1 Jekop ghe nongola va natuna taita atoa Leiban laghe ue va, “Jekop ang ghe ghaa akapala voto kanna tamaita ateva me ghe tue peipeiena teela tale voto kanna tamaita ateva.” 2 Me Jekop ang ghe taatara va gheeleiaane Leiban ta ngetana ang ghe isaa ppae. Karika nongina isaa too nau ang ghe lao sio.

3 Me Vau ngepona ateva ghe uela ta Jekop va, “Oghi lao sio tale kosaira ateva tamam atoa me ta mangalim atoa me auea atoka aitauaa teeio.” 4 Liuna avalua o me Jekop ghe suula inangari ta Resol me Lia tani mae taraia nongina kiena meemee atoa me sipsipi etoa laghe tiitingina. 5 Me ghe uela etairarua va, “Ngataatara gheeleiaane tamaimalua ateva ange isaa ppae karika nongina nau too ang ghe lao sio. Nim kapuna God ateva tamaghi etokatoka aitauaa teeieghi. 6 Amalu kilakila va aghe uungu esarasarakanaailiila ta tamaimalua ateva. 7 Me ghe nim kamekameaghi me ghe aikolikoliaala aipolighi ghe roola kasangauluaata. Me God ghe tam tau veluela tani ghelei saasakieinaghi. 8 Nau Leiban eue va, ‘Llo meemee makamakanna eaipolim,’ isaa akapa meemee eaalutu meemee makamakanna, me nau eue va, ‘Llo meemee kala pitipitiena eaipolim,’ isa akapa meemee kala pitipitiena eaalutu meemee kala pitipitiena. 9 God ang ghe ghaa vella kiena ghaata kkena tamaimalua ateva me ang ghe tau mae sio etaghi.

10 “Nauira ghaata kkena atoa tani aimarati, aghe asoasopoila, aghe tarala va taita atoa meemee makamakanna ila me kala pitipitiena ila laghe lailai vause atoa meemee. 11 Kapuna ensolo ateva God ghe uela etaghi tale uneghi niasoasopoi eteae va, ‘Jekop,’ me aghe uela va, ‘Aghi toko.’ 12 Me ensolo ateva ghe uela etaghi va, ‘Tarala! Llo nonga atoa meemee makamakanna ila me kala pitipitiena ila la ghailai poli ngaghe tara akapala voto Leiban egheelei teeio. 13 Aghi God nge Betol ieghi tale ia o voto ateva ughe kaola oeli tale atu eteva me ughe auliaala inangari etaghi tale voto aue ughelei. Ukasu vuli ia oia voto ateva me ukiriaa lao tale kosa ughe lutula etana.’ ”

14 Me Resol me Lia lalu ghe uela ta Jekop va, “Karika righi voto aue angalu ghaa ta tamaingalua ateva. 15 Ang ghe gheleiengaluela arova ativuu iengalua me karika nonga ghe tau veluengaluela va la poliengalua ta ghe nama teela viliki veu laghe poliengaluela etana. 16 Isaa akapa masi ghinna God ghe ghaa vella ta tamaingalua ateva, peiingalua me natuingalua atoa. Liuna avalua o me ughelei saa voto God ghe auliaala etam.”

17 Me Jekop ghe sau etoka saela natuna atoa me vausenna atoa tale kamolo atoa. 18 Me ghe atingina muemuela kiena ghaata kkena laghe muemueiniela tee me isaa akapa masi voto ghe ghaala ePadan Aram tani oghi lao ta tamane ta Aisik tale kosa ateva eKeinan.

19 Nau eteva Leiban ghe lao sio tani sunapia uuira kiena sipsipi etoa, Resol ghe ainaola unna tamane goto atoa pei ngelo ale ila. 20 Jekop ghe ilou eisuliaala ta Leiban aArami ia nau karika ghe auliaala kiena va ang ghe kasukasu. 21 Liuna avalua o me ghe ilou eisuliaala tee me isaa akapa voto peina me ghe llaula tale ateo ateae me ghe tiuaala tani ameti saesaena tale voto ateva eGilead.

22 Vara aiaakotonna ateva nau me laghe auliaala kiena Leiban va Jekop ang ghe ilou eisuliaala. 23 Ghe kolola kapuna atoa me ghe aimuli teela Jekop ghe roola ghaitu (7) nau me ghe sokotola etana tale lutu motouru tale anua ateva eGilead. 24 Me God ghe rekataala ta Leiban atalange Arami ia tale niasoasopoi eteae eleivoo me ghe uela etana va, “Upanio! Urau nim auliaa tee Jekop tale righi voto arova sesa o masina.”

25 Jekop ang ghe atingina saela alena kandisi tale anua ateva eGilead nau Leiban ghe attauela. Leiban tee me kapuna atoa laghe toka tau teela okae. 26 Me Leiban ghe uela ta Jekop va, “Vaalua me ughe ghelei evaluela o? Ughe kameaghila me ughe ilouaala natughu vause alua nonginaaili lo atoa la soasoa llotila tale niaiuvii. 27 Vaalua me ughe nim kameaghila me ughe ilou eisuliaala me karika ughe auliaala kieghi va aue aghe sungi veluo tale nimasimasi me mangalia nikkinari laghe kau tale righi kundu me gita? 28 Karika ughe tau velu teeieghila va aghe ngusu tuvughu etoa me natughu vause alua tani akorovaila? Ughe gheleila voto alokapakapannaaili. 29 Rooroonaaili ieghi tani ghelei saasakienio me eleivoo kapuna God ateva tamam euela etaghi va, ‘Upanio me urau nim auliaa tee righi voto ta Jekop marova sesa o masina.’ 30 Ughe ilou eisuliaala poli ughe annaaili tani kiriaa lao tanganue tamam me vaalua me ughe ainaola uneghi goto atoa?”

31 Jekop ghe liula ta Leiban me ghe uela va, “Aghe maamatautu va ughe rau asarasarakanaio tani ghaa oghi natum vause alua etaghi. 32 Me arova upae teva ghe ghaala unem goto, karika emene toka ta emate. Me ta mataira kapuitalua atoa utara arova aghe ghaala righi peim me arova righi ughaa.” Jekop ghe tam kilakila va Resol ghe ainaola isaa o goto.

33 Liuna avalua o me Leiban ghe kupi ssola tale alena kandisi eteva Jekop me alena ateva Lia me aleirarua tau ngai uungu elua vause ta Bila me Zilpa me karika ghe tarala righi voto. Nau ghe kupi ghoa mae tale alena ateva kandisi Lia me ghe kupi ssola tale alena ateva Resol. 34 Resol ghe ghaala isaa o goto pei tanganueira me ghe kaai eisuliaala elome tale aitokatoka ateva tale kamolo ateva me ghe toka saoaala etana. Leiban ghe pae akapala kandisi me karika ghe paela.

35 Me Resol ghe uela ta tamane va, “Vaughu erau mene sessaio etaghi ta karika arooroo tani tingina sae ta matam poli ataatara ulana.” Leiban ghe pae poila me karika ghe paela goto pei tanganuena.

36 Me Jekop ghe sessaiela me ghe uela ta Leiban va, “Sa ateva voto sesa aghe gheleila me upaepaeaghi? 37 Ia oia angu ruula tani pae akapa ghinnanighi, saa righi voto angu paela me utarala va pei tanganuem? Arova angu paela righi, uatoka ghoa emua ta mataira kapum atoa me kapughu etoa me ila aue la kila va saa taumattu italua.

38 “Aghe toka teeiola ghe roola ghaluengauluae (20) ninamanama me aghe aitaraala kiem sipsipi etoa me meemee atoa laghe lutulutu emasina me karika aghe nama poila teva kiem sipsipi taita. 39 Karika aghe maemaeaa etam llo ghaata kkena sesa ghaata kkena atoa laghe uviuvi emate. Aghi aghe liuliu me ughe looloo aipolipoli etaghi tale llo ghaata kkena laghe ainao ellaa me eleivoo. 40 Isaa toko voto ghe lutulutu etaghi. Aanasa ateva ghe ghaaghaaieghi ellaa me kkaili eteva eleivoo me karika aghe aseskanue amasina. 41 Isaa o ase voto ghe lutula etaghi ta ghaluengauluae ninamanama nau aghe toka teeiola tanganuem. Aghe uungu ghe roola kasangaulu ghaatiae (14) ninamnama ta natum vause alua me ghaonomoae (6) ninamanama tale kiem sipsip me meemee me ughe aikolikoliaala aipolighi kasangauluaata (10). 42 Arova kapuna God ateva tamaghi ia o kapuna God ia Abraham me Aisik karika ghe tokatoka aitauaa teeieghi, aue ughe nim sungi velueghi me karika aue ghe righi peighi. Me nim God ghe tarala voto aanasa tale maamauluaaghi liuna avalua o me eleivoo ettoieiniola.”

43 Leiban ghe liula inangarina Jekop me ghe uela va, “Vause alua oia natughu ilaua me aliki oia natughu me sipsipi me meemee kieghi isaa akapa voto oia utaatara peighi me sa ateva ghaine agheleia ta ilalua oia natughu vause alua me tale aliki oia ngeilalu ghe ssula? 44 Mae sio me italu ghelei inangari nialokoi me aue easo elome etam me etaghi.”

45 Liuna avalua o me Jekop ghe ghaala atu eteva me ghe atinginaie saela. 46 Me ghe uela ta kapuna atoa va, “Am atokaai tauala atu.” Liuna avalua o me laghe ghaala atu me laghe aisaoa ngatoka saela me laghe namanama taliaala tale isaa o atu. 47 Leiban ghe asela ararina ateae ia o voto ateva ta Jega Saduta me Jekop ghe aseala va Giled.

48 Lieban ghe uela va, “Ia oia itoi ngatu eteva, eaaimatootoongana inangari nialokoi talu gheleila ghaine.” Liuna avalua o me laghe aseala va Giled. 49 Laghe ase teela Mispa etana poli ghe uela va, “Aue Vau ngepona ateva eaitarainitalua nau eteva italu aitiuaa. 50 Arova utam aitara ngamasina natughu vause alua me arova umene ghaa ppae righi vause va evausenim, me arova atam kila, utani nnaa va God ange nongola inangari nialokoi ngeitalu gheleila.”

51 Leiban ghe mene uela ta Jekop va, “Ie toko itoi ngatu eteva me lo ateva atu ngaghaatinginaia elome etaitalua. 52 Ia oia itoi ngatu eteva o me lo ateva o atu ngaghatinginaiela eaaimatoonga inangari nialokoi ngeitalu gheleila va aghi arau mene lau isaa o atu va amae ta paim me io urau mene lau itoi ngatu eteva me atu eteva etiitingina va umae ta paighi tani mae ghelei saasakieinaghi. 53 Aue kapuna God ateva Abraham me Naoo me kapuira God ateva tamaira atoa aue tara me egheli voto koronna elome etaitalua.”

54 Ghe gheleila aiaavusuvusuena tale lutu motouru tale ia o masaliki eteae me ghe kolola mangalina atoa va la namanama. Nau laghe ruula tani namanama, laghe asola tale ia o voto ateva. 55 Elue talaua poopooa tale mene kateva nau, Leiban ghe ngusula tuvuna atoa me natuna vause alua me ghe arangiseilala me ghe kasu vulilala tani oghiaa lao tanganuena.