PORI MA KAN DÁDASÍEN KORINÍ NANIN BANTA UVAMAN AMEIN BOMPON MINO
(2 Korini)
Kan Dádasí En Ma Korini Uvanteí Pákena Afova Vaya Ino
Ma vompon ma uvantein banta ino.
Baya varen orin banta Pori ino.
Uvarein orana ino.
AD fifti-sevenifin mino. Esé bompon uvádan manáa viyon orivin mai oyampákéi ma vompon uvanten mino.
Ma vompon ma uvantein baru ino.
Kiriki varafin bain baru Masedoniá ino. Taitasi ma Koriní me ampiren ma evaránen ovan mi uvaren mino.
Ma vompon ma uvaman amikhein kéká ino.
Koriní barurá ma monó tiyan mumunan iyain nanin bantafin mino.
Nái ana vará ma vompon uvanten nafino.
Koriní baru ráké kampun afova amin banta kayo ano Porini vaya varen orin doran má pura sikhein kama vaya ma sian dákó iyain ma san ma uman amiyain nan mino. Pori vei yoran má Yisasini kama vaya ma siamiyain ma san mi esé araí in ai (sapta) kayofin ákonaen tian amá ukhen mino. Yerusaremí ma monó tiyain nanin banta ma ayain moní ma karú darú in má inká Taitasi ma Koriníké ovaránen erin nain damu san ma sikheí páken nan sapta eiti vá naini vápin tikhen mino. Monó nanin banta vá ma ará manafiní in avúavákái Pori orikhen mino. Sapta teni (10) fin amen avaya ano manáa mo enará ukhen mino. Sapta teni (10) ráké tetini (13) fin ma orikhein mai manáa nanin banta ano ma ída ará baeran báken Porin uman amiyan ará namu uantiyan baya ino.
1
Porini Amusin Baya Ino
1 Yisas Karaisini kama vaya varen mo vanasi siamino van ma Tiyarafenu ano vei anunurá tivíká ein banta séi Porin má inká tetisi kama sifá tiváe Timotin má anon ma vompon uvaré uno.
Mai ma Koriní barurá baona monó nanin banta kayo vá inká Ákaiá barafin má ma mumunan kéká baonafái uvamádékun oren mino.
2 Teti Sifóe Tiyarafenu vá inká Bafan Yisas Karaisini sarisari vá ará kusin má ano siretin má banten mino.
Tiyarafenu Ano Ma Minó Nanin Banta Ará Kusiantein Baya Ino
3 *Rom 15:5Tetisi Bafan Yisas Karaisin Afóe Ayarafenun avisá daní ó tifano. Mai véi anon tetin nan arunan uren kusin timé iyan mino. 4 Teti ma umampin oré tifékun ma véi setin kama uren kusin timé iyainí esá ena nanin banta ma umampin orintí maé kamaé aya ékun ná kusin barano. 5 *Íbo 34:19Mai fara vara seyo, Yisasi ma vareiní ukhein uman ma seti variyaruna van mi Tiyarafenu ano Yisasin pinté uaren tetin moékan arunan é iyan mino. 6 Máan tiyantí tetí ma uman baranuna anon tiretin ará kusiantantin Tiyarafenu ano siretin kanaíen aya uren evaránen aviranten mino. Mai fara vara seyo, Tiyarafenu ano ma setin tirá kusisintan nain manon tiretin ará ákona uantanten mino. Máan ma urantiyan bempáké báke mai ma setí ankan bariyarunaí ukhein uman baran nono. 7 Tetí ankan ma ákonaé iniyaruna mai ma seti variyarunaí ukhein uman ma siretí ankan má dere varesin maen Tiyarafenu ano siretin mái ará kusin aminten mino.
8 *Apo 19:23; 1Ko 15:32Mumunan tiyofi sifá tiváeyan noe, Esiá barafin ma setin timaniná afoká ukhá ein uman afová ono van muno. Kákan uman urói afoká uven tetisi ákona maman bararasí uraká tetí ankan puronté uno sé inikhá uno. 9 Pura ino. Tetí ankan purimpin tisintákaren mifo mai yaná ma yákó ein nan ída setisi ákonará ino sé iné tifanté umpo fúká ein ma evaránen avían manté iyain mai Tiyarafenui ákonará ino sé uno. 10 *2Ti 4:18Tiyarafenu ano furin pintena setin tiya uren tivíkein béi ano anan ena ena setin tiya uriyan tiviranten ne sé iniyá ave ukheruna mai yaná afoká inten mino. 11 Tiretí ankan ma setin tiyae amúkeona vá inká kokhon nanin banta ano ma amúkein mái Tiyarafenu ano iniren mi setin tarisari uren tiya ukhein kokhon nanin banta ano setin too varen béin tusu siantanten mino.
Pori Ma Orono Sikhá Ein Nan Ma Sirun Noe Sein Baya Ino
12 Máan tukhein nan mi setiyan timo siyá uno. Teti ma siretin má báké ma siretimpin má inká ena nanin bantafin má ma yoriyá eruna mai fura sen puntákein inin má avúavá bá ma Tiyarafenu ano simikheintái yoriyaré uno. Ena nanin banta vá tiretí ankampin má ma yoriyaré eruna mai ída setisi ákonará ifo Tiyarafenui sarisarirá ino. 13 Tiretí ankan ma kasae yankáde afová oren bompon mi séi uvaman amiyaruna manáa yamú ma oriyantiyan teti ma siamiyaruna vaya oman afova suron inono. 14 *2Ko 5:12; Fir 2:16Taréa setinti vaya ana manáan afová iyaona ínaimpáké minó afova ureya Bafan Yisasi ma ovaránen erin nain damúi siretin ma amo siyarunaí eya setin timo sin nono.
15 Mai fara vara seyo, siretí ankan nare o ódékuya kan dádasí e avu varano van mi sirá mantiyá inikhé uno. 16 *1Ko 16:5-6Téi ma inikheruna mai Masedoniá barafá ma oronté tiretin e oné orikharé ma ovaráné erenté maé tiretin má e vákuya mai ráké aaí usintesí Yudiá barafá oronté uno.
17 Ma vaya ma sian damuáderuna van tiretí ankan ten nan ineine uren ifá inten minó té iniya rafono. Ída ino. Mai ma vara ráke nanin banta ano ma vaya sian damiyan ma varanté uno sen inká ída varanté uno sen uren ma mai yaná kasaen bariyainisá iya rafuno. Ída ino.
18 Tiyarafenu ano minó bei vaya ánain mi yakhafé iyain bantí pasé máan manan onté uno. Téi fura siré tiretin tiamiyá uno. Téi ma siyaruna vaya kayo mai séi ma varanuna yana san mi fura sé tiyá uno. 19 *Apo 18:5Mai fara vara seyo, Tiyarafenu Anin Yisas Karaisini vaya fefái sen má Sairasin má inká Timotin má ano siamiyáké béimpin eyo sin manan ban mifo mai ma arakhéké iyan ída ino ma sin má eyo ma sin má béimpin ída vane séku inikha ono. 20 *Rev 3:14Mai fara vara seyo, Tiyarafenu ano ma iyáantan baya kokhon uron mi varé íkan Yisasi ano mai vaya kayo me kanaí ukhen mino. Máan tukhein nan mi setí ankan mai véin pinté uaré pura ino siyáké maé Tiyarafenu aví daní é iyá tiféuno. 21 Mai van mi Tiyarafenu ano setin má inká tiretí ankan má aní uren mi setin ákona simiká Yisasin má manafin báké mantaan ákona ukhé tiféuno. 22 *2Ko 5:5; Efe 1:13-14Máan tukhékun pasen kokhon daná ma setin timeno van ma kaúdákein pintena Kantá Aunan pói araíen aní daná tetin túpin kain eravíkan tetin maman bei vanasií ukhen mino.
Pori Ma Ída Ainen Evaránen Koriní Barufá Orein Baya Ino
23 Tiyarafenu ano séin afová ukhái furan tiyá uno. Tiretin uman amenaen tiré Koriní barufá ída ainé evaráné oré uno. 24 *1Pi 5:3Tiretin amusin ameno van mi siretin má doriyá umpo ída siretíi mumunantá dafisintó uno. Para vara seyo, mumunampin pefái mantaan ákona ukha rono.