1 Raingꞌ ruas, agam isu garam muarutsa Nifutsarif Yisu Kristus, Garam dzidziwandan. Nabinigi da anungꞌ tsarifa garam mangan da buginda mangan yaba i garam gar nanggan tsangandan angu u. 2 Bida agam mpruꞌa ruam, da garam atsufa ring gol da ngarukui gan bini mangan badan, da garam sauda runggan ngarukui gan gagarida ruan badan mpruꞌan, 3 da bida agam uda garam atsufa ngarukui bini igi yaban da nida rutin bida ani, “Waba ani. Wampa waruꞌ bintip bini ani,” da agam nidan da garam sauda runggan igi bida ani, “Wamunti wafa naga,” ma, “Wampa waruꞌ intap igi,” 4 bida nigi da agam itsarif mangan da ibugin mangan, da iraru garam iyab i gam uwayantam maisan angu.

5 O, dzi raingꞌ ruasi, agam waringantin: Anutu ipiriang garam sauda runggan mingꞌa intap ani i suda garam fungꞌa i nam muarutsan da ruta Arangan mpadan da mpada tayangꞌ i nanggan mpada tayangꞌ gan garaman, aru Arangan ragada mungꞌ ugu i riman da rib maran arida i Arangan. 6 Da bitsintaꞌ agam irim ub i garam sauda runggan. Da mangan igi inang da irasu agam da idzur nan da agam maiꞌ maiꞌ imingꞌ kiap ruas maranggan i raruda agam? Garam nam bunump angu! 7 Da ribigi irim ub da iwaya Yisu binganggan bini faringꞌa yaba i agam ugu isu mais!

8 Bida agam tipa agi Nifutsarifangꞌ Anutu nan gan faidagin tsiraꞌ mingꞌa nan akaran ugu nida bida ani, “Maram wari i garam mangan nasangꞌ u maram arida i runggam,”Wkp 19:18; Mt 5:43; 19:19; 22:39; Mk 12:31,33; Lk 10:27; Ro 13:9; Ga 5:14 agam nanga bida nigi da agam yatsungꞌ sanampun ngarubini. 9 Da bitsintaꞌ bida agam maram arida i mangan da buginda mangan, da agam inang asub, da Nan Faidagin bungꞌ asantingꞌ nabi agam garam atupa sib i Nan Faidagin. 10 Bida manga atsungꞌa Nan Faidagin santan bini da atupa sib i bitsintaꞌ angu, da iwaꞌ asub i atupa sib i Nan Faidagin santan ugu. 11 I Anutu ini ibiani, “U ma araraꞌ maꞌ,” da Arangan runi mangan ibiani, “U mais garam funub maꞌ.” Bida u mamida i araraꞌan, da bitsintaꞌ u isa garam funub, da u su garam atupa sib i Nan Faidagin.Kis 20:13-14; Lo 5:17-18; Mt 5:21,27; 19:18; Mk 10:19; Lk 18:20; Ro 13:9

12 Nam santan agam nidan da nangan da maram wafur i Anutu bungꞌ araru agam nayab i nan faidagin piraꞌa agi rai sinungꞌ nam maisan nampanggan, 13 i wain ibiani, Anutu bungꞌ araru agi, da maran wasangꞌ i ntuꞌa i garam aru maran mamida i ntuꞌa garam fain u. Da bitsintaꞌ bida garam maran ntuꞌa i rib fain, da Anutu maran bungꞌ antuꞌ i arangan da gubuꞌ raruda garam gar.

14 Raingꞌ ruas, bida manga faringꞌa runggan garam muarutsan da bitsintaꞌ guman bini nangan maꞌan, da bini idzuwai rumingꞌ? Nam muarutsan bida nigi isangꞌ i rima arangan ganunggan sib? Imaꞌ! 15 Bida agam rainggam ma nafunggam mangan bida sauda runggan i ngarukui ma nam gadan, 16 da agam manga nida rutin, “Wafan da nugum nufan da wampa bini da waga nanggam wasuf,” da bitsintaꞌ mamida i rima sib i nam fain, da nan bida nigi sangꞌ i rima garam arigi rini uriatsan sib? Imaꞌ! 17 I sanab bida nigi, da bida garam muarutsan da guman bini nangan maꞌan, da nanggan muarutsan igi isu badzab.

18 Da bitsintaꞌ manga bungꞌ ani nabiani, “Garam mangan imuaruts, da garam mangan inang gum bini bini.”

Da dzi ni nida nan igi mungaꞌ gan bida ani: U sangꞌ i santingꞌa dzi i nanggam muarutsan ruta guman bini nangan maꞌan, ma? Anungꞌ isangꞌ u! Da bitsintaꞌ dzi bungꞌ asantingꞌ agu i nanggangꞌ muarutsan nayab i dzi gumangꞌ bini dzi nangan. 19 U muaruts ibi Anutu bitsintaꞌ angu? Ngarubini! Marapayam maisan imuaruts ibinigi — da irat da iratarat. 20 U garam brabruꞌan, u ni sruꞌa gin, nam muarutsan angu da guman bini nangan maꞌan da nigi nam utaꞌ santan, a? Ariꞌ, dzi bungꞌ asantingꞌ agu i nan nabiani. 21 Agi tafanggangꞌ Abraham isu garam rururungan imingꞌ Anutu maranggan iyab i nanggan rima narunggan Isak yaba mumai tsarada nam in suda dangki fada rutin. 22 Wasruꞌ gin i Abraham nanggan muarutsan da guman nangan impruꞌ ruan, da gan nanggan muarutsan ikupis ruan isu nidzun iyab i guman nangan. 23 Ibinigi da nan akaran ani isu nidzun, ini ibiani, ‘‘Abraham imuaruts Anutu da Anutu itsangan arangan garam rururungan iyab i nanggan muarutsan.’’Mia 15:6 Da Anutu ifaringꞌ arangan ibiani, “Dzi rinunggangꞌ nidzun Abraham.’’Ais 41:8; 2Sto 20:7

24 Ibinigi da agam watsangan, garam isu garam rururungan i Anutu maranggan iyab i guman nangan, anungꞌ nam muarutsan utaꞌ angu u. 25 I sanab bida nigi da sagat maramais Rehab isu sagat rururungan i Anutu maranggan iyab i nanggan isa yaring i garam Israil atangꞌa i tsuara gamp tsiraꞌ Dzeriko ugu da tanginda fada sanab mangan. 26 Nan ugu wainggan ibiani, rini uriats utaꞌ da ganun maꞌan, da nigi isu badzab sib; bida muarutsan angu da guman bini nangan maꞌan, da isu badzab ibinigi angu.