1 Seraa ghe tokala kateva ai me ghaluengaulu ghaituae (127) anna ninamanama. 2 Ghe matela eKiriat Aba, kateae ararina ta eIbron, ia tale kosa ateva eKeinan, me Abraham ghe ssola elome tale ale avo ateva tani ngalaia.

3 Vara me Abraham ghe ruula tani alousiusi me ghe totu saela kona vausenna ateva ghe asoasoa me ghe lao sio tani sama tee aHit atoa, ghe uela va, 4 “Aghi ativuu ieghi, karika righi kosaghi oio. Am tau mae teva tuku kosa me akkaia vausenighi eteva.”

5 AHit atoa laghe liula, 6 “Vaumami eteva, unongoamami, io korokorongana io elome etaimami oia, urooroo tani kaia vausenim ateva ta teva masi uneimami liu niaikkaia oio, tale aloannaam. Karika teva aue rati tani tau aatu uneira lienga niaikkaia.”

7 Vara Abraham ghe totula me ghe tturru siola ta taumattu tale ia oia voto ateva, 8 me ghe uela etaira va, “Marova am aloannaaili tani tau velueghi va akaia vausenighi eteva oia, am nongo etaghi, me teva etaimim elaa kolomi Epron natuna ia Zoa elaa kolomi tau mae 9 va etau mae lienga niaikkaia ngateae eMakpela. Lienganina ia Epron easoaso elongaala tale tuku kosa ateva, aue apolia tale saa aipolipoi la asea va apoli. Aue apolia me ila akapa aue la tara ia o tuku kosa ateva, aue uneira lienga niaikkaia ia kapughu etoa.”

10 Epron aHit ia eghe tokatoka elome ta kapuna taumattu ngatoa me eghe nongonongo saa llo Abraham eghe auliaa. Me eghe liula ta Abraham va ila akapa ngila nongola, see ila lo atoa laghe kupi ssola tale atamana nivelu eitaua ngateae tale masaliki taatara ngateae. 11 “Karika, vaughu eteva!” Epron ghe uela. “Unongo! Etaghi aghi nim tau aatu etam ia oia tuku kosa me lienga niaikkaia ngateae elome etaira. Aghi tautau aatu ta mataira me nongonongoaira kapughu namu ngatoa, va ukaia vausenim ateva.”

12 Abraham ghe mene tturru siola ta taumattu tale ia oia voto ateva, 13 me ghe uela tale matavanga ta Epron va, “Aue arooroo tani poli ia oia tuku kosa ateva tale saa aipolina ualoanna. Ughaala aipolina tuku kosa ateva me aue akaia vausenighi eteva.”

14 Epron ghe liula ta Abraham, 15 “Unongo etaghi, kapughu vau eteva, tuku kosa ateva aipolina eghaata ai (400) silva, me sa ateva aue elutu etaitalua? Laa kaia vausenim ateva.”

16 Abraham ghe asokoila va aue epoli aipolipoli eteva ia o Epron ghe aulieiniela, maamataaniaane erooroo ghaata ai silva, maamataniaane ila ghe alokoila arau.

17 Liuna avalua o me kosane ateva Epron eMakpela, kalakalaa ia eMamre tale pai sinaka esae, Abraham eghe poli ekapaiela. Eghe ghaala kosa ateva, lienga ateae me isaa akapa ai etiitingina tale ailongota ngateva. 18 Isaa akapanaili voto tale tuku kosa ateva peina akapa Abraham tale nongonongoaira aHit atoa laghe mae sio tale atamana tale masaliki taatara ngateae. 19 Vara me Abraham ghe kaiala vausenna ateva ta Seraa tale lienga ateae tale tuku kosa ateva eMakpela, kalakalangina ia eMamre elome eKeinan, ghaine ila kolokoloa va eIbron. 20 Ia oia kosa ateva me lienga ateae aHit atoa laghe taue lao sio ta Abraham, aue kaluira lienga aikaia ia tuvuna atoa aue ila toka aikaia etana.