1 Nau eteva Abram anna ninamanama ghe ghasiongaulu ghasiola (99), Iaue ghe mene rekataala etana me ghe uela va, “Aghi God ateva sarasarakanaaili ieghi. Unongo usilainaghi, me ughelei voto ghulughuluena. 2 Me aue aghelei inangari nialokoi eteva easo etaghi me etam, va aue aghelei mangalim atoa la oroieili.”

3 Nau eteva Abram ghe nongola, ghe tturru siola tapaa kosa, me God ghe uela etana va, 4 “Ta ngetaghi ngaghelei inangari nialokoi teio va: Aue tamaira io oroieili anue namu ngatoa. 5 Karika va ararim ateae ta Abram, ta nga ghaikolikolieinie lao ta Abraham, poli aue agheleio etuvuira io taumattu ngatoa tale kosa ateva. 6 Aue agheleio eoroieili tuvum atoa, me tuvum atoa aue la ghelei oroieili anue namuu, me kingi etoa aue la lutu etaira. 7 Aue asarasarakana inangari nialokoi etoka nau ekapa atoa elome etam me etaghi, me natum atoa me tuvum atoa, me tuvum atoa auena la lutu, me aghi kapum Goto ieghi, me aghi aue kapuira Goto ieghi tuvum atoa. 8 Aue atau aatu kosa ateva eKeinan etam, ia oia unim tokatoka tau mua etana, va ekalum ia nau ekapa atoa, me natum atoa, me tuvum akapa atoa, me aue ekapuira Goto ieghi.”

9 Me God ghe mene uela ta Abraham va, “Me io, utani aitaraa, me unongo usila inangari nialokoi aghauliaa etam va ughelei, karika va io nonga, ta io, me natum atoa, me tuvum atoa, me tuvum atoa auena la lutu. 10 Inangari nialokoi eteva ia avalua toko va, io me kapum atoa auena am usila inangari nialokoi, me am aitarainia, ila akapa taita atoa elome ta ngetaimim, am isoila. 11 Am aue la isoiem, me ia o voto ateva aue eaimatootoongana tale inangari nialokoi elome etaghi me am. 12 Me llo vituu auena elutu, isaa akapa taita nau ange lutula, me vara aiaaghaoalu (8) eteva nau, me la isoila. Karika va llo nonga atoa la lutulutu tanganueimim, ta llo tee atoa am polila tale viliki veu alitali ila, me karika va mangalimiila. 13 Am tani iso akapa lo atoa la lutulutu tanganueimim, me lo tee atoa am ghe polilala tale viliki veu, tale ia o salana atikirighi, aue inangari nialokoi ta ngeitalua aue etoka nau ekapa atoa. 14 Lo ateva taita karika la isoia, karika aue ataraia va ia kateva ta kapughu taumattu ngatoa, poli karika ange usilaala inangari nialokoi.”

15 Me God ghe mene uela ta Abraham va, “Me vausenim ateva Serai, urau mene asea ta Serai, ta uasea va Seraa. 16 Mausina aue agharangiseia, me aue essu natum taita ateva, me aue agharangiseia, me tuvuira ia oroieili taumattu ngatoa, me kingi etoa aue la lutu tee ta ngetana.”

17 Abraham ghe tturru siola tapaa kosa, me ghe oneoneaala God, me ghe kangala, me ghe nannaa va, “Teva taumattu anna ninamanama ange kateva aila (100) erooroo tani alutu teva aliki? Me Seraa erooroo tani kkaai teva aliki, nau anna ninamanama ange ghasiongaulula (90)?” 18 Liuna avalua o me Abraham ghe uela ta God va, “Arova Ismael ghele toka tale arangiseaam!”

19 Me God ghe uela va, “Karika! Karika va Ismael aue eghaa isaa o voto, ta vausenim ateva ta Seraa aue ekkaai aliki eteva taita ia, me aue uase ararina ateae ta Aisiki,* Aisiki Malloeana va “Ekangkanga” isaa akapaaili inangari nialokoi aue aghelei etana. Isaa o inangari nialokoi karika aue ekapa poi etana, me tuvuna atoa auena. 20 Ukolomila Ismael, aue agharangise teia me aue ataula oroi natuna, me aue aghelei tee tuvuna atoa la oroi, me aue tamaira ia kasangaulu ghalua (12) taumattu namuu, me aue aghelei tuvuna atoa la anue namuu. 21 Me tale inangari nialokoi aue aghelei nonga ta Aisiki, Seraa aue emolenainia, tale isaa avalua oia ase nau tale lo ateae to ninamanama.” 22 Vara God ghe ruula tani sama tee Abraham, me ghe kasu vuliela.

23 Tale ia arau nau eteva, Abraham ghe kolola natuna ta Ismael, me lo atoa taita laghe lutula tale paa masalikina ateae, me lo atoa taita ghe polilala nim tau ngai uungu ila, ila akapa taita laghe tokatoka tale paa masalikina ateae, me ghe isoilala, nongina God ghe auliaala. 24 Nau laghe isoiela, anna ninamanama Abraham ghasiongaulu ghasio (99), 25 me natuna ta Ismael anna ninamanama kasangaulu kotoluae (13). 26 Abraham me natuna ta Ismael, laghe isoilaluela tale ie nonga o nau eteva. 27 Isaa akapaaili taita elome tale paa masalikina ateae Abraham, laghe iso teela: lo atoa laghe lutula elome tale paa masalikiira ateae, me lo atoa laghe polilala, alitali ila.