1 Abram me vausenna ateva lalu ghe ghaa akapala peiiraua, me lalu ghe kasu vulila eIjip, me lalu ghe mene kiriaa sae eNegeb eKeinan, me Lot ghe usilaluela. 2 Abram ang ghe tau peipeienala, me oroieili kiena vulumakao, sipsipi me meemee, me oroieili tee unna golo me silva. 3 Vara me Abram ghe kasu vulila eNegeb, me ghe kasu ekapa seela, vara me ghe mene rekatala nongina ghe atingina mue saela alena kandisi, elome tale masaliki eluae eBetel me Ai. 4 Tale ia o voto ateva, ghe lao sio nongina ghe atuutulu muela liu aighelei niaiaavusuvusuena ta Iaue, me ghe mene kolo tau saela ararina.

5 Lot me kapuna tau ngai uungu etoa laghe kasu teila Abram, Lot tei oroieili kiena vulumakao me sipsipi me meemee, me oroieili kapuna tau ngai uungu etoa, laghe tokatoka tale oroieili ale kandisi. 6 Nau lalu ghe tokatoka aitaua, kosa karika rooroona, poli ilalua akapa peirarua oroieili. Liuna avalua o me karika lalu ghe roola tani toka aitaua. 7 Vara me kapuna tau ngai toi ghaata kkena atoa Abram, angila ghe sessa tei kapuna atoa Lot. Niaisessai ghe namungailiila poli aKeinan atoa me Perizza atoa laghe lao sio tani toka okae tee laghe tokatoka tee eKeinan.

8 Vara me Abram ghe uela ta Lot va, “Unongo! Nisessai erau mene aso elome etaitalua, me kapuitalua tau ngai uunug etoa, poli tue me nenga italua. 9 Oroieili kosa erooroo etaitalua, utara tuku teva ualoanna, me italu aitiuaa. Arova ulao tale pai muenna atelange, aghi aue alao tale pai uaise atelange, me arove ulao tale pai uaise atelange, aghi aue alao tale pai muenna atelange.”

10 Lot ghe atangaro saela me ghe tarala pai nge Jodan ativilau maiina ia, elaa oghioghi eZoar, me ateo atoa etana nongina eIjip, me nongina tee umana utana atingiu Iaue. (Isaa o nau, Iaue karika ghe tturuu eSodom me eGomorra.) 11 Nau Lot ghe aloannala pai nge Sodom ativilau, ghe tiuaala tani kasu tani lao tale pai nge sinaka esae, me taita alua lalu ghe aitiuaala. 12 Abram ghe tokala tale kosa ateva eKeinan, me Lot ghe tokala elome tale masaliki taatara tale voto ateva maiina ia, me ghe atingina saela alena kandisi etoa kalakalangina eSodom. 13 Taumattu nge Sodom sesaaili gheegheleiaaira, me laghe ghelei voto sesa ta matane Iaue.

14 Nau eteva Lot ghe kasula, Iaue ghe uela ta Abram va, “Utaatara akapa see tale pai ghaativilau. 15 Isaa o kosa angu tarala, aue atau aatu etam, me natum atoa, me aue ekosaimim elaalaa liu. 16 Me aue aghelei natum atoa aue la oroienaaili, nongina au kosa ateva, arova teva ghele ira au kosa ateva, aue ghele ira tee natum atoa. 17 Kasula, me ulaa kasu see tale kosa ateva, poli ngatau aatu sio etam.”

18 Vara me Abram ghe ghoula alena kandisi, me ghe mene toka tee ssola tale kinatama paka ngai etoa aina ila Mamre, kalakalangina tale masaliki eteae eHebron, me ghe atulula aighelei niaiaavusuvusuena ateva, me ghe kauaala God.