1 Nau Resol ghe tarala va karika erooroo tani kaai righi natuna Jekop, ghe tiuaala tani sessaia ta tuena. Liuna avalua o me ghe uela ta Jekop va, “Uaso teeieghi me ualakuti righi natughu arova karika amate.”

2 Jekop ghe sessaiela etana me ghe uela va, “Ta aghi God me agheelei rungainio va urau mene kkaai righi aliki?”

3 Me Resol ghe uela va, “Bila toko. Ghaaiela me ulaa ghaso teeia me tale ia o salana atikirighi, aghi tee arooroo tani natuena.”

4 Liuna avalua o me ghe tau lao sio Bila, kapuna tau ngai uungu eteva vause ia, ta Jekop me Jekop ghe aso teeiela. 5 Bila ghe sunukula me ghe molenaala aliki eteva taita ia. 6 Me Resol ghe uela va, “God ange taraieghila va masina voto agheleila, me ange nongola kalughu nikokkolomi sae me ange tau mae sio natughu taita ateva.” Me ghe asela ararina ateae ta Den.

7 Kapuna tau ngai uungu eteva Resol ta Bila ghe mene kkaaila me ghe molenaala aiaaghaluene ateva natuna taita Jekop. 8 Vara me Resol ghe uela va, “Tale kinatama niaitamammarasii ta ngetaghi me tueghi ta Lia anga uiinila.” Liuna avalua o me ghe asela ararina ateae ta Naptalae.

9 Nau Lia ghe tarala va karika ang ghe kaakaai righi natuna Jekop, ghe ghaala kapuna tau ngai uungu eteva ta Zilpa me ghe taue lao sio ta Jekop va evausenna ia. 10 Zilpa, kapuna tau ngai uungu ia Lia, ghe molenaala natuna ateva Jekop taita ia. 11 Vara me Lia ghe uela va, “Masi voto ateva oia.” Liuna avalua o me ghe asela ararina ateae ta Ged.

12 Kapuna tau ngai uungu eteva Lia ta Zilpa ghe mene molenaala aiaaghaluene ateva natuna taita Jekop. 13 Vara me Lia ghe uela va, “Nimasimasi etoka etaghi me aue vause akapaaili etoa aue la koloaghi va tau nimasimasi ieghi.” Liuna avalua o me ghe asela ararina ateae ta Asa.

14 Nau nimuke utana ateva, me Ruben tee ghe lao sio me ghe ghaala ue ngai tale ai eteae la aseasea va mendreik me ghe laa tau sio ta kinna ta Lia. Vara me Resol ghe uela ta Lia va, “Isaa o katu ue ngai unna natum taita ateva, utau mae righi etaghi.”

15 Me Lia ghe liula ta Resol me ghe uela va, “Ughe ghaa vella taitanighi eteva me umene ghaa kanna voto natughu taita ateva?”

Me Resol ghe uela ta Lia va, “Mausi kanna voto natum taita ateva me Jekop ghaine emae aso teeio.”

16 Elo alai Jekop ghe oghiaala eutana me Lia ghe lao sio tani soua me ghe uela va, “Ghaine umae aso teeieghi ta ngapoliola tale kanna voto natughu taita ateva.” Jekop ghe aso teela Lia tale ia o vo ngateva.

17 Lia ghe sunukula poli God ghe nongola kanna nikokkolomi. 18 Vara me Lia ghe uela va, “God ange tau mae sio aipolipoli etaghi ta aghe tau lao sio kapughu tau ngai uungu eteva ta taitanighi eteva.” Me ghe asela ararina ateae ta Isika.

19 Lia ghe mene kkaaila me ghe molenaala aiaaghaonomina ateva natuna taita Jekop. 20 Vara me Lia ghe uela va, “God ang ghe tau mae sio kateva masi voto. Isaa oia nau, aue taitanighi eteva aue eoneoneainaghi ta poli ngaghe ssula ghaonomo natuna taita,” me ghe asela ararina ateae ta Zebulun.

21 Kasina nau ghe lange sio me ghe mene molenaala aliki eteva vause ia me ghe asela ararina ateae ta Daena.

22 Me God ghe nnaala Resol me ghe nongola unna nilooloo sae me ghe otila aikaai ngaliki eteva ta kovane. 23 Ghe sunukula me ghe molenaala aliki eteva taita ia me ghe uela va, “God ange ghaa vella voto ateva egheleieghi me apaapalata.” 24 Ghe asela ararina ateae ta Josep me ghe uela va, “Aue Vau ngepona ateva emene tau mae teva natughu taita.”

25 Vara Resol ghe molenaala Josep me Jekop ghe uela ta Leiban va, “Utau velueghi me akasu me amene kiriaa lao tanganueghi. 26 Utau mae vausenighi etoa me natughu etoa aghe uungueinilala etam me akasu. Io ukilakila ghaisaa niuungu aghe gheleila etam.”

27 Me Leiban ghe uela etana va, “Aghauliaa mua kateva voto etam. Aghe gheleila voto tani kila voto llo aisulianna me aghe tarala va Vau ngepona ateva eaarangiseieghi mausim.” 28 Vara me ghe uela va, “Uase aipolim me aue apoli.”

29 Jekop ghe liula me ghe uela va, “Io ukilakila vaalua aghe uungu etam me vaalua kiem sipsipi ghe oroila. 30 Nau aghe rekatala, karika oroi kiem sipsipi me ia oia, ngeila ghele oroiannaailiila me Vau ngepona ateva eaarangiseio tale voto alaolao etana.”

31 Me Leiban ghe uela va, “Sa ateva unnaa va atauaatu?”

Me Jekop ghe liula me ghe uela va, “Urau mene tau mae righi voto, me unim ghelei nonga kateva voto etaghi. Aghanna va utau velueghi me amene aitaraa kiem sipsipi. 32 Utau velueghi ghaine me atara amasina akapa kiem sipsipi me meemee me aghaa akapa llo lutu sipsipi veroverongana me llo sipsipi me meemee kala pitipitiena. Isaa o llo aue aipolighi. 33 Me nau too emaemae aue utara kila va voto agheelei koronna, me arova uanna tani mene tara aipolighi ughe polieghila etana va utara teva meemee karika kala pitipitiena o teva natu sipsipi karika veroverongana, aue ukila va ainaona ia.”

34 Me Leiban ghe uela va, “Ngaghasokoila inangarim. Aue ita aumuli tee nongina angu auliaala.” 35 Ie nonga o nau eteva Leiban ghe uesi vella llo taita meemee kala pitipitiena me ghe uesi velu teela isaa akapa sipsipi veroverongana me ghe taula va natuna taita atoa va la ghaitaraa. 36 Me laghe kasua ngamasau lao sio tale voto erooroo va kotolu nau ughele kasu tani lao etana me llo sipsip me meemee ghe tinginala Jekop ghe aitaraala.

37 Jekop ghe saila laa ngai tale ai kotoluae, popla ngateae, almon ateae me plen ateae me ghe kuluki vella vilikiira me llo usousoana me aluse tale laangiira ghe otula. 38 Me ghe atinginala isaa o laa ngai kuukuluki tale voto laghe kaokao manu etana tani tingina emua ta mataira sipsipi etoa me meemee atoa nau laghe mae ropiropi. 39 Laghe aailai emua tale isaa o laa ngai me laghe moomolena lutu meemee kala pitipitiena. 40 Me Jekop ghe tautau velu kiena sipsipi etoa Leiban laghe aailai emua tale llo meemee kala pitipitiena. Tale isaa o salana, ghe ghaala kiena sipsip me meemee me ghe atingina ppae teela ta kiena Leiban. 41 Nau llo ghata kkena sarasarakana me masina laghe anna tani ailai, Jekop ghe aatingina isaa o laa ngai emua nongina laghe ropiropi. 42 Me llo ghaata kkena karika sarasarakana, karika ghe aatingina laa ngai. Liuna avalua o me llo karika sarasarakana ghe kiikiena Leiban me llo sarasarakana ghe kiikiena Jekop. 43 Tale isaa o salana Jekop ghe tue peipeienala me kiena sipsip me meemee ghe oroieiliila tee me kapuna tau ngai nongonongo anna atoa me kamolo me donki.