1 Tale isaa o nau, Amrapel king nge Sinar ia, me Ariok king nge Ellasa ia, me Kedolaome king nge Elam ia, me Tidal king nge Goiim ia, 2 laghe lao sio tani aiuvii tee Bera, kingi nge Sodom ia, me Birisa, kingi nge Gomorra ia, Sinab, kingi nge Adma ia, Semeber, kingi nge Zeboiim ia, me kingi ngateva nge Bela (nau ghaine la aseasea va Zoar). 3 Isaa o ghalima king me kapuira tau ngai aiuvii etoa, laghe velu eitauaala tale voto ateva malaale eSiddim (nau ghaine ita aseasea va voto ateva manu eteva uelanaaili ia). 4 Kasangaulu ghaluae ninamanama (12) Kedolaome ghe aitoieinilala, me vara aiaakasangaulu kotoluaata (13) ateae ninamanama, me laghe tiuaala tani amakatakata.

5 Vara aiaakasangaulu ghaata (14) ateae ninamanama, me Kedolaome me mene kotolu king, laghe lao sio tani oateila me laghe uvilala, me laghe aapala taumattu nge Repa atoa eAsterot Karanaim, me taumattu nge Zuz eHam, me taumattu nge Em atoa tale malaale ateva eKiriataim, 6 me taumattu nge Hor atoa tale motouru etoa eSeir. Laghe aiuivi elaolao, laghe laoainila sio arau eEl-Paran kalakalaa tale voto ateva nim kosaia me atu ia, me karika oroi voto epiipinosa etana. 7 Vara me laghe oghila, me laghe lao sio eEn-Mispat (nau ghaine ita aseasea va Kades), me laghe ghaala kosa akapa ateva kaluira ia taumattu nge Amelek atoa, me laghe uvi teela taumattu nge Amori etoa, laghe tokatoka eHazazon Tama.

8 King nge Sodom ateva, me king nge Gomorra ngateva, me king nge Adma ngateva, king nge Zeboiim, me king nge Bela (kateae ararina ta Zoar), laghe lao sio, me laghe velu eitauaala tale voto ateva malaale ia eSiddim 9 tani aiuvii tee Kedolaome king nge Elam ia, me Tidal king nge Goiim ia, me Amrapel king nge Sinar ia, me Ariok king nge Ellasa ia. Ghaata king laghe aiuvii teela ghalima king. 10 Voto ateva maiina ia eSiddim pasu ia tale liu, taa etana. Me nau king nge Sodom me Gomorra ngalua, me kapuirarua atoa, laghe iloula, kasina taumattu ghe katuu velu siola tale isaa o liu, me mene katoa tau ngai uvii me kingi, laghe ilou saela tale motouru. 11 Ghaata king sarasarakanaaili laghe ghaala ghinnaniira aSodom me aGomorra ngatoa, me isaa akapa aneira inana. 12 Laghe ghaa teela natuna Abram ta Lot (natuna ia nengane taita ateva Abram) me peina akapa, poli ghe tokatoka eSodom.

13 Kateva taumattu ghe saangala ghe lao sio tani auliaa isaa o voto ta Abram aHibru ia. Isaa o nau, Abram ghe tokatoka akalakalangina tale kinatama ai etoa ainaila Mamre, taumattu nge Amori ia. Tueirarue ia Eskol me Ane, ila me Abram laghe aipooa ngaitauaala va la ghaituutulii. 14 Nau Abram ghe nongola va ngeila ghe ghaala mangalina, me aue kapuira karavusu ia, ghe kolo aitauaala kotolu ai me kasangaulu ghaoalu (318) taumattu ghe lutula tanganuena, ang ghe apasungaala uunguaa niaiuvii etaira. Laghe aimulila, me laghe sokotola etaira nongina unna masaliki eteva Den. 15 Vara eleivoo me Abram ghe polala kapuna atoa tani laa uvi tau ngai ssateena atoa. Ghe voteilala, me laghe tiuaala tani ilou, me ghe ametilala, ghe saeainilala arau eHoba epona eDamaskas. 16 Ghe ghaa akapala isaakapaaili masi voto, me ghe ghaa oghi mae tee sio mangalina ta Lot, me tee vause atoa laghe ghaala eSodom.

17 Nau Abram ghe oghiaa mae sio, nau ghe ruula tani aiuvii tee Kedolaome me mene kotolu king laghe tiitingina aitaua, king nge Sodom ateva ghe lao sio tani soua, tale voto ateva maiina ia eSeva (nau ghaine ita aseasea va voto ateva maiina ia, unna ia king). 18 Vara me Melkizedek, king nge Salem ia, ghe laoa asio verete me uaeni. Ia kapuna pristi ia God iaaili Epona. 19 Me ghe arangiseiela me ghe uela va,

21 King nge Sodom ateva ghe uela ta Abram va, “Utau mae taumattu, me ughaa ghinna.”

22 Me Abram ghe uela ta king nge Sodom ateva va, “Aghe ssua asaela nimaghi tani ghelei inangari nialokoi ta Iaue, God iaaili Epona, ghe gheleila epona liu me kosa ateva, 23 va karika amene ghaa poi righi voto kalum, nongina teva tuku uasa ai-iri suu. Urau ue nonga va io ughe gheleieghila, me aghe tue peipeienala. 24 Aue aghanna nonga inana kapughu taumattu ngatoa laghe namala, me llo voto aue epeiira lo atoa taumattu laghe usieghila. Utau velu Ane, Eskol me Mamre, me laghaa peiira, poli laghe usila tani aiuvii, me ami ghe uvila kingi etoa.”