1 Iaue ghe uela ta Abram va, “Kasu vulila kosam ateva, me mangalim atoa, me kapum taumattu ngatoa, me ulao tale kosa ateva aua aghapasungainia etam. 2 Aue aghelei tuvum atoa la oroieili me la sarasarakana, me aue agharangiseio, me aue aghelei ararim ateae enamuu, me poli ta ngetam, taumattu ngatoa aue la ghaa niarangise. 3 Aue agharangise lo atoa la gharangiseio, me see ekasikienainio, aue akasikienainia, me aue ararimangali ekapaaili etoa tale kosa ateva oia aue la ghaa niarangise ta ngetam.”

4 Abram ghe kasu vulila eHaran nau eteva anna ninamanama ghe ghaitungaulu ghalimaela (75), nongina Iaue ghe uela etana va ekasu. Me Lot ghe usiela. 5 Abram ghe ghaala vausenna ateva ta Serai me natuna ta Lot, natuna ia nengane taita ateva ta Haran, me peiira atoa, me kieira ghaata kkena atoa, me taumattu ngatoa la uungu me karika la ghaaghaa aipolipoli, laghe ghaala eHaran. Laghe kasula tani lao tale kosa ateva eKeinan.

Nau laghe rekatala eKeinan, 6 Abram ghe kasu ekapa see, me ghe rekatala tale masaliki eteae eSekem, me ghe atingina saela alena kandisi eteva nongina kinatama ai eteae eMoreh. Tale isaa o nau, aKeinan atoa angila ghe toka vella. 7 Iaue ghe rekataala ta Abram, me ghe uela etana va, “Aue atau aatu kosa ateva oia eKeinan ta natum atoa.” Me Abram ghe gheleila liu aighelei niaiaavusuvusuena sae ta Iaue, lo ateva ghe rekataala etana. 8 Abram ghe kasu vulila ia o voto ateva, me ghe siola nongina motouru etoa, ghe atingina sae alena kandisi elome tale masaliki eluae eBetel, tale pai nge sinaka esuu, me Ai, tale pai nge sinaka esae, me ghe mene gheleila liu aighelei niaiaavusuvusuena sae ta Iaue, me ghe kolo tau saela ararina ateae tani kaueinia. 9 Vara me Abram ghe mene tiuaala tani mene kasu tani lao tale kosa ateva eNegeb.

10 Isaa o nau, paka malo ateva ghe lutula eKeinan, me Abram ghe siola tani toka tau mua eIjip, poli malo ateva sesaailiia. 11 Nau eteva ang ghe aakalakalaa tani sso eIjip, ghe uela ta vausenna ateva ta Serai va, “Akilakila va io masi vause io. 12 Me nau eteva aIjip atoa aue la taraio, aue la ue va, ‘Vausenna ateva oia,’ me aue la uvi emateaghi, me teva etaira eghaaio me io aue uvausenna io. 13 Unim ue va io kapughu vause io, me karika aue la uvi emateaghi, poli io aue asaanga.”

14 Nau eteva laghe rekatala eIjip, aIjip atoa laghe tarala vausenna ateva, me laghe saiiela. 15 Me nau eteva kapuna namu ngatoa Peroo laghe tarala Serai, laghe lao sio tani aulieinia ta Peroo va, “Vause ateva masinaaili taataraane,” me Peroo ghe sungila kapuna tau ngai uungu etoa va la laa ghaaie mae, me elaa toka tei kapuna atoa tanganuena. 16 Peroo ghe aitarangailila Abram, poli ghe anna va ia kapuna taita ateva ta Serai. Abram ghe ghaala oroieili sipsipi me vulumakao atoa, me donki etoa, me kamolo atoa, me tau ngai uungu taita me vause karika la ghaaghaa aipolipoli.

17 Vara me God ghe tau lao sio sesa isiki etoa ta Peroo, me ta lo atoa laghe tokatoka tanganuena, mausi vausenna ateva Abram ta Serai. 18 Nau eteva king ghe pae aotula vaalua me ila akapaaili laghe isikila, ghe suula inangari va la laa kolo mae Abram. Nau eteva Abram ghe rekatala, Peroo ghe kolomiela va, “Vaalua me ughe ghelei evaluela o etaghi? Me vaalua me karika ughe uela va vausenim ia? 19 Vaalua me ughe uela va kapum vause ia, me aghe ghaaiela va evausenighi ia? Vausenim ateva toko, ghaaiela, me amalu kasu.” 20 Peroo ghe auliaala ta kapuna soldia ngatoa va, “Am ghaaiela me vausenna ateva, me peiirarua akapaaili, me am laa oghi etairarua, me la kasu.”