1-2 Garam bits binganggan Ladzarus igingꞌ rinin. Arangan irut nafun rusan Maria da Mata impa gampan Betani. (Maria igi sagat aru raiyi da arangan imus yatsa madamin gaunt bini ruꞌa i Nifutsarif fagan da tiasa i gudzu yafanggan.) 3 Ibinigi da Maria da rainggan Mata irim sisingꞌ ifan da Yisu ibiani, “Nifutsarif, u garamam maram aridagin ugu igingꞌ rinin.”

4 Gubuꞌ Yisu ringanta i nan igi da ini binaꞌ, “Ladzarus anungꞌ igingꞌ rinin i mampa funub u, imaꞌ! Igingꞌ i garam tsarifa Anutu da Anutu Narunggan uda bingan tsiraꞌ gin.” 5 Yisu maran yari nidzun i Maria da rainggan Mata da nafunggan Ladzarus. 6 Ibinigi da gubuꞌ Arangan uda Ladzarus sisingꞌ gan gingꞌa rinin igi sib da Arangan rungꞌ impa imingꞌ nigi isangꞌ gubuꞌ iruꞌrun raiyi. 7 Ida ini da riban atsungꞌa gin ini binaꞌ, “Agi natip afa intap Yudia.”

8 Da riban atsungꞌa gin ini rutin ibiani, “Rabai!*Rabai — Nan Rabai wainggan ibi Kidungwaga. Anungꞌ gubuꞌ fain ifa sib u, da garam Yuda inang i tapuda agu funub i tauf, da u ni tipa fadan, a?”

9 Yisu ini ibiani, “Gubuꞌ pis santan gubuꞌ maran gan isangꞌ 12. Da bida manga yungꞌa da gubuꞌ da arangan wasangꞌ i utuda fagan i nam mangan u, i arangan irarab nam puatsadan arida intap ani. 10 Da bitsintaꞌ bida garam mangan yungan da nam mimindan da bungꞌ autu fagan, i nam puatsadan anungꞌ imingꞌ wasaꞌ i arangan u.” 11 Yisu ini nan igi sib da itip ini da rib igi ibiani, “Agi rinunggangꞌ Ladzarus igingꞌ marampruꞌ, da bitsintaꞌ dzi bungꞌ afan da nais arangan marataꞌ.”

12 Da gan riban atsungꞌa gin ini arangan nifunggan mungaꞌ ibiani, “Nifutsarif, bida arangan gingꞌa marampruꞌ da rinin bungꞌ adaum.” 13 Ribarangan ibuni Yisu nida Ladzarus gingꞌa marampruꞌ angu, da bitsintaꞌ Arangan ini i Ladzarus imamp funub sib.

14 Ibinigi da Yisu ini nan wasi da ribarangan ibiani, “Ladzarus imamp funub sib. 15 Da bitsintaꞌ dzi marangꞌ ifur agam bini gam da dzi nugungꞌ inuf i dzi anungꞌ irut arangan impai da gubuꞌ arigi u, i agam isangꞌ i muarutsa dzi. Da bitsintaꞌ aruani, da agi fadan da tsanganda arangan.”

16 Tomas (faringꞌa Didimas†faringꞌa Didimas — Bingan Didimas wainggan ‘mamaꞌ bampungꞌ’. Watsanga: Ywn 20:24; 21:2) ini da rib ruta arangan atsungꞌa Yisu igi ini ibiani, “Ariꞌ! Agi fadan da ruta mpruꞌa ruangꞌ mampan.”

17 Gubuꞌ Yisu fawaꞌa uts da gamp Betani da iyu sisingꞌ rima Ladzarus sib mingꞌa badzab gampan sangꞌa gubuꞌ iruꞌ da iruꞌ sib. 18 Gamp Betani igi imingꞌ uts pas angu da gamp tsiraꞌ Yerusalem isangꞌ ibi 3 kilomita, 19 da rib Yuda ampi bingan iba da Mata da Maria i yafada iruꞌ igi wangun i nafunggan nanggan mampan igi. 20 Gubuꞌ Mata ringanta i nan Yisu badan da ifa sanabin. Da Maria rumpa ungar. 21 Mata ini da Yisu ini biani, “Nifutsarif, u madani mpadan da dzi nafunggangꞌ wasangꞌ i mampan u. 22 Da bitsintaꞌ dzi tsangan wa, gubuꞌ maran anungꞌ intsup i u rima arangan sib u! U nida udagin i nam idzuwai da Anutu bungꞌ arim da agu.”

23 Yisu ini da arangan ibiani, “U nafunggam bungꞌ atip namunti marataꞌ.”

24 Da Mata ini, “Hai, dzi sruꞌ gin wa. Waꞌa gubuꞌ buntun da arangan bungꞌ arut garam sib angu namunti marataꞌ.”

25 Yisu ini da arangan ibiani, “Muntida maran taꞌan da mpada ratar wain dzi. Manga muarutsa dzi da bida mampan, da rubungꞌ ampa maran taꞌan. 26 Manga mpada marataꞌ da muarutsa dzi da anungꞌ isangꞌ i mampan u, bungꞌ ampa ratar angu. U muaruts nan igi, ma?”

27 Mata ini da Arangan ibiani, “Hai, Nifutsarif! Dzi muaruts Agu Kristus, Anutu Narunggan, aru Anutu ragada i tanginda bada intap ugu aruani.” 28 Gubuꞌ arangan ntsupa nan nidan igi sib, da itip ifan da ifanuꞌ rainggan Maria iwaꞌ ba manaꞌ sinungꞌ rib ruta mpadan igi da ini rutin ibiani, “Kidungwaga ibawaꞌ sib da ini tsanganda agu.” 29 Gubuꞌ Maria ringanta gin da sungꞌ angu yuriꞌ ifan da Yisu. 30 Da Yisu wawarip yatangꞌ gamp igi u; rungꞌ impa mumai aru Mata fawaꞌa rutin igi. 31 Gubuꞌ garam Yuda ruta Maria mpada ungar igi i yafada i wangun tsanganda arangan suda rinipuat da tanginda ungar rai da fadan, da ribarangan yatsungꞌ gin, i ibuni arangan fada tauf bampun i rangan.

32 Da gubuꞌ Maria fawaꞌa mumai aru Yisu mpada gin da tsanganda Arangan, da ifa tuꞌ iruꞌ Arangan fagan da ini, “Nifutsarif, U dampai da dzi nafunggangꞌ wasangꞌ i mampan u.”

33 Gubuꞌ Yisu tsanganda Maria rangan da rib Yuda ruta badan igi singisiang muntidan da wangun ibarabin da nugun imais nidzun angu. 34 Da Yisu igutin ini binaꞌ, “Agam irim arangan i nanungꞌ?”

Da ribarangan ini, “Nifutsarif, waba da watsangan.” 35 Da Yisu irang. 36 Ibinigi da garam Yuda ini da ruan, “Watsangan! Arangan irim wangunggan nidzun angu i garam aga.”

37 Da bitsintaꞌ gan fain ini binaꞌ, “Garam igi itip garam maran gampaman idaum, da madarim garam aga sib i mamida i mampan.”

38 Yisu nugun imais nidzun angu da iyung ifa tauf bampun rima badzab in igi. Da tauf tsiraꞌ mangan itsungin tauf bampun nifun igi sib. 39 Yisu ini da rib igi ibiani, “Warimpingꞌ tauf tsiraꞌ aga rai i tauf bampun nifun igi.”

Da bitsintaꞌ Mata, garam mampan igi nafunggan, ini binaꞌ, “Nifutsarif, U sruꞌ gin sib wa, Ladzarus igingꞌ gubuꞌ iruꞌ da iruꞌ sib da ifufin maisan.”

40 Da Yisu ini, “Dzi wanani da agu sib i bida u muarutsan, da agu bungꞌ atsangan Anutu nampanggan?” 41 Ibinigi da rib igi irimpingꞌ i tauf tsiraꞌ iwaꞌ manaꞌ sinungꞌ tauf bampun nifun. Da Yisu idantang iyab da ini, “Ramangꞌ, dzi rim dangki da Agu i wain U ringant i dzi nan gangꞌ udagin sib wa. 42 Dzi sruꞌ gin sib i gubuꞌ sib angu da U ringant i dzi nan gangꞌ udagin. Da bitsintaꞌ dzi ini nan igi i rib muntida ani ringanta gin da muarutsa bida U tangin dzi iba.”

43 Nida nan igi sib da inuꞌ nifun tsiraꞌ bingan ini binaꞌ, “Ladzarus, wawaꞌ ba!” 44 Da garam mampan ugu iwaꞌ ba impruꞌ da bangin da fagan patiꞌa sib i bruꞌ dzufungꞌan da bruꞌ buafira arangan maran sib in ugu. Da Yisu ini da rib igi ibiani, “Wapiraꞌ bruꞌ patiꞌa arangan gin aga rai da watangin arangan nayung.”

45 Ibinigi da garam Yuda ampi bingan bada mpruꞌa da Maria ugu da tsanganda nam Yisu nangan igi imuaruts Arangan. 46 Da bitsintaꞌ fain ifan da rib Farisai ruas da ini nam Yisu nangan ugu wasi da ribarangan. 47 Da garam pumuꞌa Anutu wain gudzun rusan irut garam Farisai inuꞌ garam Yuda gudzun rusan utupan tipa nan, faringꞌa Sanhidrin gin,Mt 26:59; Mk 14:55; 15:1,43; Lk 22:66; 23:50; Ywn 3:1; Ap 4:5,15; 5:21,27,34,41; 6:12,15; 22:30; 23:1,6,15,20,28; 24:20 impruꞌ da igut i ruan ini binaꞌ, “Agi nanga nam bida anungꞌ? Garam aga nang nam maran mangan ampi bingan iyus angu. 48 Bida agi tusa marangꞌ i arangan da runanga bida naga da rib ampi bingan angu bungꞌ amuaruts arangan. Da garam Rom bungꞌ aba da nawaya agi Ungarangꞌ Mararam da agi garamangꞌ santan.”

49 Da gan mangan mingꞌa wasaꞌ i ribarangan binganggan Kaiafas impa ibi garam pumuꞌa Anutu wain gudzunggan tsiraꞌ da gubuꞌ igi, da arangan ini binaꞌ, “Agam wasruꞌ i nam mangan u! 50 Agam madasruꞌ gin i bini iyus i garam bitsintaꞌ angu mampa i uda ampan tsiraꞌ mumai gan; anungꞌ bini i agi garam Yuda santan rima runggangꞌ rai u.”Ywn 18:14

51 Kaiafas runggan wani nan igi i gan uwayantan u, imaꞌ. Arangan impa ibi garam pumuꞌa Anutu wain gudzungan tsiraꞌ da gubuꞌ arigi, ibinigi da ini nan profet igi wasi i Yisu bungꞌ amamp i rima garam Yuda sib, 52 da anungꞌ ribarangan angu u, imaꞌ. Bungꞌ amamp i uda Anutu narun rusan mpada ruga rugan basuda garam utup bitsintaꞌ. 53 Da mingꞌa gubuꞌ arigi da fadan da garam Yuda garaman gudzun gudzun igi itip nan i isa Yisu funub.

54 Ibinigi da Yisu watip iyung da ikupis runggan wasi imingꞌ garam Yuda maranggan u. Itangin nigi rai da ifa gamp Ifraim mingꞌa uts da nam manaꞌ dadauntan da ifa rut riban atsungꞌa gin impa imingꞌ igi. 55 Garam Yuda gubuꞌ gan mararam tsiraꞌ Angira Atupa Sib isu uts, da garam ampi bingan imingꞌ gamp ruga rugan iyab Yerusalem i nanga runggan suda mararam i Anutu maranggan mungꞌ i gubuꞌ tsiraꞌ igi. 56 Ibinigi da rib igi isau Yisu da imunti Ungar Mararam da igut i ruan ini binaꞌ, “Agam maram ifur nan ibi anungꞌ? Arangan bungꞌ aba i gubuꞌ mararam tsiraꞌ ani, ma imaꞌ?” 57 Da garam pumuꞌa Anutu wain gudzun rusan da garam Farisai ini nan wasi i manga nida tsanganda Yisu mpada anungꞌ da nabani rutin i ribarangan mpunga Yisu.