1 Iaue ghe arangisela Seraa nongina ghe aulialaa va aue eghelei, karika ghe kkaluaala inangari nialokoi ghe auliaala. 2 Seraa ghe kkaaila, me ghe molenala natuna taita ateva Abraham, nau eteva ange taita namuula. Aliki eteva ghe lutula tale ia o nau eteva God ghe uela va aue elutu etana. 3 Abraham ghe asela ararina ateae aliki eteva Seraa ghe kkaaiela ta Aisiki.* Tale inangari nge Hibru, malloeana Aisiki va, “ghe kangala” 4 Nau eteva Aisiki ghe ghaitula nauna, Abraham ghe isoiela, nongina God ghe uela. 5 Isaa o voto ghe lutula nau eteva Abraham anna ninamanama ghe kateva aila (100).

6 Seraa ghe uela va, “God ange tau mae sio nikanga me nimasimasi, me lo atoa aue la nongo isaa o voto, aue la kanga tale voto oia ange lutula ta ngetaghi. 7 See ghe uela va karika arooro tani kkaai teva natuna Abraham? Ghaine nga kkaaila natuna taita ateva nau ang ghele taita namuula.”

8 Nau etvea Aisiki ang ghe namuula, me ghe ruula tani ssu ta kinna, Abraham ghe gheleila kinatama ninamanama ateae. 9 Me Seraa ghe taatara, me ia o lo ateva Abraham ghe tauela ta Eiga, vauseni nge Ijip ia, ghe ammarasa natuna. 10 Liuna avalua o me ghe uela ta Abraham va, “Sungi vella ia ona vause ateva, nim tau ngai uungu ia, me natuna, ta ia ona natuna aliki eteva, karika aghaloanna va eghaa righi peim, peim voroi peina natughu ta Aisiki.”

11 Isaa oia inangari ghe gheleila Abraham ghe annangailila, poli natuna tei ta Ismael. 12 God ghe uela ta ngetana va, “Abraham, urau mene annangaili aliki eteva me kinna. Uaimulusi tee sa ateva Seraa ange aulieiniela va ughelei, ta poli aue ta Aisiki tuvum atoa aue la lutu, nongina inangari nialokoi aghe auliaala. 13 Me, aue aghelei tee lo ateva o natum aliki aue la oroieili tuvuna atoa, me aue la alutu anue namuu, poli ie tee natum ia.”

14 Abraham ghe totula elue talaua, ghe taula inana me ateo ateva ta Eiga, ghe atoka saela ta pappane, me ghe sungi veluela me natuna ta Ismael, me lalu ghe kasula. Lalu ghe lao sio tale paa tuvui eteva, karika righi taumattu etana, kalakalangina tale masaliki eteae eBesiba, lalu ghe nim sassale se o.

15 Nau eteva lalu ghe ropi ematila ateo ateva, Eiga ghe kasu vuli etokala aliki eteva tale pake ngai erighi. 16 Ghe laa toka sio maamasauaane erooroo kateva ai (100) mita. Poli ghe nanna va, “Karika aghaloanna tani tara aliki eteva nau eteva emate.” Vara me ghe tiuaala tani ngala.

17 God ghe nongola aliki eteva ghe ngangngala, me ghe suula kapuna ensolo ateva epona liu tani kolokoloa Eiga, “Eiga, sa ateva egheleiola me ualousiusi? Karika umene matautu: God ange nongola unna ningala natum. 18 Lao sio, me ulaa kune atingina sae aliki eteva, me usausia, poli aue aghelei natuna atoa me tuvuna atoa, aue la alutu teae kinatama anue namuu.”

19 Vara me God ghe otila matane alua, me ghe tarala ateo kaikai eteae, kalakalangina ia nongina ghe tiitingina. Eghe lao sio, me ghe akula ateo ateva, me ghe taue lao sio ta natuna, me ghe ropila.

20 Nau eteva aliki eteva ghe namuula, God ghe tokatoka teia. Eghe tokala eParan, tale voto ateva karika righi taumattu ghe tokatoka etana, muennaili ia tani soasoa tale bunara. 21 Nau eteva ghe tokatoka tale voto ateva karika righi taumattu etana, kinna ghe ghaala vausenna ateva aIjip ia.

22 Tale isaa o nau Abimelek me Pikol, kapuira namuu ia kapuna tau ngai aiuvii etoa, lalu ghe mae sio tani tara Abraham. Abimelek ghe uela va, “Akilakila va God etokatoka aitaua teio tale voto akapa ugheeghelei. 23 Liuna avalua o me aghaloanna va ughelei righi inangari niaippoa ngaitaua isaa oia ta ngetaghi me ta mata God, va karika aue ughelei voto sesa ta ngetaghi, me natughu etoa, me tuvuira atoa auena. Aghe gheleila masi voto atoa ta ngetam, nau ughe mae sio va ativuu io tale anue namu ngateva oia, me aghaloanna va ughelei tee ta ngetaghi, nongina aghe gheleila etam.”

24 Abraham ghe liula me ghe uela va, “Nga ghauliaa inangari niaippoa ngaitaua ta ngetam me ta mata God va, aue aghelei nongina angu kolomila.”

25 Vara me Abraham ghe auliaala ta Abimelek tale ateo kaikai eteae, kapuna tau ngai nongonongo anna atoa Abimelek laghe sariela, me ia ghe kaiela. 26 Abimelek ghe liula me ghe uela va, “Karika akilakila isaa ona llo, me see eghe gheleila. Karika ughe auliaa poila isaa ona llo, nga mina kilala ghaine.”

27 Taita alua lalu ghe mae aitaua sio tale isaa o inangari lalu ghe aippoa teela, vara me Abraham ghe tau lao sio ghaata kkena atoa, sipsipi, me meemee, me vulumakao ta Abimelek. 28 Emulina Abraham ghe mene atingina pae lao sio ghaitu (7) natu sipsipi vause tale kiena ghaata kkena akapa atoa. 29 Me Abimelek ghe kolomiela va, “Sa malloeana isaa ona ghaitu natu sipsipi vause uatingina ppae lao sio?”

30 Abraham ghe liula me ghe uela va, “Aghaloanna va ughaa isaa oia ghaitu natu sipsipi vause tani aimatoonga va aghi aghe kaila ateo kaikai eteae oia.”

31 Liuna avalua o me voto ateva o laghe asela ararina ateae va Bersiba,† Tale inangari nge Hibru, malloeana Bersiba va “ateo kaikai ngateae ghaitu” o “ateo kaikai ngateae inangari nialokoi eteva” mausi taita alua lalu ghe aulialaa inangari nialokoi.

32 Nau taita alua lalu ghe ruula tani aippoa tee inangari nialokoi eBersiba, Abimelek me Pikol lalu ghe oghiaa lao sio tanganueirarua, tale kosa nge Pilistia. 33 Abraham ghe tokala, me ghe pasala ai eteae, la aseasea va tamarisk, eBersiba, me tale ia o voto ateva ghe kolo tau saela ararina ateae Iaue, Goto ia tokatoka liu ia. 34 Abraham ghe toka liula tale kosa nge Pilistia ngateva.