16
Eiga ghe kkaaila natuna ateva Abram
1 Serai, vausenna ateva Abram, karika ghe rooroo tani kkaai righi aliki, me Eiga kapuna tau ngai nongonongo anna ia, vause nge Ijip ia. 2 Kateva nau Serai ghe uela ta Abram va “Iaue karika ange tautau velueghi va akkaai righi aliki, me aghaloanna va ulaa aso tee kapughu tau ngai nongonongo anna ateva, me ia erooroo tani tau mae teva natughu.”
Abram ghe lao aitaua tee sio sa ateva Serai ghe aulieiniela. 3 Voto oia ghe lutula nau eteva laghe tokatoka tale kosa nge Keinan kasangauluae (10) ninamanama ange lao sio, Serai ghe tau lao sio Eiga, tau ngai nongonongo anna ia, ta Abram va evausenna ia. 4 Ghe asoaso teela Eiga, me Eiga ghe kkaaila. Nau ghe kilala va ange kakkaai, ghe tiuaala tani tau sae nannaane, me karika ange oneoneaa kapuna namu ngateva ta Serai. 5 Vara me Serai ghe auliaala ta Abram va, “Isaa oia voto Eiga ghe gheeghelei teieghi, karika masina. Aghe tau aatu sio kapughu tau ngai nongonongo anna ateva va evausenim ia, me ghaine ang ghe kilala va ekakkaai, ang ghe tautau sae nannaane, me karika ange oneoneainaghi, akolo tau ararina ateae Iaue, me ia aue eauliaa va see kanna koronna.”
6 Abram ghe liula me ghe uela va, “Io kapuna namuu io, ughelei sa ateva ualoanna tani ghelei etana.” Serai ghe tiula tani ghelei voto aanasa ta Eiga, liuna avalua o me Eiga ghe ilou esuliaala.
7 Kapuna ensolo ateva Iaue ghe sama teela Eiga tale voto ateva nim kosa ia, me karika oroi voto epiipinosa etana, me kalakalaa nongina tale ateo vubbuai, ia oia ateo vubbuai easoaso kalakalangina tale salana atikirighi elaa siosio eSur. 8 Eghe uela ta ngetana va, “Eiga, tau ngai nongonongo anna io Serai, ea ukasula, me eaa ualoanna tani lao?”
Eiga ghe liula me ghe uela va, “Ailou eisuliaala teela kapughu namu ngateva ta Serai.”
9 Ghe uela kapuna ensolo ateva Iaue va, “Uoghi lao ta kapum namu ngateva, me unongo usila sa ateva eaulieinia etam.” 10 Ghe mene uela ensolo ateva va, “Iaue aue etau aatu oroieili tuvum atoa, karika aue urooroo tani ioila.”
11 Vara me ensolo ateva ghe uela etana va,
“Nongola! Ukakkaai aliki eteva
aue umolenainia taitaia.
Aue ukolo ararina ateae ta Ismael,* Ismael Malloeana va “God ghe nongola”
poli Iaue ghe nongola nau ughe aloanna niaisausi.
12 Aliki eteva ona aue enongina donki eteva karika teva tau ngaitarane.
Aue essa tee akapa taumattu ngatoa,
me taumattu ngakapa atoa aue la ssa teeia,
me aue ie nonga etoka, karika aue etoka tei toa mangalina.”
13 Eiga ghe asela ararina ateae Iaue va, El Roi, malloeana va, “Lo ateva God etaatara, me etautau mae voto ami aloanna.” Eiga ghe uela va, “Nga tarala lo ateva etaataraieghi.” 14 Liuna avalua o me ateo vubbuai ngateae oia laghe aseala va Lahai Roi, malloeana, “lo ateva tokatoka liua me etaataraieghi”, easoaso elome tale masaliki eluae eKades me eBered.
15 Eiga ghe nongo usilala ensolo ateva, me ghe oghi lao sio ta kapuna namu ngateva, ghe molenala aliki eteva taita ia, natuna ia Abram, me Abram ghe asela ararina ateae ta Ismael. 16 Abram anna ninamanama ghaoalungaulu ghaonomo (86) me Ismael ghe lutula.