1 Nau ang ghe asaangila Lot, Iaue ghe rekataala ta Abram tale niasoasopoi, me ghe uela va, “Urau mene matauta righi voto, Abram, aue aghapallungio tale aissateem atoa, me aue atau aatu voto namungaili etam.”

2 Abram ghe uela va, “Vaughu eteva Iaue, sa ateva aue utaue mae etaghi? Poli karika teva natughu tani ghaa peighi. Lo ateva aue eghaa peighi Eliesa etana, aDamaskas ia.” 3 Me Abram ghe ue va, “Karika ughe tau mae sio righi natughu, liuna avalua o me kateva tana tau ngai uungu aue eghaa peighi ekapaaili.”

4 Me Iaue ghe uela ta Abram va, “Taumattu ngateva ona, karika aue eghaa peim, ta natum tunga ateva raemia aue eghaa peim.” 5 Me ghe uela ta Abram va, “Ughoa eleka, me utaatara sae elomarase, me uira katto atoa, arova urooroo tani iraila.” Me ghe mene uela etana va, “Aue tuvum atoa la oroi evalua o.”

6 Abram ghe atokala tuutulina ta Iaue, liuna avalua o me ghe aseala va ia ghulughuluena ia.

7 Ghe ue teela etana va, “Aghi Iaue, aghe ghaaiola tale masaliki eteae la kolokoa va Ur, eMesopotamia te etana, tani tau aatu kosa ateva oia eKeinan va ekosam ia.”

8 Abram ghe uela va, “Vaughu eteva Iaue, vaalua aue akila va aue aghaaia?”

9 Liuna avalua o me Iaue ghe uela etana va, “Ghaa tau mae vulumakao arighi vause ia, anna ninamanama erooroo kotoluae, me meemee ateva vause tee ia, anna ninamanama kotoluae, me sipsipi eteva taita ia, anna ninamanama kotoluae, me natu alikaoo ateva me valusu erighi.”

10 Abram ghe tau ekapa lao sio ta Iaue, me ghe uvi ematelala, me ghe sai polakila isaa o ghaata kkena elome polaki va eghaluevilau. Ghe aikoitala ta pai ghaluevilau, kativilau ghe taatara ppae lao, me ghila alua iroruke ilalua. 11 Vara me lo atoa ghila la namanama malatau laghe sio mae tale isaa o ghaata kkena, me Abram ghe koa vellala.

12 Nau eteva sinaka ateva ghe suula, Abram ghe aso siola tani asekanua, me ghe llusula, me kinatama matautu eteva ghe ghaaiela. 13 Vara me Iaue ghe uela etana va, “Aue tuvum atoa aue la laa toka tale kosa ateva karika va kosaira ia, me aue la uungu nongina tau ngai uungu etoa latam ghaaghaa aipolipoli, me isaa o taumattu, aue la ghelei saasakiangailila erooroo ghaata ai (400) ninamanama. 14 Ta aua aghelei saasakiaa ta lo atoa taumattu aue la uungu etaira, me nau eteva eghaa nauira tani kasu vulila, aue la tue peipeienaaili tale ia o nau eteva. 15 Me io, aue utaita namuu, me umate tale masi nimate. 16 Tale aiaaghaatane ateva vituu, tuvum atoa aue la mene kiri mae oia, poli sesa gheegheleiaaira taumattu nge Amori etoa la tokatoka tale kosa ateva eKeinan, gheegheleiaaira sesa aue namungaili, me karika righti airuuruu etana.”

17 Nau sinaka ateva ghe suula me ghe voola, aikaai parika eramerame ghe asuesu, me usulu eteae ngeramerame lalu ghe kasula tale mallome malatau. 18 Tale ia o nau eteva Iaue ghe auliaala inangari nialokoi eteva ta Abram. Ghe uela va, “Ngaghe tau lao sio kosa ateva eKeinan ta tuvum atoa, etittiua tale ateo ateae eIjip, me elaa oghioghi tale kinatama ateo ateae eIupretis. 19 Aue la ghaa kosa ateva eKeinan, asease taumattu ngatoa la tokatoka etana, taumattu nge Keni etoa, me taumattu nge Kenisi etoa, me taumattu nge Kadmon atoa, 20 me taumattu nge Het atoa, me taumattu nge Perizza atoa, me taumattu nge Repa atoa, 21 me taumattu nge Amori etoa, me aKeinan atoa, me taumattu nge Girgasi etoa, me aJebus atoa.”