1 Vara me Jekop ghe mene taaila tani kasu tale unna nikasu eteae, me ghe mae sio tale voto ateva sinaka esae, nongina mangalina atoa kinna laghe tokatoka etana. 2 Isaa oka ghe tarala ateo kaikai eteae aitaua tee kotolu raa sipsip laghe asoaso kalakalangina etana, poli ila akapa ghaata kkena atoa aue ila ropiropi tale ioka ateo kaikai eteae. Atu eteva epona tale paa ateo kaikai eteae namungaili ia. 3 Nau ta ila akapa ghaata kkena atoa ila velu eitaua okae ila o tau ngai toitoi ghaata kkena atoa aue ila atakiri velu atu eteva tale paa ngateo kaikai eteae me ila aropi sipsip atoa. Vara me la mene atakiri atu eteva tani akou runga paa ngateo kaikai eteae.

4 Jekop ghe lao sio ta tau ngai toitoi etoa me ghe kolomila, “Kapughu etoa, ea tanganuem?”

Ila ghe liula va, “EHaran.”

5 Vara me ghe kolomila va, “Ia am kilekile Laban tuvuna ia Naoo?”

Ila ghe liula va, “Ue.”

6 Liuna avalua Jekop ghe kolomila va, “Ia masina ia?”

Laghe liula, “Ue, me tarala ia o natuna vause ateva ta Resol emaemae aitaua tee sipsip atoa.”

7 Jekop ghe uela va, “Tarala, sinaka ateva ia mala ngepona. Karika ie ghe nau ta ghaata kkena atoa tani velu eitaua. Am aropiropi sipsip atoa me am mene oghieinia lao tani laa nama rarrasa.”

8 Ila ghe liula va, “Aue ami toi lomosina ila akapa tau ngai toitoi etoa la mae tee kieira sipsip atoa, vara me ami eitaua aue ami roola tani atakirila atu eteva, me ami tauala manu ta ghaata kkena atoa.”

9 Nau Jekop ghe samasama teeila, Resol ghe mae tee sio tamana kiena atoa sipsip, ta ia vause tau ngai toitoi ia. 10 Nau ta Jekop ghe tarala Resol natuna vause ateva Laban, ia kinna kapuna taita, me Laban kiena sipsip atoa, ghe lao sio me ghe atakiri vella atu eteva tale paa ngateo kaikai eteae me ghe aropiropila aloana kiena sipsip etoa. 11 Vara me Jekop ghe ngusuala Resol me ghe tiula tani ngala anamuu. 12 Eghe uela ta Resol va, “Aghi natuna aghi Rebeka, tamam kapuna vause ia.” Nau ghe nongola ghe ilou lao sio elo ale me ghe auliaala ta tamane.

13 Nau Laban ghe nongola va aloana ta Jekop emae sio, ghe aieluiluila tani laa soua. Ghe lotiela me ghe ngusueiniela me ghe laoainie sio elo ale, me Jekop ghe auliaala etana isaa akapa voto ghe lutula. 14 Vara Laban ghe uela etana va, “Koronnaaili io malataughu io me raeghi io.” Jekop ghe toka teeiela kateva ulena.

15 Laban ghe uela ta Jekop, “Aue ghaisa io ualoanna me aghi apolio etana tale uunguaam? Masina ta ararimangalighi io, io karika unim uungu tale lao.”

16 Laban natuna vause atolou ghalua, kateva mua ia ararina ateae ta Lia, me mala ngaliki vause ateva ararina ateae ta Resol. 17 Lia karika masi taataraane ta katoa taumattu me Resol ia tapakipakiena ia me masinaaili taataraane. 18 Jekop ghe aaielousiaa Resol, mausina avalua o me ghe uela ta Laban va, “Aue auungu ghaituae (7) ninamanama etam, arova io aue utau velueghi me alai mala ghauna arighi natuna vause ta Resol.”

19 Laban ghe uela va, “Nim masinaaili va aghi tau aatu etam me ta mene katoa ppae taita. Utoka teeieghi.” 20 Liuna avalua o Jekop euungu ghaituae ninamanama tani lai ta Resol. Nim isaa o nonginaaili nau karika oroi ta ngetana poli ghe aielousieinia.

21 Vara me Jekop ghe uela ta Laban, “Naughu aghe kapala me utau mae natum vause ateva, me aghi aloanna tani aso teeia.”

22 Liuna avalua o Laban ghe aimonomonosiaala nialailai eteva inananna me ghe kolo akapa taumattu ngatoa elome tale masaliki eteae. 23 Me nau elo alai eteva ghe mae sio, ghe ghaala natuna vause ateva ta Lia me ghe tauela ta Jekop, me ghe aso teeiela. 24 (Laban kapuna tau ngai nongononogo anna ateva vause ia ararina ateae ta Zilpa, ghe taue lao sio ta Lia va kapuna tau ngai uungu ia.)

25 Mene kateva elue talaua Jekop ghe totu saela me eghe tarala Lia ghe asoaso teeia. Jekop ghe lao sio ta Laban me ghe uela va, “Karika aghi aloanna saa llo ughe gheleila. Aghe uungula ghaituae ninamanama tani lai Resol, me ughe tau mae sio Lia. Vaalua ughe kameaghila?”

26 Laban ghe liula va, “Karika gheeleia kapumami namu ngatoa isaa o tani tau mala ghauna ateva vause elai ekasina me auena mua ateva. 27 Arova uruu tale uiki eteva tani anamisa nilai eteae tee Lia natughu, aue ami tau velu umene lai Resol tee. Liuna avalua me utani uungu etaghi ta mene ghaituae ninamanama.”

28 Me isaa o loo Jekop ghe tani ruula io uiki eteva tani anamisa, vara me Laban ghe taula Resol etana va vausenna ia. 29 Laban ghe tau lao sio Bila kapuna vause tau ngai nongonongo anna ia ta natuna vause ateva ta Resol va kapuna vause tau ngai nongonongo anna ia. 30 Jekop ghe mene aso teeila Resol, me namungaili aielousiaane ta Resol namuu ta Lia. Me ghe mene uungula ta Laban ghaituae ninamanama.

31 Nau Iaue ghe taatara va Lia karika Jekop ghe aielousieinia, ghe otila unna aikai ngaliki eteva, me Resol ghe kina ngerela. 32 Lia ghe kaaila me ghe molenala natuna taita arighi. Ghe asela Ruben me ghe malloeala, “Ia o arari eteae malloeana va Iaue ghe tarala va aghe alousiusi me ghe tau mae sio etaghi natughu taita arighi. Koti ia o taitanighi eteva aue aielousieinaghi.”

33 Lia ghe mene kaaila me ghe molenala aiaaghalua ateva natuna taita. Ghe uela, “Iaue ghe nongola va taitanighi eteva karika poi ghe aielousieingahi, liuna avalua ghe tau mae sio ia o natughu taita ateva. Ia avalua o aue akoloa Simion.”

34 Lia ghe mene kaaila me ghe molenala mene kateva natuna taita. Ghe uela va, “Ia oia aiaakotolu eteva taita, aghe alutuela ta taitanighi eteva. Ia o nau eteva ia aue roola tani aielousieinaghila. Liuna avalua o aghe asela ararina ateae tee taita arighi Livae.”

35 Eghe mene kaaila me ghe molenala natuna taita arighi. Ghe uela, “Ia oia nau eteva aue akaua Iaue. Liuna avalua o aghe asela ararina ateae Juda.” Vara me ghe ruula ta ghaa aliki.