8
Jisas dana oso lepraca me muden
(Mak 1.40-44; Luk 5.12-14)
1 Jisas uqa aluh culimei toni nuen. Toni nunuen dana cajaca am ben bahic toodu belein.*Age je eu Matju 5.2na nijia eu feiga. 2 Jisas nunuen hag dana oso deweg lepraca uqa Jisas fimei uqa limei Jisas olana gob cecehi Jisasnu cuha fefei cesusdu madon, “O Tibud, hina ija me mitiga hecebfi hina me mitecem ijana hag culteceb ija Anut amegna cataniec bilecnu ihoc,” don.†Juda agena loo je oso nijen eu odi. Dana osofo, caja osofo uqa lepra hagcafo, hag eundec osocafo bilecebfi uqa Anut amegna gegehinca bilen ec maden. Odocob eu uqa uqana hag qee men ec cisdon saen euna uqa ihanec dana fecidocnu nuen. Odocob ihanec dana uqa danafo, cajafo hagca qee eu fecebfi uqa danafo, cajafo eu qila uqa Anut amegna cataniec bilina ec maden. Age Wok Pris dac 13-14 feiga. 3 Odocob Jisas eben huleldumei deweg qududodoi madon, “Ija me mihiga tena. Me maga!” don. Saen eunadih lepra hag eu uqa dewegna culdeceb deweg hul hon.‡Juda agena loo je osoha nijen eu odi, hina ebenna dana lepra hagca deweg qududufeg hinaha Anut amegna gegehinca biligian ec maden. Euqa Jisas uqa dana eu deweg qududon saenna uqa gegehinca qee calel. Uqa dana eu medocob uqana hag qee men. Odimei uqa cataniec calen. 4 Odocob Jisas cahacdu madon, “Dah maga, ceteh inu oso cain sadudu cobogaun. Euqa li nawel tawec ihanec dana eu hina dewen ihacdocom maleldugian. Odimeg Moses loo je wele maden eu toodumeg hina qila me biliga dana cajaca cunug ihacadecnu Anut ihandogale,” don.
Jisas uqa Rom agena han ilo dana 100 cofadec oso uqana cabi dana me muden
(Luk 7.1-10)
5 Jisas uqa Kapaneam jobon dunuh lelen Rom agena han ilo dana 100 cofadec oso ono uqaca hu ninidudu madon, 6 “O Tibud, ijana cabi dana ijana jona hag nijia. Uqa laleg men deweg geh dain dona,” don. 7 Odocob Jisas uqa jejeg hewi madon, “Ija hinaca belimeu me mudihigen,” don.§Juda dana age Juda dana qee eundec osona jona lifeig age Anut amegna gegehinca caloqagan ec cisdoin. Eunu age agena jona lecnu qee gale adena. Age Aposel 10.28 feiga. Euqa Jisas uqa eunu qee cisdol. Uqa Rom dana uqana jona ligian ec maden. 8-9 Euqa Rom agena han ilo dana 100 cofadec uqa madon, “O Tibud, hina ijana jo dunuh lecnu eu ija dana me bahic ihoc qee. Faga, ijaha ijadodoc han dana ilo oso bisalu biligina. Odocob ijaha han dana leih ija bisalu bilegina. Ija oso nuuga ecemin nuina. Ija oso hoga ecemin hona. Odocob ija ijana cabi bega meh dana odi odoga ecemin uqa coni toodu odona. Eunu hina je osol madecem ijana cabi dana hag medugian,” don. 10 Jisas uqa Rom agena han ilo dana 100 cofadec je eu madeceb dah mimei tumatumai toodoin eundec maaden, “Ija mele maadigina, ija waug meleec uqana bilina cinigwe Isrel gemona oso qee gulucdolom!” aden.
11 “Ija age maadigina, cam tobi becnadecca cam toni nocnadec ha mati hoqagan. Age Ebrahamca, Aisakca, Jekobca gami sao cul jobon ono sab jecnu biluqagan. 12 Age odi bibilegin Isrel dana cajaca Anut uqa age sao cul jobon bilecnu nesili ehaden eundecqa Anut ititacadeceb jobon hahagum limeig tu gagatuccana biluqagan. Ono dana age qada qaqaji maimaga kicodudu biluqagan,” aden.
13 Odimei uqa Rom agena han ilo dana 100 cofadec madon, “Wawin meleec eu toodu odihiale. Hina gad nuuga,” don. Madodon euna bahic Rom agena han ilo dana 100 cofadec uqana cabi dana hag medon.
Jisas uqa Pita momoig me muden
(Mak 1.29-31; Luk 4.38-39)
14 Odocob Jisas uqa Pitana jona limei uqa Pita momoig hag deweg daincaca hulec ninijen fen. 15 Odimei uqa hagca caja eu eben qududocob uqana hag culden. Odocob uqa cajimei sab jec saciadumei Jisas cewel uten.
Jisas uqa dana cajaca mati bahic me maden
(Mak 1.32-34; Luk 4.40-41)
16 Odocob wesu meceb dana age cotogail mati dewenega buga me qee hewadein eundec cedadecebil Jisasca ahoin. Odocob Jisas uqa buga me qee je maadeceb dana deweneganadec cali hu belein. Odimei dana cajaca cunug age hagca me maden. 17 Uqa je hahun madec dana, Aisaia, uqana jaqec je ihoc ligiannu odi odon. Jaqec je eu wele odi maden,
“Uqa egena hag filfil cedi gahidu nuen,” en. (Aisaia 53.4)
Jisas uqa uqa toodocnu kobol eunu maden
(Luk 9.57-60)
18 Odocob Jisas uqa dana cajaca am ben bahic talildu tatawegin fimei uqana malogom maaden, “Ege wa gad cagoc cool ono isec beleqan,” aden. 19 Odocob loo je iwaladec dana oso Jisasca humei madon, “Iwalgec, hina anaana nunuem ija toohigen,” don. 20 Odocob Jisas jejeg hewi madon, “Qa cus agena helona nijegina, odocob man fululec agena teicna nijegina. Euqa Dana Melah uqa us nijec cudunca qee,” don.**Jisas uqadodocnu uqa Dana Melah en. Dana Melah eu Mesaia ijan oso. Eunu Jisas uqa dana Anut uqana dana caja cahahaadecnu wele nesili ehuden eu ija ec maden. 21 Odocob malogom oso uqa Jisas madon, “O Tibud, cultecem ija casac ceseli nuimig mei heel cisigen,” don. 22 Odocob Jisas jejeg hewi madon, “Cal mec dana culadecem cal mec eundec agena heel ciseigale. Hinaqa ija tootaga,” don.
Jisas uqa gugula macasca maaleceb manin tilien
(Mak 4.36-41; Luk 8.22-25)
23 Jisas uqa wag osona tobocob uqana malogom toodu toboin. 24 Age nunuegin ququlubadecwe gugula ben neceb macas††Macas eu Galili wa gad cagoc. me qee meceb caji qahi wag dunuh qelen. Euqa Jisas uqa us nijen. 25 Odocob malogom age li Jisas tulidudu madoin, “Tibud, ege fadalecnu odoqona. Cahahagagale!” doin. 26 Odocobil uqa maaden, “Oe age wawaga meleec meca qee. Eetanu cucuiegina?” aden. Odimei uqa caji gugula macasca cahacaali maaleceb manin tilien. 27 Dana age eu oodon fimeig tumatumai madein, “Uqa cel dana fufuca macas qahecca uqa co toodu odosina?” ein.
Jisas uqa dana lecis alena buga me qee ititacaden
(Mak 5.1-17; Luk 8.26-37)
28 Odocob age nui Gadara agena hatuna calein, eu Galili wa oc naha isec. Odocob dana lecis buga me qee hewalein eu ale qalqal hatinnadec cajimesi Jisas gulucdosin. Ale cus bahic. Eunu dana age jic euna nuecwe qee. 29 Odocob ale jejenela suli u madosin, “O Anut Melah, hina ege eeta odigegan? Saen qee calel hina ege me qee odigecnu hogafo?” dosin. 30 Aria, ho am ben oso ono isec sab jiji coboin. 31 Odocob buga me qee age Jisas ninidudu madoin, “Hina ititacgifeg ho am euna sulgecem age dewenegana leqan,” doin.
32 Odocobil Jisas maaden, “Beleiga,” aden. Odocob age dana lecis cuculaleig ho dewenegana lein. Odocobil ho cunugca aluh qeihqeih guguli nu Galili wa gad cagoc dunuh gotoimeig cunugca odi wa jimeig cal mein.
33 Odocobil dana ho cofadoloig eu age fimeig busali belein. Age taun ben limeig ceteh cunug calennu dana cajaca maadein. Age ceteh dana lecis buga me qee hewalein aleca calen eunu saadein. 34 Odocob dana cajaca cunug age taun euna bilein eu age limeig Jisas gulucdoin. Odimeig age Jisas fimeig dana Gadara agena hatunadec cunug Jisas cuculadi nuigiannu ninidoin.
*8:1: Age je eu Matju 5.2na nijia eu feiga.
†8:2: Juda agena loo je oso nijen eu odi. Dana osofo, caja osofo uqa lepra hagcafo, hag eundec osocafo bilecebfi uqa Anut amegna gegehinca bilen ec maden. Odocob eu uqa uqana hag qee men ec cisdon saen euna uqa ihanec dana fecidocnu nuen. Odocob ihanec dana uqa danafo, cajafo hagca qee eu fecebfi uqa danafo, cajafo eu qila uqa Anut amegna cataniec bilina ec maden. Age Wok Pris dac 13-14 feiga.
‡8:3: Juda agena loo je osoha nijen eu odi, hina ebenna dana lepra hagca deweg qududufeg hinaha Anut amegna gegehinca biligian ec maden. Euqa Jisas uqa dana eu deweg qududon saenna uqa gegehinca qee calel. Uqa dana eu medocob uqana hag qee men. Odimei uqa cataniec calen.
§8:7: Juda dana age Juda dana qee eundec osona jona lifeig age Anut amegna gegehinca caloqagan ec cisdoin. Eunu age agena jona lecnu qee gale adena. Age Aposel 10.28 feiga. Euqa Jisas uqa eunu qee cisdol. Uqa Rom dana uqana jona ligian ec maden.
**8:20: Jisas uqadodocnu uqa Dana Melah en. Dana Melah eu Mesaia ijan oso. Eunu Jisas uqa dana Anut uqana dana caja cahahaadecnu wele nesili ehuden eu ija ec maden.
††8:24: Macas eu Galili wa gad cagoc.