1 Abraham ghe tuvu ngalikieilila me Iaue eghe arangiseiela tale isaa akapa voto eghe ghelei. 2 Kateva nau Abraham ghe uela ta kapuna tau ngai nongonongo anna ateva eaitara ngakapaaili voto elome tanganuena va, “Ualokoi sso nimam elome tale kasapani aau kkeghi. 3 Aghaloanna va utani aulia ngakoronna sae ta Iaue, God ia ghe gheleila kosa ateva me epona liu, va urau mene ghaa teva vausenna natughu tale vauseni nge aKeinan atoa, nongina atokatoka. 4 Uoghi lao nongina aghi aghe tokatoka, me ulaa pae teva vausenna natughu ta Aisiki elome ta mangalighi etoa.”

5 Vara me tau ngai nongonongo anna ateva ghe kolomiela va “Arova vause ateva karika ealoanna tani mae aimuli teeieghi tani mae oia, erooroo va akolo Aisiki emene laa toka tale voto ateva ughe lutula etana?”

6 Abraham ghe liula, “Karika! Urau mene ghaa oghi lao natughu. 7 Ta Iaue God epona liu ia, eghe auliaala etaghi tani kasu vulila kapughu etoa me mangalighi etoa me kosaaghi eteva. God eghe auliaala tale inangari nialokoi va aue tau ta tuvughu etoa ia oia kosa ateva, me aue esuu emuamua kapuna ensolo ateva tani sausio tani ghaa vausenna ateva natughu okae. 8 Arova vause ateva erati tani oghi eitaua teeio, aue usaanga tale niaulia ngakoronna sae me saa llo voto ailutua. Urau mene ghaa oghi natughu va elaa toka ie kae.” 9 Vara me tau ngai nongonongo anna ateva ghe atokala nimane tale kasapani aau kkena Abraham me ghe aulia ngakoronna sae tani ghelei saa llo Abraham vauna ia ghe auliaala tani ghelei.

10 Tau ngai nongonongo anna ateva ghe aimonomonosiaala kasangaulu kiena kamolo Abraham tale nikasu eteae. Isaa oio kamolo ila ghe saula oroieili masi voto nim kanna Abraham, me ghe tiuaala tani lao tale pai kativilau eAram tale ateo aluae. Vara me ghe rekatala tale masaliki eteae Naoo ghe tokatoka etana. 11 Nau ta ghe kasula tale aluse nikasu, me ila ghe rekatala kalakalaa tale masaliki eteae, ghe tokala tale ateo kaikai eteae, kona ghe tau vella kamolo atoa tani ainoane. Ghe laa ghaa elo alai nauira vause atoa tani laa ghaku manu.

12 Vara me ghe looloo saela, “O Iaue, vaughu eteva ta Abraham kapuna Goto ia, umasimasi tani apasunga aielousiam ta vaughu eteva ta Abraham. Usausieghi tani pae teva vausenna natuna ta Aisiki. 13 Tarala, atiitingina akalakalaa tale pai kativilau tale ateo kaikai eteae, me aliki vause atoa tale masaliki taatara ngateae ngila ghoa tani aku manu. 14 Me aue akolomi teva vause tani kao righi manu tale unna aikaai manu va aropi. Arova etau mae etaghi tani ropi me earopiropi kamolo atoa tee, aue akila va ia oia vause ateva angu suuiela va vausenna ia Aisiki. Ia oia salana atikirighi aghi aroo tani kila va uapasunga aisausiam ta vaughu eteva.”

15 Nau tau ngai nongonongo anna ateva, karika ie ghe ruu tani looloo sae, me Rebeka ghe kupi ghoa mae tale masaliki taatara ateae ghe sausau aikaai manu ta pappane. Ia natuna vause ia Betuel, natuna taita ia Milika, vausenna ia Naoo, tuena ta Abraham. 16 Rebeka masinaaili taataraane, aliki vause ia, karika ghe aso tee poi righi taita. Ia ghe siola tale ateo kaikai ateae tani akuu, me eghe mene oghi sae mae.

17 Abraham kapuna tau ngai nongonongo anna ateva ghe aieluiluila tani laa soua me ghe kolomia, “Umasimasi, utau mae me aropi tale aikaai manu usausaua?”

18 Eghe liula va, “Ue, vaughu. Aue uropi.” Me arovaea ta ghe atoka siola aikaai manu eteva ta nimane me ghe taula tani ropi.

19 Nau ta ghe ruula tani ropi, vause ateva ghe uela va, “Aghi aue ataula tee manu ta kiem kamolo atoa lomosi ta aue ila ruu tani ropi.” 20 Me arovaea ta ghe kao amatila unna aikaai manu eteva tale airopiropiira ateva ghaata kkena atoa. Eghe mene ilou lao sio tale ateo kaikai eteae tani mene aku tani aropiropi kamolo akapa atoa. 21 Tau ngai nongonongo anna ateva, karika poi ghe samasama, ie ghe nim taataraia, me ghe nim annaa va arova Iaue eghele ghelei unna nikasu eteae ghele masina.

22 Nau ta kamolo atoa ila ghe ruula tani ropi, tau ngai nongonongo anna ateva ghe kapela ringi gol ateva tani avukalaia ta ngusunguna Rebeka, maamataniaane erooroo ghalima gram, me tee ghalua gol vurra, maamataniaairarua erooroo kateva ai gram, tani atoka ta nimane. 23 Vara me ghe kolomila va “See ia tamam? Uauliaa etaghi, vaalua tiulu aiasoaso erooroo va ami me kapughu etoa ami aso etana?”

24 Rebeka ghe liula, “Tamaghi ta Betuel me tuvughu elua ta Naoo me Milika. 25 Ue, aiasoaso ateva rooroona ia tani toka aitaua teeiemami, me aiasoasoira kamolo atoa me oroieili inana aue ila nama.”

26 Tau ngai nongonongo anna ateva ghe suuia siola me ghe kauaala Iaue. 27 Ghe uela va, “Atautau sae Iaue, kapuna Goto ateva vaughu eteva Abraham. Eapasunga oroieili maamasinaane me etani ghelei roorooa voto ta vaughu eteva. Ughe kasueinaghi lao sio ta mangalina atoa vaughu eteva.”

28 Aliki vause ateva ghe ilou lao sio tanganuena me ghe auliaa ta kinna ararimangalina atoa tale saa voto ghe lutula. 29 Rebeka kapuna taita ateva ta Laban, ia tee ghe tokatoka, eghe iloula tani sou taumattu ngateva tale ateo kaikai eteae. 30 Nau eteva ghe tarala ringi eteva ta ngusunguna kapuna vause ateva me vurra alua tani nimane aluelange, me ghe nongola sa ateva taumattu ngateva ghe auliania ta Rebeka, me ghe ilou ghoala eleka tale ateo kaikai eteae, nau ghe rekatala me ghe taraiela ghe tiitingina tee kamolo atoa kalakalaa kona ateo kaikai eteae. 31 “Mae sio! Iaue ghe arangiseiola,” ghe uela. “Vaalua me utiitingina avalua oio? Ngaaimonomonosiaala ale ateva me voto kona kiem kamolo atoa ila aso.”

32 Me Abraham kapuna tau ngai nongonongo anna ateva ghe ssola tale ale ateva. Nau ghe rekatala Laban kapuna atoa tau ngai nongonongo anna laghe kapela voto tale kamolo atoa. Ila ghe taula aiasoaso me inana ta kamolo atoa tani nama me manu tani pora kekeira Abraham kapuna tau ngai nongonongo anna ateva me kapuna atoa. 33 Vara me ila ghe aimonomonosiaala inana ta kapuna tau ngai nongonongo anna ateva Abraham me ghe uela va, “Karika aue anamanama lomosina ta atani auliaa etaimim va mausi saa aghe mae sio oia.”

Laban ghe uela etana va, “Auliaala etaimami.”

34 Me ghe uela va, “Aghi kapuna tau ngai nongonongo anna ieghi Abraham. 35 Iaue arangiseane namungaili ta vaughu eteva ghe tau peipeinala, ghe taula etana sipsip me vulumakao, silva me golo, me taita me vause tau ngai nongonongo anna ila, kamolo me donki etoa. 36 Kapughu vau eteva vausenna ateva ta Seraa ghe alutula taita ateva nau ta ghe tuvu ngalikila tale ninamanama me Abraham ghe taula isaa akapa peina ta natuna. 37 Me vaughu eteva ghe uela va aghelei niaulia ngakoronna elao etana va, ‘Karika umene ghaa teva vause tale ia oia kosa ateva eKeinan. 38 Utara teva vausenna natughu ta kapughu etoa tamaghi me ararimangalighi etoa.’

39 “Me aghe kolomila, ‘Vaughu eteva, vaalua arova vause ateva karika aue rooroo tani oghi aitaua teeieghi?’

40 “Me Abraham ghe uela va, ‘Iaue, nau ekapa atoa aghe nongonongo usilainia, aue suu kapuna ensolo ateva aitaua teeio me aue ghelei unem nikasu eteae aue masina. Liuna avalua o aue ughaa teva vausenna natughu elome tale ararimangalighi etoa me ta kapughu etoa tamaghi. 41 Arova karika la mae aitaua teeio tale nannaam tani tau aatu vause ateva, karika umene anna ta aue usaanga tale inangari korokorongana aghanna ughe gheleila etaghi.’

42 “Nau arekatala tale ateo kaikai eteae ghaine, aghe looloo saela va, ‘O Iaue, vaughu eteva ta Abraham, kapuna Goto io, arova emasina etam ughelei ia oia nikasu eteae emasina. 43 Tarala, atiitingina akalakalaa tale pai kativilau tale ateo kaikai eteae, me arova teva aliki vause eghoa tani aku manu, me akolimia tani tau mae righi manu me aropi tale unna aikaai manu eteva, 44 me arova eue va, “Ropila! Me aue aghaa manu tani aropiropi tee kiem kamolo atoa,” aue ia o lo ateva Iaue ughe suiila va vausenna ia natuna taita ateva vaughu eteva.’

45 “Nau ta aghe looloo sae ta nannaaghi, Rebeka ghe ghoa mae eleka tee aikaai manu eteva epona tale pappane ateva, eghe siola tale ateo kaikai eteae tani aku manu, me aghe uela etana va, ‘Umasimasi! Utau mae me aropi.’

46 “Me arovaeaata ghe atoka siola aikaai manu ta pappane ateva me ghe uela va, ‘Ropila, me aue ataula manu tee ta kiem kamolo atoa.’ Nau ta aghe ruula tani ropi ghe taula manu ta kamolo atoa tani ropi.

47 “Vara me aghe kolomila va, ‘See ia tamam?’

“Ghe liula va, ‘Tamaghi ta Betuel natuna taita ia Naoo me vausenna ateva ta Milika.’

“Aghe atokala ringi eteva ta ngusunguna me aghe sikilala vurra alua ta nimane aluengale. 48 Vara me aghe suia siola tani kaua Vau eteva, me aghe tau saela ararina ateae Iaue, kapuna Goto ateva vaughu eteva Abraham. Aghe kaili emasinala etana, poli ghe katulainaghi lao sio tale koronna ateva salana. Ghe katulainaghi lao sio tanganue nengana vaughu eteva, me alaa kolomi teva tuvuna vause va evausenna ia natuna ateva vaughu eteva. 49 Ghaine arova am ghele apasunga maamasinaaimim ta vaughu eteva, am auliaa etaghi. Arova karika, am auliaa etaghi me amene lao ppae.”

50 Laban me Betuel lalu ghe liula, “Isaa oia voto kanna Iaue. Karika ami rooroo tani mene auliaa righi voto. 51 Ia toko Rebeka. Ughaa oghia va evausenna ateva kapum vau eteva natuna taita ateva, nongina Iaue ghe ghelei emasalikala.”

52 Nau Abraham kapuna tau ngai nongonongo anna ateva ghe nongola saa voto laghe auliaala ghe suia siola tale kosa tani kaili emasina ta Iaue. 53 Vara me tau ngai nongonongo anna ateva ghe otila aikakkaai me ghe ghaala kasina aimolumolu silva me golo, me ghinna me ghe taula ta Rebeka. Ghe taula tee masi voto namuu aipolina ta kapuna taita ateva Rebeka, me tee kinna Rebeka. 54 Abraham kapuna tau ngai nongonongo anna ateva me mene katoa laghe mae aitaua teeiela laghe namanamala me laghe ropila me laghe asekanuela.

Nau ta laghe totula elue talaua, Abraham kapuna tau ngai nongonongo anna ateva ghe kolomila Rebeka kapuna taita ateva me kinna ateva va, “Am tau veluemamila ghaine tani oghi lao ta vaughu eteva.”

55 Vara me kapuna taita ateva me kinna lalu ghe liula va, “Utau velu vause ateva emene toka teeiemami arova mene kasangaulu nau me auena evira usio.”

56 Me ghe uela va, “Karika am mene ghelei va atoka liu, ta poli Iaue ghe gheleila nikasu eteae oia ghe tani masinala, am tau velueghila tani oghi lao ta vaughu eteva.”

57 Me lalu ghe uela va, “Aue ita kolomi vause ateva saa llo ealoanna tani ghelei.” 58 Liuna avalua o ila ghe kolola Rebeka me ila ghe kolomiela va, “Uanna tani lao aitaua tee ie toko taumattu ngateva ghaine?”

Me ghe uela va, “Ue, aghi aimonomonosiaa tani kasu.”

59 Vara me laghe tau vella kapuira vause ateva ta Rebeka, aitaua tee kapuna vause ateva ghe aitoieinia me Abraham kapuna tau ngai nongonongo anna ateva tee me kapuna taita atoa. 60 Auena ghe kasu vulila, tamana, kinna me kapuna taita ateva me mene katoa kapuna ila ghe auliaala isaa toko inangari niarangise ta Rebeka,

61 Vara me Rebeka me kapuna tau ngai uungu etoa vause ila laghe aimonomonosiaa me laghe saesaela epona tale pouu kamolo atoa, me ila ghe oghi lao aitaua tee taumattu ngateva. Ia avalua o me kapuna tau ngai nongonongo anna ateva Abraham ghe ghaala Rebeka me ghe kasula.

62 Tale isaa o nau Aisiki ghe kasula ateo vubbua ngateae oia laghe aseala va Lahai Roi me ghe laa tani toka elome eNegeb. 63 Kateva nau, ta pai ngelo alai eteva, ghe ghoala tani taatara see eleka, vara ghe taatara saela me ghe tarala kamolo atoa laghe maemae etana. 64 Nau Rebeka ghe tarala Aisiki ghe kkure siola tale unna ateva kamolo. 65 Me ghe kolomila, “See ia okae emaemae tani souita?”

Tau ngai nongonongo anna ateva ghe liula va, “Aisiki okae, vaughu ia.” Vara me ghe ghaala unna tuku kalio ateva me ghe akoula matana.

66 Vara me tau ngai nongonongo anna ateva ghe auliaala ta Aisiki voto akapa ghe gheleila tale unna nikasu eteae. 67 Me Aisiki ghe ghaala Rebeka, ghe ssoainiela elome tale ale kandis eteva, alena ia kinna ta Seraa, me Aisiki ghe laila ta Rebeka. Ghe vausennaiela me ghe aielousiangailiela. Aisiki ghe alousiusi tale isaa to nau kinna ghe matela. Nau ta ghe ghaala Rebeka va vausenna ia ghe mene masimasila.