1 Liuna avalua o Aisiki ghe kolola Jekop me ghe arangiseiela, me ghe uela etana va, “Urau mene lai teva vause nge Keinan. 2 Lao sio katengaata ePaddan Aram ta tanganuena kinam tamane ta Betuel. Ughaa vause ateva isaa ieka, tani elome tale natuna vause atoa Laban, kapuna taita ia kinam. 3 Me aue God sarasarakanaaili ia aue arangiseio, me aue ghelei ueem atoa la oroieili me aue eaoroiem lomosina ta aue am oroiannaaili. 4 Aue God etau aatu etam me tuvum atoa tuku kosa ateva ia ghe gheleila inangari nialokoi ta tuvum ta Abraham. Liuna avalua o va io aue kalum ia tuku kosa ateva, noninga ghaine utokatoka etana nonga va ativuu etoa.” 5 Vara me Aisiki ghe suula Jekop tani kasu me ghe lao sio ePaddan Aram ta Laban natuna ia Betuel, atala nge Aram ia, kapuna taita ia Rebeka ia o kinairarue ia Jekop me Isoo.

6 Isoo ghe nongola va Aisiki ghe arangisela Jekop me ghe sungiela tani lao ePaddan Aram tani ghaa teva vause isaa o ieka, me vara ghe arangiseiela ghe auliaala etana va, “Urau mene lai teva vause nge Keinan.” 7 Me Jekop ghe nongo usila tamana me kinna, me ghe lao sio ePaddan Aram. 8 Vara me Isoo ghe kilela va ghaisaata tamana ghe tam masimasiaala vause nge Keinan alua ghe laila. 9 Liuna avalua o Isoo ghe annala tani lai mene kateva vausenna, ia oia nau eteva ghe lao sio ta tamana tuena ta Ismael me ghe laila natuna vause ateva ta Mahalat, ia kapuna vause Nebaiot.

10 Jekop ghe tiuaala unna nikasu eteae eBesiba tani lao eHaran. 11 Nau ta ghe rekatala tale ia o tuku voto ateva eghe tam roola tani kasu tee lao, ta ghe voola poli sinaka ateva ghe suula. Ghe ghaala katiulu tana atu iokae, ghe atokaila tale pake uruna ateva me ghe aso siola tani asekanua. 12 Ghe asoasopoila isaa toko voto, ghe tarala aisaesae ateva ghe tiutiu tale kosa ateva aitaua tee epona etana tani ghaa epona liu, me ensolo atoa kapuna ila God laghe siosio me laghe saesae epona etana. 13 Isaa o epona etana Iaue ghe tiitingina me eue va, “Aghi Iaue, kapuna Goto ia tuvum ta Abraham me tamam ta Aisiki. Aue atau aatu me tuvum atoa ia o tuku kosa ateva uasoaso etana. 14 Ila tuvum atoa aue ila oroieili nongina au kosa ateva, me aue am toka see tale sinaka esuu me tale sinaka esae, tale not me tale saoto. Aue ararimangali ekapaaili etoa tale kosa ateva oia aue la ghaa niarangise ta ngetam. 15 Aue atoka aitaua teeio me aue aghaitarainio nongina ea ulao, me aue aoghieinio mae tale ia o tuku kosa ateva. Aue karika amene kasu vulio, lomosina aue aghelei saa llo aghe alokoila tani akoronna.”

16 Nau Jekop ghe totu saela tale unna niasekanua me ghe uela va, “Koronnaaili Iaue tani iaaili oio tale voto ateva me karika poi aghe kilela.” 17 Vara me Jekop ghe matautunaailila tani toka etana ia oia tuku voto ateva. Tani iaaili ona voto ateva God etokatoka etana, me ia oia salana ateva tani sso etana.

18 Elue talaua poopooa Jekop ghe ghaala atu etiulu ghe pappanukanainiela me eghe atoka akoro atinginaie saela, me ghe kao saela oeli epona etana nongina aiaavusuvusuena. 19 Jekop ghe asela ia o tuku voto ateva Betel, malloeana va, “God alena ia”. Tale ia o nau eteva, laghe asease ararina masaliki taatara tee kalakalangina ia eLuz.

20 Vara me Jekop ghe gheleila inangari nialokoi eteva, ghe uela va, “Arova God etoka aitaua teeieghi me eaitarainieghi me etaula inana me ghinnanighi, 21 me arova aue aoghi mae amasina kona tamaghi etokatoka, me aue Iaue aue kapughu Goto ia. 22 Me tale ia oia atu ghe totu esaela tale ia oia voto ateva aue alena ale nikkaua ia, me isaa akapa voto aue utau mae etaghi aue atau aatu aiasokolo.”