1 Abraham ghe mene laila kateva tana vause, ararina ateae ta Ketura. 2 Ia oia vause ateva ghe alutula ghaonomo taita, ta Zimran, Joksan, Medan, Midian, Isbak me Sua. 3 Joksan tamairarue ia Seba me Dedan, me Dedan tuvuna atoa ta aAsur atoa me aLetus atoa me aLeum atoa. 4 Me natuna atoa Midian ta Epah, Eper, Hanok, Abida me Eldaah. Isaa akapa oia taumattu tuvuna ila Ketura.

5 Abraham ie ghe taula peina akapa ta natuna ta Aisiki. 6 Me nau ta ie ghe tani tokatoka ghe nim tautaula voto ta natuna taita atoa tale aiaaghalua atoa vausenna, me ghe sungisungi vella va karika la mene toka tee Aisiki, ta ila la toka tale pai sinaka esae. 7 Abraham anna ninamanama kateva ai me ghaitungaulu ghalimae (175) me ghe matela. 8 Abraham ghe matela nau ghe tuvu ngaliki. Abraham oroieili anna ninamanama me ghe matela nongina kapuna atoa laghe matela. 9-10 Natuna alua Abraham ta Aisiki me Ismael lalu ghe kaiaala Abraham tale lienga ateae elome tale kosa ateva eMakpela, kalakalangina eMamre. Ia o lienga ateae Abraham ghe poliela ta Epron aHit ia natuna Zoar. Ila ghe kaiaala Abraham nongina laghe kaiaala Seraa. 11 Nau ta Abraham ghe matela, God ghe arangisela natuna ta Aisiki, me eghe tokala kalakalaa tale ateo vubbuai ngateae oia laghe aseala va Lahai Roi.

12 Kiukiuira kapuna atoa Ismael. Abraham natuna ta Ismael, kinna ta Hagar, kapuna tau ngai uungu ia Seraa atala nge Ijip ia. 13 Isaa toko arariira natuna atoa Ismael laghe aietokainilala tani piti tale uru ngai tale lutulutuaaira. Mua ateva ta Nebaiot, Keda, Adbeel, Mibsam, 14 Misma, Duma, Massa, 15 Hadad, Tema, Jetur, Napisa, me Kedema. 16 Isaa o natuna Ismael, ila ghe muumuela kasangaulu ghalua (12) ararimangali tale taumattu, kateva kateva laghe tokatoka tale masalikina ateae. 17 Ismael ghe tokala kateva ai me kotolungaulu ghaituae (137) ninamanama, vara me ghe matela nongina kapuna atoa laghe matela. 18 Ismael tuvuna atoa laghe laa tani toka tale kosa ateva kasapani nge Havila me Sua, kalakalaa tale ailongota ngateva eIjip, tale salana ateva elaolao eAssur, me karika ila ghe aiemasia.

19 Kiukiuna toko Abraham natuna ta Aisiki. Abraham ghe tamanaiela Aisiki. 20 Nau Aisiki ghe ghaatingaluae anna ninamanama ghe laila ta Rebeka, ia tamana ta Betuel, ia atala nge Aram ia. Ghe tokatoka elome tale kosa nge Padan Aram. Rebeka tee tuena taita ateva ararina ateae ta Laban.

21 Rebeka karika ghe rooroo tani ghaa aliki poli kina ngere ia. Mausina Aisiki ghe looloo sae ta Iaue tani sausia. Iaue ghe liula kanna nilooloo sae me vausenna ateva ta Rebeka ghe kaaila. 22 Natu aliki elua, lalu ghe aisaraka elome ta kovana Rebeka, me ghe uela va, “Vaavaalua isaa o voto elutulutu etaghi?” Liuna avalua o me ghe kolomila Iaue.

23 Me Iaue ghe uela etana va, “Unongo, ghalua natum taita ilalua elome etam. Lalu pinosa sae aue ghauna ateva aue muumua namu ngateva, taita alua oia aue ilalu tee aue lalu ghaa aliki me ilalu tee aue ilalu tuvutuvuena. Me aue ilalu ssa tee kasina tana taumattu me tuvuna atoa ghauna ateva taita aue ila sarasarakanaaili.”

24 Nau Rebeka ghe molenala, ghe molenala natuna palua alua. 25 Mua ateva taita ghe lutu aitaua teela uu nguruna raeraena me vilikina uuena akapa nongina aiaasae ateva ghelei ia tale uu ghaata kkena. Ila ghe asela ararina ateae ta Isoo.* Tale inangari nge Hibru, Isoo aseaseaane nongina uuena. 26 Vara me nengana ghe mene lutula, ghe posoposo korokorongana tale kunikuni kkena ateva Isoo. O ila ghe kolola Jekop† Tale inangari nge Hibru, Jekop malloeana va eposoposo atoka kunikuni kkena, me malloeana va ekamekame. etana. Aisiki ange ghaonomongauluae ninamanama nau Rebeka ghe alutula palua alua.

27 Taita palua alua lalu ghe pinosa saela. Ta Isoo eghe masimasiaa tani toka elome tale varanga me ta aipolina ghe alomasaangala tani ari ueli ghaata kkena atoa. Nau ta Jekop ghe maamatua atoka ghe nim tokatoka elo ale. 28 Poli Isoo ghe maemaea malatau ghaata kkena, ia avalua o me Aisiki ghe aielousiaa Isoo, me Rebeka ghe aielousiaa Jekop.

29 Kateva nau Jekop ghe toka tuutuu supu eteva raeraeana ia me Isoo ghe rekata atingina mae sio me ghe maloo saasakiaala. 30 Me ghe uela ta Jekop va, “Ngekapala moromoroghu. Marovaeata aghi anna tani nama righi inana isaa ona raeraeana utuutuu.” (Liuna avalua o me arari laghe kolola Idom‡ Tale inangari nge Hibru, Idom malloeana va raeraeana. etana.)

31 Jekop ghe liula va, “Emua akasina utau mae unem nimuumua ateae tale niunem nilutu akasina ateva.”

32 Isoo ghe uela va, “Tarala, anga matemate, saa maamasina nilutu ekasina ateae? Karika aue rooroo tani sausieghi me arova amate.”

33 Me Jekop ghe uela va, “Emua akasina uauliaa inangari nialokoi etaghi va utau mae etaghi tani muumua va aghi mua ieghi.” Isoo ghe auliaala inangari nialokoi eteva ta Jekop, va ia emuamueinilalua.

34 Vara me Jekop ghe tau lao sio ta Isoo kasina verete me kasina supu. Ghe namanamala me ghe ropila me ghe totu saela me ghe kasula.

Ia avalua o Isoo karika ghe annala ninamu ngateae.