaanga ta ngetana, ghe parikila kasina me ghe namala. Ghe tau teela kasina ta taitanna ateva, ghe tiitingina teeia, me ghe namala. 7 Nannaairarua akapa ghe otila, me lalu ghe tara kilala va karika lalu ghe aaitiitii. Liuna avalua o me lalu ghe sui eitauaala uru ngai, me lalu ghe gheleila uneirarua aiaaitiitii.
8 Vara me taita ateva me vausenna ateva lalu ghe nongola Vau ngepona Iaue ghe kasukasu elome tale utana atingiu, pai ngelo alai etivilau, me lalu ghe aisuliaala ta Vau ngepona Iaue, elome tale ai etoa. 9 Vara me Vau ngepona Iaue ghe kolokoloaala taita ateva, ghe uela va, “Ea io?”
10 Taita ateva ghe liula me ghe uela va, “Anongoola ukasukasu tapaa ngutana, me amatautula, poli karika aghaaitiitii, liuna avalua o me aghaisuliaala.”
11 Me Vau ngepona Iaue ghe uela va, “See euela etam va utam aitiitii? Ngamalu namala ue ngai tale ai eteae aghe aulia ngasarasarakanala va amalu rau mene namaia?”
12 Taita ateva ghe uela va, “Ta vause ateva ughe taue mae sio etaghi, etau mae sio kasina ue ngai tale ia o ai eteae, me anamala.”
13 Vara me Vau ngepona Iaue ghe uela ta vause ateva va, “Sa ateva angu gheleiela?”
Vause ateva ghe liula me ghe uela va, “Katu ngateva ekameaghila, me anamala.”
14 Liuna avalua o me Vau ngepona Iaue ghe uela ta katu ngateva va, “Poli ugheleila isaa oia voto,
“Nikasikiena namuu etam
tale mene kasina ghaata kkena ita ghaaitara
me llo ita tam aaitara!
Aue urraa ta vusu kovam ateva
me aue unama kosa
nau ekapaaili tale maamauluaam.
15 Aue aghatoka niaisessai
elome etam me vause ateva,
me elome ta natum atoa me natuna atoa;
ia aue easa putuputu urum ateva,
me io aue ukata kunikuni kkena ateva.”
16 Me ta vause ateva God ghe uela va,
“Aue aghelei enamungaili me oroieili nimmarikana nau umolena,
me tale nimmarikana aue umolena aliki.
Aloaloannaam aue enamungaili ta taitanim ateva,
me karika, ta taitanim ateva aue emuemueinio.”
17 Me ta Adam ghe uela va, “Poli unongo usilaala vausenim ateva, me unamala ue ngai tale ai eteae aghe aulia ngakorokoronganala etam va karika poi va umene namaia,
“Nikasikiena ange tokala tale kosa ateva poli mausim;
Aue ummarikana tani uungu me aue unama voto etana
nau ekapa atoa tale maamauluaam.
18 Kosa ateva aue eapinosa asease oasa atoa rorroanna ila nongina aue ughuungu,
me aue unim nama asease inana enim piipinosa see.
19 Me tale mmautum,
aue unama anem inana
lomosina ta aue uoghi sio tale kosa ateva,
ta aghe ghaaiola tale kosa ateva,
ta io kosa io,
me tale kosa ateva umene oghi sio.”
20 Adam ghe asela vausenna ateva ta Ivi* Tale inangari nge Hibru, Ivi, malloeana va “maulue”. poli ia aue ekinaira ia taumattu ngakapa atoa.
21 Vau ngepona Iaue ghe gheleila aiaaitiitiirarua tale viliki ghaata kkena, me ghe aitiitiilaluela. 22 Me ghe uela va, “Taumattu ngateva ange kilala voto masina me sesa, me ange nonginala ita. Ita rau mene tau velua va emene laa pariki ue ngai tale ai maulue ateae va enamaia me etoka laalaa liu.” 23 Liuna avalua o me ghe tiu veluela tale utana atingiu eIden, me elaa uungu tale kosa ateva laghe ghaaiela etana. 24 Nau Vau ngepona Iaue ghe suu kaakarataa vellaluela, ghe atinginala keruvim atoa† keruvim atoa Tarala Malloeana inangari. me iema ateva ghe ramerame me ghe aakirria tale pai sinaka esae tale utana ateva eIden tani tingina airunga salana atikirighi tale ai maulue ateae.