1 Tale isaa o nau Abraham ghe kasu vulila voto ateva ghe tokatoka etana, elome tale kinatama ai etoa eMamre kalakalaa eHebron. Ghe kasula me ghe lao sio tani toka eNegeb, elome tale voto alua la kolokolo va Kades me Sur. Vara me ia me vausenna ateva ta Seraa, lalu ghe mene laa toka sio eGerar. 2 Nau ghe tokatoka eGerar, Abraham ghe uela ta taumattu ngakapa atoa va vausenna ateva ta Seraa, nengane vause ia. Liuna avalua o me Abimelek, ia kingi ia tale masaliki taatara ateae eGerar, ghe suula inangari va Seraa elao etana, me aue evausenna ia.

3 Eleivona ateva, God ghe rekataala ta Abimelek tale niasoasopoi, me ghe uela etana va, “Unongo! Aue umate, poli vause ateva angu ghaaiela, lailai ia.”

4 Tale isaa o nau, Abimelek karika ghe aso teeia. Liuna avalua o me ghe uela va, “Vau eteva! Aue utturungieghi me taumattu ngatoa aghaaitoieinila? Karika aghe gheleila teva voto sesa. 5 Ghe uela etaghi va, ‘Vause ateva oia nengaghi vause ia,’ me Seraa ghe uela va, ‘Taita ateva oia tueghi ia.’ Aghe gheleila voto oia tale ninanna masalike, me voto aghe gheleila, ghulughuluena.”

6 God ghe liula me ghe uela etana va, “Ue, akilakila va ughe gheleila voto oia tale ninanna masalike me masina. Liuna avalua o me aghe gheleila nannaam va urau mene aso tee Seraa, ta urau ghelei voto sesa ta mataghi. 7 Suu vella vause ateva, me elao ta taitanna ateva, poli taitanna ateva kapughu tau ngai kasuaa inangarighi ia, me ia aue elooloo sae mausi io, me aue utoka, me karika umate. Arova karika utau parasi lao vausenna ateva, io me kapum akapa atoa tanganuem, aue am mate.”

8 Elue talaua ta mene kateva nau, Abimelek ghe kolola kapuna tau ngai uungu etoa, me ghe auliaala sa ateva ghe taraiela tale unna niasoasopoi eteae. Kapuna tau ngai uungu etoa laghe matautu saasakiaala. 9 Vara me Abimelek ghe suula inangari va Abraham elaa taraia. Me Abimelek ghe uela va, “Vaalua me ughe gheleila voto oia ghe lutula etaimami? Karika aghe gheleila teva voto sesa etam, me ughe nnaala va voto sesa elutu etaghi me kapughu taumattu ngatoa. Ughe gheleila voto karika masina tani ghelei etaghi.” 10 Me Abimelek ghe kolomila Abraham va, “Vaalua ughe tani nnaala, me ughe gheleila voto ateva oia?”

11 Abraham ghe liula me ghe uela va, “Aghe nnaala va, ‘Karika poi teva oia eoneoneaa God, me aue la aloanna vausenighi eteva, me aue la uvi emateaghi tani ghaaia.’ 12 Me koronnaaili tee va ia nengaghi vause ia, tamamami kateva nonga ia, me karika va kinamami eitaua. Isaa avalua o me ia ghe vausenighi ia. 13 Me nau God ghe uela etaghi va akasu vuli tanganueghi, aghe uela etana va, ‘Unanna ngamasina, me uasaangieghi nau ita sou taumattu ngatoa nongina eaa ita laolao. Uauliaa etaira va aghi kapum taita aghi.’ ”

14 Liuna avalua o me Abimelek ghe laoa asio Seraa ta Abraham, me ghe nim tau lao sio oroieili voto ta Abraham karika ghe polila tee, me sipsip, me meeme, me vulumakao. Ghe tau tee lao sio tau ngai uungu etoa karika la ghaaghaa aipolipoli. 15 Abimelek ghe uela va, “Abraham! Utaatara akapa see tale kosa ateva aghaaitoieinia, me utara teva voto ualoanna tani toka etana.”

16 Me ghe uela ta Seraa va, “Nga tautau lao kateva airari (1,000) silva ta tuem taita ateva me kapum atoa, tani apasunga va karika aghe aso teiola. Isaa o voto eaapasunga va Seraa karika ghe gheleila righi ssa voto.”

17 Vara me Abraham ghe looloo saela ta God, me God ghe ghelei emasinala Abimelek, me vausenna ateva tee, me kapuna tau ngai uungu etoa vause ila, va aue la mene ghaa aliki, 18 poli Iaue ghe gheleila, me vause akapaaili etoa tanganue Abimelek laghe ruula tani ghaa aliki, mausi Abimelek ghe ghaala Seraa, vausenna ia Abraham.