1 Nau Aisiki eghe tuvu ngalikila me matana karika ghe rooroo tani taatara, me ghe suula inangari va natuna namu ngateva taita ta Isoo tani mae taraia. Nau Isoo ghe rekatala Aisiki ghe uela, “Natughu?”

Isoo ghe liula, “Aghi toko.”

2 Aisiki ghe uela va “Unongo! Nga ghele tuvu ngalikila me karika aghi akilakila nau tale matemateaghi. 3 Ghaine oio ughaa unem ghinna aiariari, unem vunara me ulaa ari righi ghaata kkena. 4 Nau ta urekata, uaimonomonosiaa malatau ta nongina aloannaaghi, me aue atau aatu uneghi niarangise ateva me auena amate.”

5 Rebeka ghe nongonongo ta Aisiki ghe samasama tee natuna ta Isoo. Vara ghe ruula tani sama, Isoo ghe kasula tani ari ghaata kkena anna tamana. 6 Vara me Rebeka ghe kolola natuna taita ateva ta Jekop. Nau ghe rekatala ghe auliaala etana saa llo ghe nongola ta Aisiki ghe auliaala ta tuena, 7 “Tamam eghe auliaala ta Isoo tani aimonomonosiaa righi aloloaananiaane inana. Aisiki ghe annala tani tau lao unna niarangise ateva tale taataraane Iaue. 8 Natughu! Unongo usila saa llo aghi ghaine ngaghauliaa etam. 9 Ghoala me ughaa ghalua tale masi kiem mala ghauna mee tale koapa arighi. Utani suii emasina lua, aue aghaimonomonosiaala malatau nongina tama etani aloannaaili. 10 Vara me ughaa lao ta tamam tani nama me aue tau aatua unna niarangise ateva, me auena emate.”

11-12 Me Jekop ghe uela ta kinna va, “Vaalua arova tamaghi eposoaghi, ta viliki karika uuena nongina tueghi ta Isoo vilikina. Aue kila va aghi nim kamekame, me ia karika aue tau lao niarangise etaghi. Ta aue aulia ngaotu va aghi karika masina ieghi, me aue tau lao nikisokiso etaghi.”

13 Me kinna ghe uela va, “Urau mene matautu. Aue aghi aghaa nikisokiso tale saa llo aue ughelei. Saa llo ia eppooa teeio, aue ghelei teeieghi. Nim gheleila nongina aghi auliaa. Utau mae meemee alua etaghi.”

14 Vara me Jekop ghe ghoala me ghe ghaala mee alua. Ghe ssoa ngamae ta kinna me eghe aimonomonosiaala inana nongina tani aloanna Aisiki. 15 Me Rebeka ghe ghaala isaa o masi ghinnanina Isoo, ia natuna namu ngateva ghe asoaso aitaua teeia elo ale me ghe asaela ta Jekop. 16 Ghe asaela viliki mee atoa epona ta nimane me ghe taliaala emuli tale alona ateva. 17 Vara me ghe taula isaa o onose inana ghe aimonomonosiaala ta Jekop me kasina tana ouna verete tani laoa ta tamana.

18 Jekop ghe lao sio ta tamana me ghe uela va, “Tamaghi!”

“Aghi oia!” Aisiki ghe liula. “Io see, natughu?”

19 Jekop ghe liula va, “Isoo, natum mua ateva. Ngaghelei saa llo ukolomila. Totula me unama kasina tana malatau ghaata kkena, me utau mae niarangise ateva etaghi.”

20 Aisiki ghe kolomila natuna, “Vaalua mana marovaeata nonga upaelala, natughu?”

“Ta Iaue kapum Goto ia, etau mae niaisausi etaghi,” ghe uela.

21 Vara me Aisiki ghe uela ta Jekop, “Mae kalakalaa sio me aue aposoo, natughu. Aghanna tani kila va io koronna va natughu Isoo o karika.”

22 Jekop ghe lao tau sio ta tamana ta Aisiki. Me Aisiki ghe posoala me ghe uela va, “Lingi ngalom ateva nongonongoane va Jekop, me nimam nongina va nimane Esau.” 23 Aisiki karika eghe tara kila Jekop ta nimane va uuena nongina tuena ta Isoo, me ghe arangiseiela. 24 Auena ghe arangiseia, ghe mene kolomiela, “Tani io Isoo?”

Ghe liula va, “Ue, aghi.” 25 Vara me ghe uela va, “Natughu! Tau mae kasina teva tuku malatau ghaata kkena me anama, me aue atau aatu etam uneghi niarangise ateva.”

Ghe taula etana me ghe namala me ghe mene taula uaeni me ghe ropila. 26 Vara me tamana ta Aisiki ghe uela etana va, “Mae sio toko, natughu, me ungusueinaghi.”

27 Me ghe lao sio ta Aisiki me ghe ngusueiniela. Nau Aisiki ghe ngusula nai ghinnanina Jekop, ghe arangiseiela me ghe uela va,

30 Isoo ghe rekatala elo ale tani ari, emuli ta Aisiki ghe ruula tani sama me Jekop ghe ghoala eleka tale alena ale kandisi eteva tamana. 31 Ia tee ghe aimanomanosiela onose inana me ghe mae tani taula ta tamana. Vara me ghe uela etana va, “Tamaghi! Totula, me unama malatau ghaata kkena, me utau mae etaghi unem niarangise ateva.”

32 Tamana ta Aisiki ghe kolomiela, “Io see?”

Ghe liula, “Ia o natum mua ateva Isoo.”

33 Aisiki ghe moiela me ghe retela, me ghe uela va, “Me see ia maea akasina sio etaghi? Ia tee emaea asio malatau, vara aghe ruula tani nama me aghe akorokoronganaili niarangise aue etoka etana.”

34 Nau Isoo ghe nongola inangarina tamana, ghe sessaiela me ghe ngala namungailiila, me ghe uela va, “Tamaghi, auliaa teela unem niarangise etaghi!”

35 Me Aisiki ghe liula, “Karika nga aghi roola, nengam emae tani kameaghi me ie ainaola unem niarangise.”

36 Vara me Isoo ghe uela va, “Ia oia aiaaghaluena ateva nau eghe kameaghila. Karika nisoghia ta ararina ateae ta Jekop, emua ghe ghaala uneghi ninamu ngateae. Ghaine emene ghaala God kanna niarangise.” Vara me Isoo ghe kolomila, “Karika righi etokala tani tau mae etaghi?”

37 Aisiki ghe liula ta Isoo, “Aghi ghe gheleila va nengam aue muemueainio, me ila akapa natuna atoa tuvuira atoa aue la uungu etana, tee me God aue taula oroieili raisi me ue ngai tani ghelei uaeni. Karika ngakilala va sa ateva aghelei etam ghaine, natughu.”

38 Isoo ghe uela ta tamana, “Nim righi ienaa niarangise tamaghi? Urangise teeieghi tamaghi.” Vara me Isoo ie ghe pii enamuula.

39 Tamana ta Aisiki ghe liula va,

41 Emulina tale isaa o voto Isoo ghe mene sessaia tee Jekop poli ghe kamekamela, me ghe ghelei kateva ninanna tani uvi nengane, ta aue karika righi masauna arighi tamana emate. Me nau taumattu ngatoa aue ila ruu tani ngala ta ngetana, aue uvi emate nengane ta Jekop.

42 Katoa taumattu laghe nongola va natuna mua ta Isoo eanna tani uvi emate nengane ta Jekop, me ila ghe auliaala ta Rebeka, me ghe koloa Jekop me ghe auliaala, “Tuem eanna tani liu me euvio. 43 Liuna avalua o me ughelei saa llo aghi auliaa etam. Tueghi taita ateva etokatoka elome tale masaliki eteae eHaran. Ulao ie kae arovaeata me ia aue aitarainio. 44 Ulaa toka tee Laban lomosena ta Isoo eruu tani sessaia etam. 45 Nau ta tuem aue tani sio euu, aghi aue asuula inangari. Aue etam va oghi mae ia. Ulao parasi. Aghi tam aloanna tani velu ekapaiemalua, natughu elua tale ia oia nau eteva.”

46 Vara me Rebeka elao ta Aisiki tani sama teeia. “Aghi karika aghaloanna ia o vauseni aHit alua, ia o Isoo ghe laila etana. La gheleieghi amaamangoo tani toka. Aghi tam aloanna va Jekop eghaa teva vause ativuu va evausenna. Aue anim aimenemeneghi ainaghi tani mate, me tani tara ia elai teva aHit vause.”