5
Nawel tawec ihanec dana ilo Jisas uqa cahahagecnu ihoc
Nawel tawec ihanec dana ilo mugumuga mec kobol eu odi. Anut uqa dana eu dana gemonadec ehudeceb uqa Anut cewel utona. Odimei uqa dana cajaca agena silail cagasecnu uqa Anut bagol utina, uqa Anutnu nawel tawec ihanec filfil cabi ona. Uqa dana waug gagadicca qee. Eunu uqa dana cisdocca qee age Anutna jic culegina eundec cehnana iwaladena. Odocob uqa dana cajaca agena silailnu Anut cagasiadecnu ihandona. Euqa uqa waug gagadicca qeenu uqadodoc uqana silail cagasitocnu Anut ihandona.
Nawel tawec ihanec dana ilona cabi eu binan benca. Odocob dana oso uqadodoc cabi eu qee hewena. Qee bahic! Anut uqadodoc cabi eu hewigiannu ehudina, wele Eron ehudenwe.
Krais uqaha eu odi odon. Uqa uqadodoc binan susuli nawel tawec ihanec dana ilo qee calel. Qee bahic! Anut uqadodoc nawel tawec ihanec dana ilo cabi eu gahidugiannu ehuden. Anut uqa madon:
“Hina ija melami.
Qila ija hina memen caliga,” don. (Buk Song 2.7)
Odocob uqa jaqec je osona ha odi maden:
“Hina nawel tawec ihanec dana gaid bilecem catanigian, nawel tawec ihanec dana Melkisedekwe odi bilegan,” en. (Buk Song 110.4)
Wele Jisas uqa dana mahana bilen saen euna uqa Anut inondudu bilen. Anut uqa cal mecnadec cahahadocnu ihoc eunu uqa qajec benca amulig nenen utai inondon. Uqa uqadodocnu jogoi Anut bisalu himec biloloi eunu Anut uqana inondoc eu dah moloi.* Jisas Getsemani cabina bilen saenna uqa Anut uqa culumen ben eu uqaca caligia oodon besitocnu inondon. Age Matju 26.36-46ca, Mak 14.32-42ca, Luk 22.39-46ca eu feiga. Odocob but i odi maden. Anut uqa Jisasna inondoc dah men. Anut culdocob Jisas cal men eu mele. Euqa Anut culeceb cal mec eu Jisas gaid qee hewudel. Deel cijed hedocob Anut uqa tulidocob cal mecnadec ceseli cajen. Odimei uqa ijan ben utimei uqa uqana nawel tawec ihanec dana ilo muden. Age Aposel 2.24ca, Hibru 2.9ca, Filipai 2.6-11ca euha feiga. Jisas uqa Anut Melah qa uqa waug sogoen culumen gahidon. Odocob uqa waug sogoen culumen gahidon euna Anut jejeg toodoc kobolnu du cuhadon. Euna uqa je toodoc dana bahic calen. Eunu uqa dana age Jisas jejeg toodogina eundec agena cahahaadec gug calen. Cahahaadec eu gaid bileceb catanigian. 10 Odocob Anut uqa ehudimei madon, “Hina nawel tawec ihanec dana ilo bilegan eu nawel tawec ihanec dana Melkisedekwe odi bilegan,” don.
Ege mel simwe gaid bilecnu cois qee
11 Krais uqa nawel tawec ihanec dana Melkisedek cinwe eunu je geh bahic nijia Age Hibru dac 7 feiga. ege je eu maadecnu qa qila agena cisdoc eu qee fogo dol. Eunu ege je eu age sildiadecnu cacanigca. 12 Ge, age wawaga meleec dana saen cecelac bilein eunu qila age iwaladec dana biloub, eu saen ihoc. Euqa age iwaladec dana qee. Agena cisdoc eu gohic, odocob dana oso haun Anutna je gug bahic eunu iwaladigiannu nijia. Age sab gagadic ocnu ihocca qee. Age su ocnu ihoc himec. Eu odi nijia. 13 Ege doqona, dana su himec jegina eu age mel sim cinigwe. Odocob age kobol ititomnu batut qee dogina. 14 Sab gagadic eu dana wele ben mein agena. Dana eundec agena cisdoc saen gehca iwaldocobilfi age kobol me qee kobol meca eu nesili docnu ihoc.

*5:7: Jisas Getsemani cabina bilen saenna uqa Anut uqa culumen ben eu uqaca caligia oodon besitocnu inondon. Age Matju 26.36-46ca, Mak 14.32-42ca, Luk 22.39-46ca eu feiga. Odocob but i odi maden. Anut uqa Jisasna inondoc dah men. Anut culdocob Jisas cal men eu mele. Euqa Anut culeceb cal mec eu Jisas gaid qee hewudel. Deel cijed hedocob Anut uqa tulidocob cal mecnadec ceseli cajen. Odimei uqa ijan ben utimei uqa uqana nawel tawec ihanec dana ilo muden. Age Aposel 2.24ca, Hibru 2.9ca, Filipai 2.6-11ca euha feiga.

5:11: Age Hibru dac 7 feiga.