1 Ensolo alua lalu ghe rekatala eSodom elo alai, me Lot ghe tokatoka nongina atamana ateae tale masaliki taatara ateae. Nau ghe tarailaluela, ghe tingina saela tani laa soulalua, me ghe suiaala, me ghe tturru siola tapaa kosa. 2 Me ghe uela va, “Vaughu elua, amalu mae tanganueghi, me aua aghaitarainamalua. Aue amalu pora kkeimalua, me amalu aso, me aue nimanaa elue talaua, amalu mene kasu.”

Lalu ghe liula me lalu ghe uela va, “Karika, aue angalu nim aso eleka tale masaliki la veluvelu eitaua etana.”

3 Me ghe tani rrekanala, me lalu ghe usiela, me laghe lao sio tanganuena. Ghe aimonomonosiaala inana, me ghe tuula verete karika righi isti etana, me laghe namala. 4 Ngei lalu ghe ainasiaa tani asekanua, me taita akapa atoa, aliki taita ila me taita namuu ila, tale ia o masaliki taatara ateae eSodom, laghe tomla alena ateva Lot. 5 Laghe kolokoloaa Lot me laghe ue va, “Eaa ilalua taita alua ona tanganuem? Ghaailalue ghoa mae etaimami me ami lailalua.”

6 Lot ghe kupi ghoala me ghe kavatila atamana ateae emuli etana. 7 Me ghe uela va, “Ei! Kapughu etoa, am rau mene ghelei isaa ona voto sesaaili. 8 Am tara! Natughu vause alua oia, karika lalu ghe kila taita. Am tau velueghila, me aghaailalue ghoa etaimim, me am ghelei saa llo am anna tani ghelei etairarua. Me am rau mene ghelei righi voto ta ilalua oia taumattu ngalua, poli lalu mae sio tanganueghi, me aghanna va aghaitarainilalua.”

9 Me laghe ue va, “Vellaaio tale atamana ateae.” Me laghe ue va, “Ia oia taumattu ngateva karika ariere ia, me ange anna tani auliaa voto va ita ghelei.” Me laghe uela ta Lot va, “Aua ami ghelei voto sesaaili etam, elaulau voto ami ghelei ta lo alua o taumattu.” Me laghe bbi vella Lot, me ngei laghe anna tani rruti atamana ateae.

10 Me taita alua elome, lalu ghe ae velu ssola Lot elo ale, me lalu ghe kavatila atamana ateae. 11 Lalu ghe gheleila taumattu ngatoa eleka tale atamana ateae laghe mata salusalunala, me karika laghe roola tani pae atamana ateae.

12 Me taita alua lalu ghe uela ta Lot va, “Arova toa kapum tale ia oia masaliki taatara ateae, o toa natum taita me vause, me toa alumum taita, o mene righi mangalim, ukolola me am kasu. 13 Poli aue angalu tturu ia oia voto ateva ta gheeleiaaira sesaaili engangngala sae ta Iaue. Liuna avalua o me ghe sungiengaluela tani sio tturu ia oia masaliki taatara ateae.”

14 Liuna avalua o me Lot ghe lao sio tani aippooa tee taita alua laghe uela va lalu ghaa natuna vause alua. Ghe uela etairarua va, “Ita kasu parasi etana voto ateva oia, poli Iaue aue tturu ia oia masaliki taatara ateae.” Me lalu ghe anna va ghe nim ailaea.

15 Vara elue talaua poopooa me ensolo alua ngeilalu ghe ailuiluiaa see Lot maalla va la kasu parasi. Lalu ghe ue va, “Ailuiluila, me ukolo vausenim ateva, me natum vause alua, me am kasu, ta am rau mate nau Iaue eghelei voto sesa tale taumattu ngatoa tale masaliki taatara ateae oia.”

16 Lot ghe aippetana, liuna avalua o me taita alua lalu ghe kuneilala me vausenna ateva, me natuna vause alua, me lalu ghe kupieinila ghoala tale masaliki taatara ateae, tani asaangila. Poli Iaue ghe apasungaala maamasinaane etaira. 17 Nau eteva laghe kupienila ghoala, me kateva tana ensolo ghe uela etaira va, “Am ilou parasila, me am rau mene kiri taatara, me am rau mene ainoana tale voto llo maiina. Am tani sae ainoana tale motouru, ta am rau mate nonga.”

18 Me Lot ghe liula me ghe uela va, “Karika, vaughu elua. 19 Karika ami mene sae tale isaa okae motouru. Masinaaili voto ughe gheleila etaghi, me ghaine angu asaangila maamauluaaghi. Isaa o voto sesa erau ruu maamauluaaghi, me atam sae rekata. 20 Tarala masaliki eteae o kalakalangina ia. Erooroo va ami ilou lao etana? Utau veluemami, me ami ilou lao etana, poli ghaunaaili ia, me aue ami saanga.”

21 Ensolo ateva ghe uela va, “Masina, aue aghelei voto angu kolomieghila etana me karika aue atturu ia o masaliki eteae. 22 Me uailuilui, poli karika aue aghelei righi voto lomosi ta ulaa rekata etana.” Liuna avalua o me laghe asela arari voto ateva o ta Zoar.* Zoar Tale inangari nge Hibru, Zoar nongina “ghauna”.

23 Sinaka ateva ang ghe saela, me Lot maalla laghe rekatala eZoar. 24 Me Iaue ghe tau sio mae atu etoa ataataila ghe atala eSodom me eGomorra. 25 Ghe tturungi ekapaailila masaliki taatara tale ia o voto ateva, me isaa akapaaili voto maulue tale isaa o masaliki taatara, me voto ghe piipinosa. 26 Me vausenna ateva Lot ghe aimuli ta Lot ghe kiri taatarala lao sio emuli, me ghe nonginala atu uela ateva ghe tiitingina.

27 Elue talaua ta mene kateva nau, Abraham ghe totula, me ghe mene lao sio tale voto ateva ghe sama teela Iaue. 28 Nau ghe taatara siola eSodom me eGomorra, me tale ia akapa o kosa ateva maiina ia, me ghe tarala asu eteva ghe saela nonginaaili asu tale teae kinatama kura.

29 Nau God ghe tturuula masaliki taatara tale ia o voto ateva maiina ia, ghe nnaala Abraham, me ghe asaangila Lot me aviri ghe vira mene tturuula isaa o masaliki taatara Lot ghe tokatoka etana.

30 Lot ghe matautula tani toka eZoar, liuna avalua o ia me natuna vause alua laghe kasula tani sae tale lutu motouru. Tale isaa o voto, lotolu ghe tokala tale lienga. 31 Kateva nau, mua ateva vause ghe uela ta muli eteva va, “Tamaitalua ateva ange taataita namuu me karika righi taita tale ia oia voto ateva va italu ghele lai etaira, nongina kosa akapa ateva egheelei. 32 Italu ghelei tamaitalua me eropi manu sarasarakana, me italu laa ghaso teia, me aue italu alutu righi natuna.”

33 Ia o voo ngateva, lalu ghe gheleila tamairarua ghe ropi saasakiaala, me mua ateva vause ghe lao sio tani aso teia. Lot karika poi ghe kilala lovisa ghe aso teie siola, me lovisa ghe mene totula.

34 Vara ghe paila, me mua ateva vause ghe uela ta muli eteva va, “Eleivoo aghaso teela tamaitalua. Italu mene gheleia me eropi ghaine eleivoo, me io umene laa ghaso teia, me aue italu alutu righi natuna.” 35 Ia o voo ngateva, lalu ghe gheleila tamairarua ghe ropi saasakiaala, me muli eteva natuna vause ghe mene aso teiela, me Lot karika poi ghe kilala lovisa ghe aso teie siola, me lovisa ghe mene totula.

36 Liuna avalua o me natuna akapa alua Lot lalu ghe kkaaila, ta tamairarua ateva ghe asunukulaluela. 37 Me mua ateva natuna vause ghe kaaila aliki eteva taita ia, me ghe asela ararina ateae ta Moab.† Moab nongina “ghe mae sio ta tamaghi” tale inangari nge Hibru. Ia tamaira ia aMoab atoa nau ghaine. 38 Me natuna vause muli eteva tee ghe kaaila natuna aliki eteva taita ia, me ghe asela ararina ateae ta Ben-Ammi.‡ Tale inangari nge Hibru, malloeana Ben-Ammi va “natuna ateva kapughu taumattu ngatoa” Ia tamaira ia taumattu nge Ammon atoa nau ghaine.