1 Mene kateva maloo ghe tokala elome tale masaliki eteae eKeinan. Ia oia karika nongina nau ta Abraham ghe tokatoka, ta ouna ia oia lo ateva nimaloo. Ta mausina Aisiki ghe siola tani pae inana eGerar nongina Abimelek kingi ta aPilistia atoa. 2 Iaue ghe otuotu tee Aisiki me ghe uela va, “Urau mene sio eIjip, utoka tale kosa ateva aghi aue aghapsungainia etam. 3 Utoka tau mua oia tale tuku kosa ateva, me aue atoka aitaua teeio, me aue agharangiseio. Ta poli ta io me tuvum atoa aue atau aatu isaa oia kosa, me aue aghelei sa llo aghe auliaala tale inangari nialokoi ta tamam ta Abraham. 4 Aue aghelei tuvum atoa ila oroieili nongina katto atoa eunaakookoo. Me aue atau aatu isaa oia kosa, me mausiio ila natum atoa tuvuira atoa ta taumattu tale kosa ateva aue ila ghaa niarangise, 5 poli Abraham ghe nongo usilainaghila me ghe gheleila voto akapaaili aghe auliaala etana.” 6 Liuna avalua o me Aisiki ghe tokala eGerar.

7 Kateva nau, nau Aisiki ghe tokatoka eGerar, katoa tana taumattu laghe mae sio etana me ila ghe kookolomi Rebeka va, “Saam ta Rebeka?” Ghe uela va, “Ia kapughu vause ia,” poli ghe maamatautu tani auliaa va vausenna ia. Ie ghe anna va, “Ila oia taumattu tale ia oia voto ateva aue ila uvieghi mausi Rebeka,” poli masi taataraane vausenna ateva.

8 Kateva nau ange lao sio, Aisiki ghe tokala aluse nau eGerar, Abimelek ia kingi aPalistia ghe taatara tala uindoa ngateae me ghe soghila tani tara Aisiki me Rebeka lalu ghe ailloti. 9 Ia arau nau eteva Abimelek ghe suula kapuna tau ngai uungu etoa tani kolo Aisiki, me ghe uela va, “Ue, ia vausenim ia! Me vaalua me ughe uela va kapum vause ia?”

Aisiki ghe liula ta ngetana, “Poli aghe anna va aue kateva etaimim uvieghi me eghaaia.”

10 Vara me Abimelek ghe uela va, “Ughe rau mene ghelei avalua oia? Arova toa laghe aso aitaua tee vausenim ateva, aue God ie ghe nim sessa ia etaimami tale saa llo ughe gheleila.”

11 Emulina Abimelek ghe aulia ngakorokorongana ta ila akapa taumattu ngatoa, “Kotiva see eghelei tee itoko taumattu ngateva o tee vausenna ateva, aue etoka tale nimate.”

12 Aisiki ghe pasala umana utana tale ia o kosa ateva, me tale ia o ninamanama ateae ghe mukela kateva ai (100) oroiaane ghe laula nongina llo ghe pasa akasinala, ta poli God ghe arangiseiela. 13 Aisiki ghe tau peipeinala, me peina atoa laghe oroienaailila. 14 Oroienaaili kiena vulumakao me sipsip me meemee atoa me tani kapuna tau ngai uungu etoa. Eghe tau peipeinala, aPilistia atoa laghe ananna saasakiaa teeiela. 15 Me isaa o ateo kaikai tamana kapuna tau ngai uungu etoa laghe kaiila, nau tamana maulue ia, aPilistia atoa ila ghe ghelei arungainala, me laghe rovila tale kosa.

16 Tale airuuruu Abimelek ghe auliaala ta Aisiki, “Ughaa kapum taumattu ngatoa me am kasu emasalika teemami ta ngam ghe sarasarakanaaili em etaimami.” 17 Aisiki ghe kasu vulilala masaliki taatara ateae, me ghe siola tani toka tale malale ateva eGerar, ia ghe toka taula o. 18 Aisiki ghe mene kaila ateo kaikai isaa o tamana ghe kaila. Nau aPilistia atoa laghe rovila ta nau emuli Abraham ghe mate. Aisiki ghe mene asela arari ateo kaikai tamana ghe taula etana.

19 Kateva nau, nau kapuna tau ngai uungu etoa ila ghe mene kaikai ateo kaikai eteae euu tale malale ateva eGerar, me ila ghe pae otula manu maraange tale ateo kaikai eteae ghe ilou. 20 Karika masauna arighi tau ngai toi ghaata kkena nge Gerar laghe mae sio me laghe tiuaala tani aissakeana tee Aisiki kapuna atoa tani tau ngai toi ghaata kkena atoa va see kanna ia o ateo kaikai eteae. Mausina me Aisiki ghe kolola ateo kaikai ateae Esek, malloeana “Niaissakeana”. 21 Emulina Aisiki kapuna tau ngai uungu etoa laghe mene kaila kateae ateo kaikai. Vara me laghe mene asakeana tee, ia avalua o Aisiki ghe asela ia o ateo kaikai ateae Sitna, malloeana “Gheeleiaaira tau ngai ssaira atoa”. 22 Aisiki ghe mene kasu emasaula, ghe mene kaila kateva ateo kaikai, me ia o nau eteva, karika teva ghe ghelei rungainiela. Ghe asela eRehobot, malloeana “Malaungena”, me ghe uela va, “Ghaine Iaue etau mae etaita paka voto ateva va ita toka etana.”

23 Ghe tokatoka isaa oia eRehobot, vara me ghe saela eBesiba. 24 Tale voo ngateva o Iaue ghe otuotu teeila me ghe uela va, “Aghi kapuna Goto ia tamam ta Abraham. Urau mene matautu, poli aghi atokatoka aitaua teeio. Aue agharangiseio me aue aghelei tuvum atoa la oroi, poli kalughu inangari nialokoi ta kapughu tau ngai nongonongo anna ta Abraham.”

25 Aisiki ghe atulula liu ngai ghelei niaiaavusuvusuena ateva, me ghe kauaala Iaue. Me ghe atulula alena ale kandisi eteva me kapuna tau ngai nongonongo anna atoa laghe mene tiuaala tani kai mene kateva tana ateo kaikai.

26 Vara Abimelek ghe mae sio eGerar tani sou Aisiki eBesiba tee Ahusat kapuna aiaaghalue ia tani uungu etana me Pikol ia namuu ta kapuna tau ngai uvii etoa. 27 Aisiki ghe kolomila, “Vaalua umae sio etaghi? Am ghe ssa teeghila, nongina va tau ngai ssaimim ateva, me am ghe suungi velueghila tale masalikimim ateae.”

28 Ila ghe uela va, “Ami ghe tara kilaailila va Iaue etokatoka teeio. Ami aloanna tani ghelei teva niaippooa ngaitaua, me aue luei elome ta ngetaita. Ita ghelei teva inangari nialokoi aitaua. 29 Ami nau etoa ami ghe ghelei masina etam nau ta ughe maemae teeiemami. Ami ghe tam kisokisoio tale kasina salana me ughe kasula tale luei. Liuna avalua o ami kookolomio tani ghelei amasinaiemami. Tale nongina salana ateva me karika umene kisoiemami me ghaine io Iaue earangiseio.”

30 Aisiki ghe kolomila kapuna tau ngai uungu etoa tani aimonomonosiaa tani namanama aitaua. Vara me ia me kapuna ativuu etoa laghe namanamala me laghe ropila. 31 Mene kateva elue talaua taumattu ngatoa laghe aulia ngakoronna va karika ila mene aisessai tee kateva kateva etaira. Vara me Aisiki ghe akorovailala me taumattu kotolu laghe kasu vuliela tale luei.

32 Va io nau eteva Aisiki kapuna tau ngai uungu etoa ila ghe oghila me ila ghe auliaa va ila ghe paela manu euu tale ateo kaikai eteae ila ghe kaiela. 33 Ghe asela ateo kaikai eteae va Besiba, malloeana “Inangari korokorongana”. Isaa avalua o me laghe asela masaliki taatara ateae eBesiba ghe ghaala ararina ateae.

34 Nau Isoo ghe ghaatingauluae anna ninamanama ghe laila vause aHit alua, ta Judit natuna vause ia Beeri, me Basemat natuna vause ia Elon. 35 Ilalua oia tani liue nighelei nialousiusi ta Aisiki me Rebeka.