1 Iaue ghe rekataala ta Abraham kalakalaa tale kinatama ai etoa eMamre, nau ghe tokatoka tale voto ateva laghe saghali etinginaiela, nongina laghe kupikupi sso tale alena kandisi eteva, pai ngelo sinaka. 2 Vara Abraham ghe taatara sae me ghe tarala taita kotolu angilotolu ghe aakalakalaa etana. Arovaeaata ta ghe tingina saela, me ghe iloula tani laa soulotolu. Ghe tturrula tani apasunga va ghe oneoneainila.

3 Ghe uela ta kateva etairotolu va, “Vaughu eteva, arova ughe tarala masina tale urunguita ateva etaghi, urau mene kasu vuli tanganuena kapum tau ngai nongonongo anna ateva. 4 La laa ghaa righi manu, me am pora mua kkeimim, me am ainoana tale pake ngai eteae oia. 5 Me alaa ghaa tee righi inana, me am nama, me am sarasarakana, me am vira kasu. Amasimasi tani sausiem, ta am mae sio tanganueghi.”

Lotolu ghe uela va, “Masinaaili, gheleila voto nongina uaaloanna.”

6 Arovaeangaili ta Abraham ghe lao sio tale ale kandisi eteva Seraa ghe tokatoka etana me ghe uela va, “Uaimonomonosiaa parasi righi verete tale masi palaoa erooroo kasangaulu ghaonomo (16) kilo maamaataniaane, me lotolu nama.”

7 Me Abraham ghe ilou lao sio tale voto kiena ghaata kkena atoa laghe tiitingina etana, me ghe ghaala natu vulumukao ateva karika righi voto sesa etana, me mmorona ia, me masinaaili ia tani namaia. Ghe taue lao sio ta kapuna tau ngai nongonongo anna ateva tani aimonomonosiaa parasia. 8 Nau inana ghe massola ghe ghaa teela rarumi susu ouna me susu ghe ssoko atokala, me ghe laoa asio ta taita kotolu tale pake ngai eteae. Abraham ghe tiitingina teila tani sausila.

9 Laghe kolomiela va, “Ea vausenim ateva ta Seraa?”

Abraham ghe liula me ghe uela va, “Ia elome tale aleingalua ateva.”

10 Me Iaue ghe uela va, “Tale ia oia ase nau eteva tale ie too ninamanama ateae, vausenim ateva ta Seraa aue eghaa aliki eteva taita ia.”

Seraa ghe nongo akapala isaa o voto ghe auliaala, poli ghe tokatoka elome tanganueirarua nongina laghe saghali kandisi eteva nongina laghe kupikupi sso. 11 Abraham me Seraa angilalu ghe tuvu ngalikieili ila, me Sera tee karika ghe rooroo tani kkaai teva aliki, poli nauna tani kkaai aliki ang ghe ruula. 12 Liuna avalua o me Sera ghe kangala ta nannaane, nau eteva ghe nnaala va, “Aghi karika arooroo tani kkaai teva aliki, me taitanighi eteva ang ghe taita namuu teela. Vaalua angalu rooroo tani alutu teva aliki?”

13 Me Iaue ghe uela ta Abraham va, “Vaalua me Seraa ekangala, me euela va, ‘Koronnaaili va aue akkaai teva aliki, nau ngaghe tuvu ngalikila?’ 14 Righi voto Iaue etam rooroo tani ghelei? Aue amene mae etam tale ia oia ase nau eteva tale ie to ninamanama ateae, me Seraa aue ekkaai aliki eteva taita ia.”

15 Seraa ghe matautula, liuna avalua o me ghe kamela va, “Karika akangala.”

Me ghe liula me ghe uela va, “Karika kamena, ukangala.”

16 Nau laghe ruula tani namanama, laghe tingina saela tani kasu. Abraham ghe usilala tani laa oghi etaira. Laghe rekatala tale kateva voto, me laghe taatara siola tale masaliki taatara ateae eSodom. 17 Me Iaue ghe nnaala va, “Aue aghauliaa kiena Abraham tale saa voto aue aghelei tale masaliki taatara ateae eSodom. 18 Poli tuvuna atoa aue la oroieili, me la sarasarakanaaili, me anue namuu ekapa atoa tale kosa ateva oia, aue la ghaa niarangise poli Abraham. 19 Poli ngaghe aseala va ia aue ekatulaa natuna atoa, me lo atoa la tokatoka teia tani usila sa ateva aghaulieinia, me tani ghelei voto ghulughuluena tale aloannaaghi, me aue aghelei inangari nialokoi aghe auliaala.”

20 Vara me Iaue ghe uela va, “Poli ngaghe nongola ngangngalaaira ghulughuluena taumattu ngatoa taumattu nge Sodom me Gomorra ngatoa la gheelei saasakieinila, 21 liuna avalua o me aue asio tara arova voto laghe gheleila sesaaili nongina aghe nongola ngangngalaaira. Aue akila amasina nau asio.”

22 Iaue ghe tingina teela Abraham, me taumattu ngalua lalu ghe kasula tani sio eSodom. 23 Abraham ghe tingina akalakalaa lao sio, me ghe uela va, “Vaalua! Aue utturu ghulughuluena taumattu ngatoa tee sesa taumattu ngatoa? 24 Vaalua? Arova ghalimangaulu (50) ghulughuluena taumattu etokatoka tale masaliki taatara ateae, aue utturungia? Me vaalua? Karika urooroo tani kalua kaluira ssavoto mausi ghalimangaulu ghulughuluena taumattu? 25 Karika masina tani tturu ghulughuluena atoa taumattu tee sesa atoa. Erooroo va utturu ghulughuluena taumattu ngatoa poli sesa gheeleiaaira sesa taumattu ngatoa lagheelei? Isaa o voto karika erooroo tani lutu! Io nonga tau ngai ghelei niaisakei io ta taumattu ngakapa atoa tale kosa ateva oia, me tani ghelei ghulughuluena voto.”

26 Iaue ghe uela va, “Arova atara ghalimangaulu ghulughuluena taumattu etokatoka elome tale masliki taatara ateae eSodom, aue akalua kaluira ssavoto ia o masaliki taatara ateae.”

27 Abraham ghe mene uela va, “Aghi nim taumattu ieghi, me erooroo va utau velueghi, me amene kolomio tale mene kateva nikokkolomi? 28 Arova ghaatingaulu ghalima (45) taumattu ghulughuluena, aue utturungi ekapaailila tale ia okae masaliki taatara ateae?”

Ghe liula me ghe uela ta Abraham va, “Karika aue atturungia, arova ataatara va ghaatingaulu ghalima ghulughuluena taumattu.”

29 Me kotonna Abraham ghe mene uela etana va, “Vaalua? Arova ghaatingaulu (40) nonga ghulughuluena taumattu tale masaliki taatara ateae eSodom?”

Ghe liula me ghe uela va, “Karika aue atturungia, arova atara va ghaatingaulu ghulughuluena taumattu.”

30 Vara me Abraham ghe uela va, “Vau eteva erau mene sessaio etaghi, utau velueghi, me amene kolomio. Sa ateva aue ughele gheleia arova kotolungaulu (30) nonga ghulughuluena taumattu etokatoka okae eSodom?”

Ghe liula me ghe uela va, “Karika aue atturungila arova kotolungaulu ghulughuluena taumattu etokatoka eSodom.”

31 Abraham ghe uela va, “Erooroo va utau velueghi me amene kolomio? Sa ateva aue ugheleia arova ghaluengaulu (20) nonga ghulughuluena taumattu etokatoka tale masaliki taatara ateae eSodom?”

Ghe liula me ghe uela va, “Karika arooroo tani tturungi ia o masaliki taatara ateae, arova ghaluengaulu ghulughuluena taumattu etokatoka okae.”

32 Me Abraham ghe uela va, “Aghanna tani auliaa airuuruu tale inangarighi, me erau mene sessaio. Vaalua arova kasangaulu (10) nonga taumattu ghulughuluena etokatoka eSodom?”

Ghe liula me ghe uela va, “Karika aue atturungia.”

33 Nau Iaue ghe ruula tani aippooa tee Abraham, ghe kasula, me Abraham ghe kiriaa lao sio tanganueira.