10
Ihanec weledec silail cagasecnu ihoc qee
1 Mosesna loo je eu ceteteh hibna caligian eu mele bahic qee, eu ihicon qoc himec foqona. Loo je eu age ihanec eu odi himec cabi gel cunugna ihani oqagan ec madena. Eunu loo je eu dana cajaca age Anut cuha fecnu cemenug legina ihanec euna tutuc madecwe qee. Eu agena silail cagasiadecnu ihoc qee. 2 Loo je eu ihoc odadeceb tutuc bahic caloubmi eu age haunhaun qee ihanoub. Dana cajaca cuhana houb eu ihanec osol himecna wele haun ibuldoub eu age wawagana silailca qee ec tebandoub. 3-4 Euqa bulmakau manahal sipsip golanagaca eu agena silail cagasiadecnu ihoc qee bahic. Eunu cabi gel cunugna ihanec euna age haun agena silailnu cisdoloig.
5 Eunu saen Krais uqa mahana nimei uqa Anut odi madon:
“Age dool qumeig ihanhecnu hina culuguna.
Euqa hina deweg ganac oso itegannu saciadom bilia.
6 Hina age dool manecna silail cagasec ocnu ihanhec eu hina qee gale hena.
7 Eunu qila ija odi madigina,
‘O Anut, ija wele niga.
Wele ijanu jaqec je bagacna jaqein odi qila ija hinana cisdoc toodugennu niga,’ igina,” don. (Buk Song 40.6-8)
8 Uqa casac loo je kobolna ihanoloig eunu madimei maden, “Age dool qumeig ihanhecnu hina culuguna. Odocob hina age dool manecna silail cagasec ocnu ihanec eu hina qee gale hena,” en. 9 Odimei tubdu maden, “O Anut, ija hinana cisdoc toodugennu wele niga,” en. Eu odinu Anut uqa ihanec kobol weledec eu qee meceb uqa Kraisna ihanec kobol haun eu uqana cudunna cehen. 10 Jisas Krais uqa Anutna gale doc toodon. Odimei uqa uqadodoc deweg ganac euna Anut ihandu osoldon. Eu odina uqa ege qagu migeceb silailca qee ibuldom.
Krais uqana ihanec eu silail cagasecnu ihoc
11 Juda agena nawel tawec ihanec dana cunugca odi tawimeig deel cunugna agena cabi oloig. Age haunhaun ihanec kobol eundecna himec ihanoloig. Euqa ihanec eu odi eu silail cagasigecwe qee. 12 Euqa Krais uqa silail cagasecnu ihani osoldon eu saen cunugnu ihoc. Uqa eu odiodi hedumei ti Anut eben meulana isec bilen. 13 Uqa eu odi bibili Anut uqana cad uqa jaih bisalu isec madigiannu saen susumudi bilina. 14 Eunu uqa ihanec osolna himec dana cajaca qagu madeceb agena silail cunug cagasiaden. Odocob age saen cunug silailca qee bilecebil catanigian.
15 Odocob Kis Gunha odi qasali magimei uqa casac magen:
16 “Tibud madena, ‘Saen hibna odi leceb ija ageca bal cehec je oso eu odi mudigen.
Ijana loo je eu cunug age wawagana miadigen.
Odocob cisdocnaha jaqiadigen,’ ena,” gen. (Jeremaia 31.33)
17 Odocob uqa je eu tubdu maden:
“Ija agena silailca kobol me qee odocca eunu haun qee cisdugaun,” en. (Jeremaia 31.34)
18 Anut dana cajaca agena silail cagasiadeceb eunu nawel tawec ihanec dana age silail cagasecnu ihandoc eu qee nijiaun.
Ege wawige mele bahic eceb Anut cemenug lecnu
19 O wawige meleec cotiel, Jisas golacna ege silailca qee biluquna. Eunu ege ihoc Anutna jo gunna lecnu, odocob eunu cain cucuiuqaun. 20 Jisas uqa jo gun bahic euna lecnu jic haun huden. Eu lotoc ben oso cebecna fele cehec tawen eu cebac bilec jic euna gemona isec len. Jic haun eu cebac bilecca, eu Jisas uqadodoc deweg.*Jo gun bahic eu hamol gun bahic Anutna jo dunuh nijia. Ono Anut bilen. Wele nawel tawec ihanec dana ilo himec uqa hamol eu dunuh limei Anut cemenug bahic tawecnu ihoc. Dana oso ihoc qee. Odocob age Jisas deweg baladocobil na babalecna cal men saen euna lotoc ben tempel hamol gunna caqusec tawoloi eu ohisdec baladu ni mahana cali lecisdon. Age Mak 15.38 feiga. 21 Egena nawel tawec ihanec dana ilo uqa Anutna cuha jo cofdona uqa dana meca bahic. 22 Uqa ege wawige soidudu odoc me qee ege wawigena tebandolob eu ititacdugiannu uqa golac ege wawige dunuh bilisadu qigen. Odimei dewenige wa cataniecna wa joigen. Eunu ege wawigena uhulec eu cunug ititacdumeb Anutnu himec wawige mele bahic eceb uqa cemenug leqan. 23 Ege ceteh me sumudi biluquna eunu qasali madoqona eu ege gagadic hewecnu, cain felacuduqaun. Ege doqona, ceteteh cunug eu Anut mudigiannu wele maden eu mele bahic mudigian. 24 Ege wawige meleec cotigeil nalunuga mecebmecebecnu odocob kobol me odudocobdocoboqagannu tuliadecnu cisdoqale. 25 Ege wawige meleec cotigeil gami ceguli bilec kobol eu cain culuqaun, eu odi dana leih odogina. Tibudna deel eu dodoldona eu dogina. Eunu ege wawige meleec cotigeil gagadic madec cabi gagadic ocnu.
Ege Anut Melah cain hibemdoqaun
26 Ege mele jenu dodob hibna egedodoc egena gale gecna silail kobol toodu odifeb silail eu cagasecnu ihanec osoca qee. 27 Euqa ege geh cucuii gesiligec deel susumudi bileqan eu himec qa nijia. Odocob ja dain cahulec Anutna cad eundec cijadigiannu odi ciciji nijina. 28 Ege doqona, dana oso uqa Mosesna loo je wooldodob dana lecisfo, cijedfo odi fimeig uqana cahuldoc eunu qasali madeginafi dana eunu qee waloc adena. Odocob age dana eu qocobil cal mena. 29 Eunu dana Anut Melah hibemdonanu age adi cisdogina? Anut uqa Krais golacna egeca bal je haun cehen. Dana eu uqa Kraisna ihanec golac eu dana qagoc muden eu cewudina. Euqa dana eu ihanec golac eu ceteh gauc ena. Odimei uqa Kis eelgec uum igina eunu kobol me qee bahic odona. Uqa ameg me qee wadacdoc ben ugian. 30 Ge, Anut uqa odi maden uqanu ege doqona:
“Cahuldoc kobol wadacdoc eu ijana cabi.
Ijadodoc ameg me qee wadacdugen,” en. (Loo 32.35)
Odimei haun tubdu maden:
“Tibud uqadodoc uqana dana cajaca gesilec deelna gesiladigian,” en. (Loo 32.36; Buk Song 135.14)
31 Cebac Bilec Anut uqa dana oso ameg me qeena wadacdugiannu gagadic hewecebfi eu ceteh me qee, mumusacca bahic dana eu gulucdugian.
Ege wawige meleecna gagadic tawecnu
32 Euqa age saen wele bileinnu cisdoiga, Anutna fulacdoc oin saen euna. Saen euna age cabi gagadic adein, odimeig age dewenega geh tudoin. Euqa age gagadic mein. 33 Saen leih age dana cajaca cunug amagana madecebil tawoloig, odimeig amagana je me qee maadoloig, odimeig eu age me qee odadecebil culumen gahiduadoloig. Odocob saen leih age danaca culumen odi gahidoloig eu age gami ihol mimeig cesuladoloig. 34 Ge, age agena ceteteh bahic eu qee cedelein eu gaid ageca biligian ec wele doin. Eunu age dana cajaca age wawaga meleenanu gihacdoc jona bileinnu waloc aden. Odocob saen leihna dana agena ceteteh cediadein qa age ceelecca hawaadein.
35-38 Eunu age kobol me wele odoin eu cisdoiga. Age wawaga gagadic meleecebfi age ameg me bahic oqagan. Age gagadic tawifeig Anutna je ihoc toodoqagan. Odocob ceteh me eunadec wele Anut adigia maden eu oqagan. Uqa maden:
“Eu saen cecelac qee.
Saen nag bahic odi himec dana hocnu madena uqa hugian.
Uqa qee daleeiaun.
Euqa ijana dana cajaca ititom age wawaga meleeceb cebac biluqagan.
Euqa oso uqa waug meleec eu culifei ija wawi uqanu me qee meiaun,” en. (Habakuk 2.3-4)
Eunu agena wawaga meleec gagadic eu cain culuwain.
39 Euqa ege dana cajaca wawaga meleec felacudimeig fadalegina odi qee. Ege Anutnu wawige meleeceb uqa cahahagigian eu odi.
*10:20: Jo gun bahic eu hamol gun bahic Anutna jo dunuh nijia. Ono Anut bilen. Wele nawel tawec ihanec dana ilo himec uqa hamol eu dunuh limei Anut cemenug bahic tawecnu ihoc. Dana oso ihoc qee. Odocob age Jisas deweg baladocobil na babalecna cal men saen euna lotoc ben tempel hamol gunna caqusec tawoloi eu ohisdec baladu ni mahana cali lecisdon. Age Mak 15.38 feiga.