4
Anutna dana cajaca age jaen mudec oqagan
Anut uqa je hahun eu odi maden, “Age cois ijana jaen mudec cudun dunuh loqagan,” en eu qila bilia. Eunu ege cofdu cuhadoqale. Qee fefebil age gemonadec dana oso cahuldudu jaen mudec abusildoiaunnu. Ge, ege me je dah mom wele Isrelha odi dah mein. Euqa eu age dah mein qa wawaga qee meleel. Eunu me je age dah mein eu qee cesuladel.
Ge, ege dana cajaca wawige meleena, ege jaen mudec cudun* Isrel age Isip hatu culdein saenna Anut uqa Moses Josuaca ale Isrel ehadi lecebil age Kenan hatuna beloqagannu gale don. Odocob maha eu agena jaen mudec cudun calecnu gale don. Euqa dana uqa Hibru jaqec je jaqen eu Anut uqana jaen mudec cudun oso nijia, eu sao jobon eunu ihacadecnu gale don. Eu uqana jaen mudec cudun gug bahic, odocob uqa wawaga meleec dana cajaca culadeceb age cudun eu dunuh loqagan. eu dunuh loqona. Wele Anut uqa cudun eunu madimei maden:
“Ija gemani beceb cagoc je odi madem,
‘Eu age ijana jaen mudec cudun eu dunuh qee bahic qee lowain!’ em,” en. (Buk Song 95.11)
Eu uqana jaen mudec cudunnu eu odi maden qa wele Anut uqa maha ifanen saen euna uqana jaen mudec cudun saciadu muden. Odocob Anutna jaqec je oso deel sanijec 7-peladocnu odi madena:
“Odocob Anut uqana cabi cunug odi hedon,
odimei deel 7-pela euna jaen muden,” ena. (Jenesis 2.2)
Odocob Anutna jaqec je euna haun ha madena, “Eu age ijana jaen mudec cudun eu dunuh qee bahic qee lowain!” ena. Odocob dana cajaca wele bahic je dah mein eu age jejeg qee toodoloinnu dunuh qee lelein. Eunu je eu qila bilia. Leih age uqana jaen mudec cudun eu dunuh loqagan. Eunu Anut uqa haun deel oso men. Uqa deel eu “Qila” ec maden. Odocob hibna cabi gel mati hedocob Anut Dewid cona je qasali maden, je eu ege casac wele madoqa odi:
“Qila age uqa jejeg dah mifeig age wawaga gagadic bahic cain menowain,” en. (Buk Song 95.7-8)
Ge, wele Josua uqa jaen mudecnu Anut maden eu adoubmi Anut haun jaen mudecnu deel osonu qee madoub. Eunu ege doqona, jaen mudec cuha deel oso eu Anutna dana cajaca sumadec bilina. 10 Odocobha eu ege doqona, dana Anutna jaen mudec cudunna lena uqa uqana cabi qee mudina. Wele Anut uqadodoc uqana cabi qee mudimei jaen muden eu odiwe jaen mudina. 11 Eunu ege jaen mudec cudun euna leqannu gagadic moqale. Qee fifi dana oso age jejeg qee toodoc kobol eu wele odimeig fadalein eu odi fadaladeiaunnu.
12 Anutna je eu cebac bilecca cabi gagadic u bilina. Eu aigca bahic uqana aig eu han sigin aig lecisca euha wooldoc tawena. Eu dana qohodumei dunuh bahic lena. Li dolonigeca kiscana ono lena, odimei qatanalena. Odimei gob tefulinigeca mihinogca limei qatanalena. Odimei ege wawigena gale gec cisdocca cunug nenesili fena. 13 Anut ceteh cunug muden eu oso uqa olana jahunecwe qee. Qee bahic! Ceteteh cunug eu Anut amegna camasac bahic tawegina. Odocob uqa amegna himec ege kobol cunug odoqona eunu madoqan.
Jisas uqa egena nawel tawec ihanec dana ilo
14 Jisas Anut Melah, uqa egena nawel tawec ihanec dana ilo, uqa sao jobon dunuh bahic len. Eunu ege wawige meleec qasali madoqona eu hewi daugdoqale. 15 Ge, egedodoc egena gagadic odocna silail cilehdocwe qee. Euqa egena nawel tawec ihanec dana ilo uqa egenu waug qocca qee odi qee bilina. Temgec egeca calena euha cunug temdoc uqaca calen. Euqa uqa silail qee mel. 16 Eunu ege Anutna king cabal bilecna lecnu qee cucuiuqaun. Anut uqa waug qocca, uqa eelgec uum igina. Ege uqaca lifeb uqa waug qocca eelgec uum igecca eu oqan. Odocob ege culumencafi uqa cesulgigian.

*4:3: Isrel age Isip hatu culdein saenna Anut uqa Moses Josuaca ale Isrel ehadi lecebil age Kenan hatuna beloqagannu gale don. Odocob maha eu agena jaen mudec cudun calecnu gale don. Euqa dana uqa Hibru jaqec je jaqen eu Anut uqana jaen mudec cudun oso nijia, eu sao jobon eunu ihacadecnu gale don. Eu uqana jaen mudec cudun gug bahic, odocob uqa wawaga meleec dana cajaca culadeceb age cudun eu dunuh loqagan.