Pita Uqa Jaqec Je Lecisdoc
Anutna Dana Cajaca Jaqiaden
Aqunec Je
Jaqec je i uqana gug eu Kristen cunug age uhulec iwaladec dana leih agena je dah mimeig agena wal kobol majanagaca qee eu toodu odowainnu agena je cain dah mowain (eu 2.1-2). Kristen age mele je aposel adein eu hewi daugdoqagan. Age kobol euna Anutca, Jisas Krais Tibudca du cuhadoqagan. Aposel age amagana Jisas fein, odocobil Jisas iwaladeceb doin.
Jaqec je ina je ben osoha nijia. Dana leih age Jisas uqa qee ceseli hoiaun ec madein (eu 3.3-4). Euqa jaqec je i Jisas uqa ceseli hugian ec madena. Mele, uqa mahuc qee ceseli hoiaun, euqa uqana gug eu odi. Anut uqa dana oso fadaleiaunnu gale dona. Uqa dana cajaca cunug age agena silailnu tului falicdoqagannu gale dona. Eunu uqa camuhulaadi saen cecelac age silailnu tului falicdocnu sumadena (eu 3.9).
Je Dunuhnu Dado Mec
1. Aqunec je (1.1-2)
2. Age Kristen dana cajaca ben caleigale (1.3-11)
A. Anutna gagadic odoc eu Anutna kobolna cobocnu cesulgena (1.3-4)
B. Age agena wawaga meleec eu Anutna kobol me cunug tubdoigale (1.5-7)
C. Age Anutna kobol eu cunug ocobilfi agena Anutnu cabi eu aig mati bahic qugian (1.8-11)
3. Pita uqa eetanu jaqiadena eunu sildiadena (1.12-21)
A. Pita uqa agena cisdoc fogo duadigiannu me je haun maadena (1.12-15)
B. Pita uqadodoc ameggul Jisas Krais uqana gagadic odoc fulacdocca fen (1.16-21)
4. Pita uqa uhulec iwaladec dananu ulauladena (dac 2)
A. Uhulec iwaladec dana age Kristen gemona caloqagan (2.1-3a)
B. Anut uqa uhulec iwaladec dana eu gesiladigian (2.3b-9)
C. Pita uqa uhulec iwaladec dana age dumanaganu madena (2.10-22)
5. Jisas Krais uqana ceseli hoc (3.1-16)
A. Pita uqa eetanu jaqiadena ec haun madena (3.1-2)
B. Deel cit qocna dana leih age lelanec je madegina eundec caloqagan (3.1-2)
C. Jisas Krais uqa ceseli hugian eu mele bahic (3.8-10)
D. Krais ceseli hugian eunu age gun kobolna cobimeig Anutna kobol cunug toodu odoigale (3.11-16)
6. Cit qoc je (3.17-18)
1
1 Ija Saimon Pita, ija Jisas Kraisna cabi dana aposelca. Ija dana cajaca age Jisas Kraisnu wawaga meleena eu jaqiadigina. Jisas Krais uqa egena Anut, uqa egena Cahahagec. Jisas Krais uqa ititom. Age uqanu wawaga meleec wele oin. Eunu agena wawaga meleecca egena wawige meleecca eu ihocihoc. 2 Age Anut Jisas egena Tibudca eunu dogina. Age alenu dudu cuhadodogin ale eelgec uum igec malol bilecca haunhaun adesiale.
Ege Anutna dana cajaca bilecnu nesili cedigen
3 Jisas Krais uqa Anut, uqa gagadic odocca. Uqa culgeceb uqanu du cuhadom. Uqa binanca bahic, uqa gagadic meca bahic euna ege uqana bilitoqannu utagen. Odocob uqana gagadic odoc eu cesulgeceb uqa ceteteh cunug eu egena cebac bilec gagadic mecnuca, ege Anutna kobolna cobocnuca ihoc igen. 4 Jic euna uqa ceteh ben bahic, me bahicca igigian ec je hahun maden eu igen. Euqa Krais uqa ceteh me bahic i igen, odocob uqa euna cesulgeceb wawige cajecnu kobol eu ege dana cajaca mahana biluquna me qee migina eu felacudigeceb busalom. Odocob ege Anutna cebac bilecca, uqa dumanca om.
5 Gug inu dih age odi odoiga. Age wawaga meleena. Odocob age tutuc cobocnu cabi gagadic bahic umeig agena wawaga meleec tubdoiga. Odocob age Anutna cisdoc silec ocnu cabi gagadic bahic oiga. Anutna cisdoc silec eu age adi cobocnu dado madigian. Odocob Anutna cisdoc silec eu agena tutuc coboc tubdoiga. 6 Odocob age dumanaga me cofdocnu cabi gagadic bahic umeig eu Anutna cisdoc silec tubdoiga. Odocob age wawaga duuecca tawecnu cabi gagadic bahic oiga. Wawaga duuecca tawec eu culumen dain adec sogoecca gahidocnu cesuladigian. Odocob age wawaga duuecca tawec eu dumanaga me cofdoc tubdoiga. Odocob age Anutna kobolna cobocnu cabi gagadic bahic umeig eu age wawaga duuecca tawec tubdoiga. 7 Odocob age wawaga meleec cotogailnu wawaga qocnu cabi gagadic bahic umeig Anutna kobolna coboc tubdoiga. Odocob age wawaga meleec cotogailnu nalunuga mecnu cabi gagadic bahic umeig wawaga qoc tubdoiga.
8 Age Jisas Krais egena Tibudnu wele doin. Age kobol eundec cunug ocobilfi eu ageca gagadic calecebfi agena Jisas Kraisnu doc eu gauc bilecnu ihoc qee. Eu aig mati bahic qugian. 9 Ge, dana uqa kobol eundecca qee, uqa ceteh onoca bilia fecnu ihoc qee, uqa dana ameg galuc mec cinigwe. Uqa Anut uqa uqana silail uqa wele moloi eu cagasiteceb cataniec biligen ec dahig celen. 10 Ija wawige meleec cotiel, Anut uqa age nesili cedadimei age uqana dana cajaca bilecnu utaaden. Eunu age agena cobocna age Anutna dana cajaca ihacecnu kobol eundec cunug cabi gagadic oiga. Ge, age odi odifeig agena wawaga meleec toni qocnu ihoc qee. 11 Eunu age odi odocobilfi Jisas Krais, egena Tibud, egena Cahahagec uqa geh bahic cesuladeceb age uqana cul dunuh loqagan. Cul euna Jisas Krais uqa king bileceb catanena.
12 Eu mele, age ceteh i cunug wele doin. Age mele je i wele oin, odocob age euna gagadic tawegina. Euqa age kobol eundecnu dahiniga celecdainnu ija kobol eundecnu agena cisdoc gaid fogo duadigen. 13-14 Ija dugina, nag odi ija deweni i culigen. Egena Tibud Jisas Krais ceteh inu je hahun maten. Eunu saen cunugna ija deweni ina biligina ija agena cisdoc fogo duadigennu haun maadigen eu me bahic ec cisdugina. 15 Eunu ija ceteh inu maadecnu cabi gagadic ugina. Odocob hibna saen ija wele cal mecemin age je i saen cunugna ceteh inu haun ihoc cisdoqagan.
Ege aposel Krais uqana gagadic odoc fulacdocca fom
16 Ege wele egena Tibud Jisas Krais uqa gagadic odocca, odocob uqa ceseli hugian ec maadocomun doin. Euqa ege Jisas Kraisnu je eu maadocomun doin saen euna ege dodo gauc dana agena cisdocnadec toodu qee maadolom. Egedodoc amigegul Jisas Krais uqana gagadic odoc fulacdocca fom.*Je i Jisas deweg ibuldon eunu madena. Matju 17.1-13; Mak 9.2-13; Luk 9.28-36 eu feiga. 17 Ege uqaca aluh gunna ono tatawoqon saen Anut Memige uqa binan suldumei gagadic odoc fulacdocca uten. Odimei uqa gagadic odoc fulacdocca uutei Anut uqa king binan meca bahic uqa sao jobondec maden:
“Eu ija melami,
ija uqanu nalug migina,
ija uqanu wawi me nijia,” en. (Matju 17.5; Mak 9.7; Luk 9.35)
18 Ege Anut jejeg eu sao jobondec cacalen dah mom. Ge, saen euna ege uqaca aluh gunna tatawi dom. 19 Odocob ege je hahun madec dana wele bilein agena jenu gagadic bahic wawige meleecnu ihoc. Agena je eu adi Jisas Kraisnu wawaga meleecnuca, adi cobocnuca cesuladena. Agena je eu gowoc cudun tuna gogowi bilina cinigwe. Eu gogowi bibilen li walag dadaneb malaqa boei†Malaqa boei eu Jisas Krais. Jahunec Camasac Muden Je 22.16 eu feiga. age wawaga dunuh wasigian. Eunu ageha agena je gagadicca hewifeig eu me bahic.
20-21 Euqa age ceteh matu inu casac docnu doiga. Je hahun madec dana oso uqa dana agena gale adecna je hahun qee madel. Euqa Kis Gun uqa dana tuliadeceb age je Anut aden eu madein. Je hahun madec dana agena je eu Anutna jaqec je nijia. Euqa ege dana egena cisdoc himec toodumeb je eu uqana gug sildiadecnu ihoc qee.
*1:16: Je i Jisas deweg ibuldon eunu madena. Matju 17.1-13; Mak 9.2-13; Luk 9.28-36 eu feiga.
†1:19: Malaqa boei eu Jisas Krais. Jahunec Camasac Muden Je 22.16 eu feiga.