1 Raiyi da Nifutsarif iraga rib fain atsungꞌa gin isangꞌ 72*rib fain atsungꞌa gin isangꞌ 72 — Papiar ratar Grik fain yakar 70. da itangin ribigi iruꞌ iruꞌ gin imungꞌ ifa gamp tsiraꞌ da isiꞌ santan Arangan maran fura i fada gin. 2 Arangan ini da ribarangan, “Nam gum atiꞌ iyus, da bitsintaꞌ garam gum iruꞌ angu. Ibinigi da wagut i gum Ramanggan i rima mamaꞌ gum i ufuma nam nidzun mpruꞌan. 3 Wafan! Dzi tangin agam iwaꞌ ifan ibi dumpa mingꞌa wasaꞌ i iyam buman. 4 Anungꞌ uda nam farangꞌa moni gin, ma tayap tsiraꞌ, ma faga gakang. Da anungꞌ nida nan faga guntiꞌ da rib fain mingꞌa sanab.

5 “Gubuꞌ agam atangꞌa ungar mangan da wani, ‘Anutu nan nufan gan narut agam.’ 6 Da bida garam ungar igi garam nan mantsingan da nan nufan bungꞌ arut arangan. Da bida maꞌan da Anutu nan gan nufan wasangꞌ i ruta arangan; bungꞌ atip aba da agam. 7 Wampa ungar arigi, da wagan da wanum nam idzuwai ribarangan riman da agam, i nigi iwaꞌ ibi garam gum nam ntsuman gan. Da anungꞌ mpada yunga ungar ungar u.

8 “Da bida gamp idzuwai agam fada gin da isa yaring i agam da waga nam idzuwai ribarangan riman, 9 da watip rib rinin gingꞌan nigi da wani da rib gamp igi, ‘Anutu nanggan mpada tayangꞌ gan garaman iba su uts da agam sib.’ 10 Da bida gamp idzuwai agam fada gin da mamida isa yaring i agam da wawaꞌ wafa sanab da wani, 11 ‘Agam ngaruntsuafam mingꞌa aga fagangꞌ ani aga tsafuts rai i santingꞌa Anutu nugun tsakia gan ibiaꞌ da agam, da bitsintaꞌ wasruꞌ i nan ani: Anutu nanggan mpada tayangꞌ gan garaman iba su uts sib.’Mt 10:14; Mk 6:11; Lk 9:5; Ap 13:51 12 Dzi nani da agam, gubuꞌ raruda garam santan, da garam gamp igi bungꞌ awaꞌ da barabin tsiraꞌ bingan nayus garam Sodom.

13 “Agam garam Koradzin watsauꞌ i runggam! Agam garam Betsaida watsauꞌ i runggam nabinigi! Anutu nampanggan dzi santingꞌan da agam ugu dawaꞌ damingꞌ Taia da Saidon, da ribigi madayiꞌ i pap da madaatsuf umpuaf i santingꞌa bida ribigi iparim i ruan. 14 Da bitsintaꞌ, waꞌa gubuꞌ raruda garam santan, da agam bungꞌ awaꞌ da barabin tsiraꞌ bingan nayus garam Taia da Saidon. 15 Agam garam Kepenaum, agam maram ifur i Anutu uda agam yaba gunungun, a? Imaꞌ! Arangan bungꞌ atapu agam naruꞌ mumai garam mampan uda tsakia gin mingꞌa ratar.”

16 Da ini da riban atsungꞌa gin, “Manga bida ringanta i agam da iringant i dzi, da manga buginda agam da ibugin dzi, da bitsintaꞌ rib idzuwai buginda dzi igi da ibugin garam tanginda dzi badan.”Mt 10:40; 18:5; Mk 9:37; Lk 9:48; Ywn 13:20

17 Raiyi da rib 72 igi itip ibawaꞌ da nam nugun tsiaꞌan da ini, “Nifutsarif, aga ni u binganggam da marapayam maisan iringant i nan da iwaꞌ manaꞌ.”

18 Da Arangan ini, “Dzi tsangan Sadang iruaꞌ imingꞌ gunungun ibi tsuarip prikan. 19 Waringantin, dzi rim nampang ibiaꞌ da agam i yaba ragun i mur da nifumafai†nifumafai — ‘Nifumafai’ igi nifun Adzera ratar, da aruani da garam faꞌ santan ifaringꞌ apu igi binganggan ‘skorpion’, da nam tsakia gan tsiraꞌ bingan ibi gaif. da agam nampang gam iyus garam ipiap Sadang gan, da nam mangan wasangꞌ wayada agam u. 20 Da bitsintaꞌ nugum anungꞌ tsiaꞌan i marapayam maisan iringant i agam, imaꞌ, nugum watsiaꞌ i yakar agam binganggam i gunungun sib wa.”

21 Gubuꞌ arigi da Marapayam Mararam isisungꞌ Yisu i nam nugun tsiaꞌan, da Arangan ini, “Dzi tsarif Agu, Ramangꞌ Nifutsarif gunungun da intap, i U dzigin nam ani i garam mararuru da uwayant tsiraꞌ da U santingꞌ wasi da garam uwayantan waꞌa bida mamaꞌ naru narun. Hai, Ramangꞌ, nigi U tsanga iwaꞌ bini imingꞌ U maranggam.”

22 Da Yisu itip ini, “Dzi Ramanggangꞌ irim nam santan da dzi. Da manga wasruꞌ i Narun u, imaꞌ, Raman angu. Da manga wasruꞌ i Raman u, imaꞌ, Narun angu da rib Narun piriangꞌan angu i santingꞌa Raman wasi rutin.”

23 Ida Arangan itam i ruan da ini da riban atsungꞌa gin angu ibiani, “Agam nugum watsiaꞌ i nam santan agam tsangandan. 24 I dzi nani da agam, profet da king ruas ampi bingan maran yari i tsanganda nam agam tsangandan, da bitsintaꞌ anungꞌ itsangan, da ringanta i nan agam ringanta gin ani, da anungꞌ iringantin.”

25 Da garam gudzupuꞌ i nan faidagin imunti da yintsaꞌ Yisu i nan guta gin ibiani, “Kidungwaga tsiraꞌ, dzi bunanga bida anungꞌ i waꞌa da nam mpada ratar ntingan?”Mt 19:16; Mk 10:17; Lk 18:18

26 Da Yisu ini arangan nan gan mungaꞌ, “Da u faris nan faidagin Moses akaran ugu ibianungꞌ?”

27 Da garam igi ini, “U maram wari i Nifutsarifam Anutu namingꞌ u wangunggam santan da ganunggam santan da rini urun gam santan da uwayantam santan.Lo 6:5; Mt 22:37; Mk 12:30,33 Da maram wari i u rinum rusam nabi u maram arida i runggam.”Wkp 19:18; Mt 5:43; 19:19; 22:39; Mk 12:31,33; Ro 13:9; Ga 5:14; Dzm 2:8

28 Da Yisu ini rutin, “U ni nan rururungan. Wanang wabinigi da u bungꞌ awaꞌ da nam mpada maran taꞌan.”

29 Da bitsintaꞌ garam gudzupuꞌ igi inang i rima runggan sib, ibinigi da igut i Yisu, “Mangan igi isu dzi rinungꞌ rusangꞌ?”

30 Da Yisu ini ibiani, “Gubuꞌ mangan da garam mangan imingꞌ sanab Yerusalem iruꞌ Dzeriko, da garam wapa nam impung arangan. Da ribarangan itsiar i gan ngarukui gan da yis arangan fafarab angu, imamp asub da itangin arangan da rungꞌ igingꞌ. 31 Da garam pumuꞌa Anutu mangan imingꞌ sanab arigi da gubuꞌ arangan fa tsanganda garam igi da isariꞌ sanab ringan gin ya ifa gan arun. 32 Da garam rima gum sib mingꞌa Ungar Mararam‡garam rima gum sib mingꞌa Ungar Mararam — ma ‘garam Liwai’ mangan ibinigi gubuꞌ aranga bawaꞌa mumai aru nigi da tsanganda garam igi da arangan isariꞌ sanab ringan ibinigi. 33 Da bitsintaꞌ garam Samaria mangan ifan da ifawaꞌ garam igi gan gingꞌa gin, da gubuꞌ arangan tsanganda garam igi da maran intuꞌ gin. 34 Arangan ifa rutin da iyats wain da madamin i rini maisan da ipatiꞌ sib. Ida itangin garam igi iyab dongki gan da iyu arangan ifa ungar ampi gingꞌa gin da impa tayangꞌ gin. 35 Gubuꞌ pisa maiꞌ da garam igi iyu moni silva iruꞌ da irim da garam mpada tayangꞌ ungar igi i mpada tayangꞌ garam igi. Da ini, ‘Watsanga arangan sib, da bida u rima aranga sib yusa nam ntsuman dzi riman da agu, da gubuꞌ dzi tipa badan, da dzi bungꞌ arim u nam ntsuman gam mungaꞌ.’ ”

36 Da Yisu ini, “U maram ifur garam iruꞌ da bits gan idzuwai aru nigi isu rinunggan i garam waꞌa da barabin i garam maisan banginggan igi?”

37 Da garam gudzupuꞌ i nan faidagin ini, “Garam aru maran gaiba garam igi.”

Da Yisu ini, “Wafan da wanang wabinigi.”

38 Gubuꞌ Yisu da riban atsungꞌa gin yunga fadan da iwaꞌ gamp mangan. Da sagat mangan binganggan Mata itus muantsi i gan ungaran da iyu Arangan iyab. 39 Da aranga rainggan binganggan Maria, arangan impa uts da Yisu da irim ringan i nan Yisu nidan. 40 Da bitsintaꞌ Mata ifa iba iyus angu i tipa nam gadan. Da arangan iba da igut i Yisu, “Nifutsarif, anungꞌ bini i dzi rainggangꞌ ruta agu mpadan da dzi nanga gum santan angu gin. Isangꞌ u nidan da arangan i barima dzi sib, ma?”

41 Da Nifutsarif ini da arangan, “Mata, Mata, u wangum ibarabin da u maram ifur nam ampi bingan, 42 da bitsintaꞌ maram wafur nam bitsintaꞌ angu. Maria iyu nam bini sib, da mangan wasangꞌ i siata rai sinungꞌ arangan u.”