Aposerm namo nefm
Barkof kfo nuhas mrokfom
Ndar Aposer gonborngt yorhwa mrokfom, Lukr gutnius gonborngt wandfahato wandfa tmbhonimo mrokfomn ndmn wandfamor. Ndar Aposer gonborngt to Lukrn wandfamort. Nd aposer hingrneft Bro Nkifrarn yak nuhas bonuhas yo yak hta bohtamotrm Jisasrhu gutniuskfot Jerusalemr yo Judia Sameriafhu kmi kmim hingrna htfas buganihato tfit nda bbinysofthu kmi kmim hingrna htfasmom (htikfot Luk 1.8).
Nda aposer hingrnefthu mrokfom yorhwa rfa borngtn hti hikrahnt Jisasrhu sioskfot waburakmo tkitt. Kristen sios bromo tkitt htirahnt Judampno ndha waburakmot. Ndha waburakhato kto kmi kmi thu yufurnimot. Nda gonborngt Kraisr hingrnayuk hingrnefti yo kmi kmim rorhu hingrneft htihato yakhikmo yuhat htirahnt be tu Bro Nkifrar Isrermpno kfo htamo yuhatn fak hik twanhomot.
Wom bro mrokfot nda Aposer gonborngt yorhwat, Bro Nkifrarhu Yafothathu hingrnef yuhathu kfo nuhas mrokfom korhmt. Barkofpam afo tu Jisasrhu disaipermn nd Bro Nkifrarhu Yafothat Pentikos yiha mithu nawohhato bbuka rifhur fakmom.
Ndar gonborngt htirahn aposerm yihato wom met yindarimpno gutnius mrokfom kfo ptha nuhashemoahat nhai be yudbat kfo tmbhonirmoamm mrokfom. Nhai. Yuke yuke mrokfom pthamoum. Nd neft htitnom nd yuhatn gutniuskfot yakhato toh bmtamom.
Ndar gonborngt kfo tndh hikmotm bok aposer yimaroh hingrnefm, womroh tndhm rom be inji tndhni hanymotm, Pita Porrof namo nefroh tndh yuhamn tu mfro tndh hik bohikmotm ndar Aposer gonborngt. Pitar tor wom yimar Jisasrpno wiyauyau htfasmoa yimar. Porrne nhai. Ror be inji nndo tohhato memour, “Jisasrhu sioskfot ayak bebobebkohtant anohnit.” Porr inji na hanyetrn Jisasr nakumorr. Nakuyakhato be rorn barkof yimar tohmor Jisasrhu hingrnefthu yakitohyuk yimar.
Lukr Porrhu tndh mrokfom kfo hanymoahat Lukr tfit kfo nhaftik hany memour “nom”. Inji kfo nhaftiknimoatr bok yimam, ndar gonborngroh mrokfom hti hik bohiket yimam, inji htihato duka memom ka Lukr tur kfo nhaftiknimoa tkitm ka Porrpno wom yiham rpat kau htfasmoum. Ndnetrn kfo memour “nom”.
Aposerm Jerusalemko yihato Jisasrhu mrokfom kfo pthahemo yuhat
1
(Sapta 1.1—8.3)
Jisasr kfo memor, “Tu Bro Nkifrarhu Yafothat thu nawohrahtko”
O Tiofiluse, na Luka bi na barkof wandfamo gonborngtn bi wandfa bugamoyanm Jisasr ndar bbinysoft tohhato namoa nefm yo ror hingrnamoa hingrnefm. Ror ndar bbinysoft tohhato rinakmo nefm yo ptha nuhasmo mrokfefm wandfa buganimoyann tu wuroh mrokfomn ror nohhato tfit hefenr muhmo yuharoh mrokfom htamoyanm. Tu wuroh sinyanineftpno Bro Nkifrarhu Yafothat thu kasinyamottr tur aposer hingrneft yak htamo yimaroh hingrna yuham kfo hta bohta tanymorm. Barkofpam afo krhopam yakhato nohmor. Kto tfit sinyahato yima nfrir tohmor. Yima nfrir tohhato ufaufaumor. Ufaufau-moatr turhu aposerm tafontn nahtihato napthamoum. Ndhtet nefm namoatr htihato duka memom, “Asor sinyern tohwor.” Foti yiham tohmor. Tohhato yimam Bro Nkifrarhu kingdomkfot kfo nuhas bonuhasmourm. Wom yiha turhu aposerm yak nhafohhato kfo memorm, “Na bi yifiya niko mirahko bi kmi Jerusalemt ahtanynomt. Nann kfo memoyanko, tu Bro Nkifrarhu Yafothat afo hirahrko. Hiyafruhatrko ee btn waiswako. Jonr ndar tek furaroh bupaye, baftaisimworm. Bro Nkifrar ror dfik yiham turhu Yafothaye baftaisimrahrko.”
Aposerm Jisasrpno narhu rifinymohat aposerm sinyahato Jisasr wom ttiwon mrokfot kfo ttiwon memomr, “Bro Yimaye, ka asor ndar yiharn Isrerm thu bmtaruhatnm bbukeft yakhato tum king yakhato tum ritohakrahm?” Tfit Jisasr sinyahato kfo memorm, “Nd niko ttiwon mrokfot, nhai be nikmoh fijo bi wakfakkfot. Tu Bro Nkifrarn be afo htiyafo hanykfot. Turhu fijo dukaruharn hirahrko. Niko inji adukawahko, niko tu Bro Nkifrarhu Yafothat mithu nawoh-ruhattko mrokfo ptha bbuka rifhur yakrahkomr. Nd bbukeft yakniruhakomn, Jerusalem, Judia, Samaria, yo ndar bbinysofthu kmi kmim nanhu mrokfot ptha htfas buga habrirahkomt.”
Jisasr hefenr muhmo yuhat
Wuroh wuroh mrokfom kfo ptha nuhas tany bugamormn, be Bro Nkifrar yaknimorr hamuhmorr. Aposerm tohhato htiyafo hanymomr ror hir hamuhmo yuhat. Wuroh gribpam fknenimotr be hti hambrafmomr. 10 Yuhre inji yukatoh hasetmn asha wom ganyom rmontha hmbreyet yimaf rom toh hasomo tkitt mitohmof. 11 Mitohhato kfo memofm, “Galili thofko tamohmpno be mfro yukatoh-wako? Nd niko htiyefi yimar, kto tfit inji wuhtiyakrahkomr.”
Judasrhu tkitt yakmo yimar
12 Aposerm Jisasr mtoh kafhomo kmithu yufat, Olifet kmit. Ndha toh hasohato tfit Jerusalemko wohnemom. Olifet kmiti Jerusalemt nhai wuri wuri rhukahf. Be wan kilomitakforpat yaunihato wom kmit mifnahkfot. 13 Aposerm Jerusalemt mifnahhato tum toh tanymo kunyshu wom yura rhuyuk tikrpar mrhu rifiny bugamom. Nd rifinymo yimaroh yufame Pitar, Jonr, Jemsr, Andrur, Filifr, Tomasr, Bartolomyur, Matyur, Alfiusrhu yon Jemsr, Selot grufkfothu yima Saimonr yo Jemsrhu yon Judasr. 14 Nd nd yimami ee Jisasrhu mmem Mariati wom metme Jisasrhu nmemrom, inji inji yi rhu rifinyhato rroh yima yuhum rpa yima yuhurpar rhuhato kfo bruttna hasomoum.
15 Inji kfo bruttnamoatm bok yimam rifinynhomoumm. Wom yiha 120 yimam rifinymotm Pitar tohhato wom mrokfot kfo memorm, 16-17 “Barenko, Judasr afo nompno rpat tohhato rpat hingrnamounom. Bingot Bro Nkifrar Defitrn mthu nawohhato wom mrokfot Defitr pthamort. Nd mrokfot Bro Nkifrarhu rfa borngtn korht. Tu fipet mrokfot pthamort. Bi Judasrn nd kfomo mrokfot rhumot. Rorn yahr kmim hasinyahato Jisasr fakmomr.
18 Judasr Jisasr hndhnahato yakmo maruham bbinysoftn wiknamor nd maruham. Kto tfit tur wiknamo bbinysoftn yatit mifrtfohhato danyrn frtnehhato wirto grmt yuhtt fnahmotr. 19 Kto Jerusalem thofm Judasrhu misuhhato yatit mifrtfohhato wirteft fnahmo nmbuhat wanyhato nd ror mifrtfohmo tkitt futamoumt Akeldamat. Akeldama yufathu yumbu yuhate, yima kkut.”
20 Pitar Judasrhu rrfathu yakyuk yimarhu mrokfot kfo memor, “Windoh gonborngtn kfomot,
‘Rorhu kunys be inji yima toh duha arhunitwat.’ Sng 69.25
Tfit nd windoh gonborngthu wom tkittn kfo memot,
‘Ror yakitohnamoa hingrneft tfit wommn yakkfot.’ Sng 109.8
21 Ndnettn rorhu rrfathu yakyuk yimar yak htakfot. 22 Yimar yak htaneft htikfot, Jisasr Jonr baftaisim-moahat, Jisasr ndar bbinysoft niahato hingrnefm rihingrnakhato kto nohnihato muhmo yiha rpat nompno rpat tohhato hti bugerm nd nefm, tor nd yimarn yak htakfot. Yak htahato rorn Jisasrhu sinyamo mrokfo yuham pthanho htfasrahrnom.”
23 Pitar inji ptha buganimotr hus yimaf fak htamom. Barkofr Josefr, wom yufat Barsabas Jastusr yo wom yimarne Matiasr. 24 Nd yimaf yak htatahato Bro Nkifrarpno kfo bruttna-mom. Kfo bruttna memom, “Broye, yima yimaroh yima yuhum ninn htitwonm. Ndar nom yek yimaf ninn htihato wayak nuhasnnom. 25 Fitohrn ni yibonwa Judasrhu tkitthu yakyukr, ni tunn wayak nuhasnnom. Judasr nohhato nd aposer hingrneft bi htanymortn bi yimor Maringour.” 26 Inji kfonihato yo yufayet tahiham tuhato kfo nhta memom frohrn nd hingrneft yakruhart. Be Matiasrn Judasrhu tkitt yakhato aposer hingrneft tohyuk wom 11-pelakfotpno rihingrnakmor.