2
Bro Nkifrarhu Yafothat yawihnamo yuhat
Judaroh wom bro yihar kutewumr Pentikos.* (2.1) Nd Pentikos yihar, Pasofa yiham rhu hanyhato fiftiyuk marrpno tfit Pentikos yiham riruhakmom. Nd Pentikos yiharoh riruhakyuk barkof marrn Jisasr hiket yimam rpa bro kunyrpar yihato rifiny bugamom. Rifinyhato rhu haso hanymom asha yura moun yuhatn wuwanyakmom wifort kanjo wumir nadidar sinyamohat. Nd nadidareft yimotn nd rom rhu hasomo kuny yuhtt nadidaraknimot. Asha tfit htiyaf hanymom kah funefm yima toren kanjo rhu hanyhato yimaroh mfhamn mitoh nhombra hanymom. Nd kunyr rifinymo yimam Bro Nkifrarhu Yafothat thu kasinya hanymottm kmi kmiroh yarmumat ptha bugamomt.
Nd yihar, Judaroh bro yiharn, Juda yimam boririfhut yak hiketm wuri wuri kmim toh hanyukm yimomn Jerusalemrpar rifinymom. Nd kmi kmi tohyuk Judam nhai rpa yarmumat pthetrpam rifinyrmom. Nhai. Nndoh nndoh yarmumat pthetm rifinymom. Nd nadidareft wanyhato memom, “Afo ai ahtinom.” Yimomn asha be mwany fhtas hanymom nd yiro kunyr rifinymo yimam nndo nndo yarmu-mamn pthamoumm. Womr yi mtoh-hato memour, “Awanya,” turhu yarmumatn pthamoatmt mrokfot wanymourt. Womr nhaf inji. Memour, “Amtoh awanya,” turhu yarmumatn mrokfom wanymourm. Be nd Judam inji mwany hanyhato tum rinahti nahtihato nnakfo memom, “Barenko, ndarm nndo Galili thofem. To tamohmpno kmi kminom pthiwa yarmumatn mrokfom pthiwatmm wanukwanomm? Nom asha Jeru-salemt nia rifinywanom kmi kminom rifinywonom. Nom Partianom Midia-nom, Elamnom, Mesopotemia distrik thofnom, yo nom Kapadosia, Pontus, Esia, nd nd distrik thofnom. 10 Yo Frigia Pamfilia distrik tohyuknom, kantri Ijift tohyuknom, Libia thofnom brbo taun Sairinitpno tohwanom yo kantri Rom thofnom be yifra yaus niayuknom. 11 Yo nom Judanom yo wom kmi thofm turoh nefm htany-hato nom Judanmoh nefm yak hiketm, Krit thofnom yo Arebia distrik thofnom. Nom nd nd kmi thofnom, to tamohm-pno kmi kminmoh yarmumamn Bro Nkifrar bbuka nanyjarefmpno niwa nefm pthiwatmn wanukanomm?” 12 Be nd Judam inji htihato be tuha mrokfo duhatm tohmom. “Nome ndarte tamoh neft yorhwat.” Tum inji rinakfo nakfomom. 13 Womm kfo memom, “Nd yimam niko mirahko nko tamohrn fknitrm kmi kmiroh yarmumam pthewum. Ndm nndo bupa ye mumimn ptha mmo bomumiwum.” Inji kfo huta bohutamomm.
Pitar Kraisr toh hanyruha yiham kfo pthamo mrokfom
14 Pitari wom 11-pela aposerm rpat sinya tohmomn Pitar kfo memor, “Niko Judako yo niko wom womko niahato nompno Jerusalemt nia rifinywako asomif yorhneft nann ptha ntreyafrhotant afo wawanyswako. 15 Asomif yorhneft htitawokomn womm kfo famumnom, ‘Bupa yawomn kfo ptha mmo bomumiwum.’ 16 Wahtiko marr yuhre asomif mfnahwor. Yuhre 9 kilokkfoyet. Ndhtet yihar nom nhai bmbri bupa nuwa mye fnahkahnom. Nd niko asomif htitawo neft to mirahko profet Joerr ndt ka nhai kfo pthamort. Nhai. Profet Joerr ndt bi pthangotmort. 17 Kfo memor,
‘Bro Nkifrar kfo famur, “Kraisr toh hanyruha yiham nanhu Yafothat tkrurafrhotant
met yindar bugam Yafothat mithu nawohhato thu dbothatruhattm
tamoh tamoh nefm kto rhuyukm bi romn kfo ptharuhatmm wanyrahmm yimam.
Metenm yindariyenm rom ptharahm.
Damiagm rom yimam hwe tweh hanita kanjo rom hti hanyruhamn ptharahm.
Bro yimam bi kunyrpam ruhetm rom nhaf tweht htihato ptharahm.
18 Nanhu hingrnefm yakitohwa tuhan yindars rom nhaf kfo ptha bugarahm.
19 Mounti bbinysoft nndo rhuruhatf htirahmf.
Kah hipefr thu sinya thombat mirahm ka kku rmontharn faknattmf.
20 Mount mirahm ayukatohnomt htirahmr marr yarmbon tiftarahr.
Yamt htirahmt mirahm nndo kku baritn hirwot.
Ndhtet ndhtet nefm rhuniruhatm bt Bror nierahr.
21 Nd yihar yimam Bro Nkifrar nakurahm hbhakneft yudbat yakrahrm.” ’ Joel 2.28-32
Tom bingot pthamo mrokfom.
22 Niko Isrerko na kforuha mrokfom wany marnyaf hanyswakomm. Nasaret thof Jisasrhu mrokfom ptharuha. Nd yimar miraker hingrnayuk bbukefti dbohnet yimaroh bbukeft hehato kfo tkrurafmorr. Ror nd bbukeftpno ndar bbinysoft bok nefm namotrm htimokomm. 23 Nd yimar niamohat nikmoh tirmn htamorr. Bi turhu dukeftpno inji htamorr. Rorhu dukeft duka memor, ‘Rompno toh hasoruharn fasoh nefm nayet yimamn htaruhatmr nohrahr.’ To bi htamokomr. 24 Htamohat nhai wundiat nohnirmor. Nhai. Tfit tu Bro Nkifrarn kasinyamotrr tfit sinyamor. Bro Nkifrar nhai wofnrmor nd noh yafotharn Jisasr yaktakfot. Yudbat fak thumort nd noh yafothat. Nd nohyuk tkitt nhai Jisasr yak tkafkfot. 25 Defitr Jisasr nohhato sinyaneft kfo htamort, memor,
‘Na htitanr Bror be nanpno brbo mfrtkafwor.
Ndnatn nhai nanhu yima yuhur be bmbri woh dbuknaknikfot.
26 Ndnatn nanhu yima yuhur marnyewarn windoh ptha yindhorwa.
Bro Nkifrar kfomo rhu marnya yihar, ndr rhu gari hasiwa.
27 Bro Nkifraye na nhai kfo miruhatn bi nohniyet yimaroh kmitn atohtwar. Nhai.
Ni bi tunn kfo htayet yimar nhai kfo miruhatn yoptn amibdgnir.
28 Wom nfri tohefthu toh yuhat to bi fak nuhasmona.
Nd nfri toheft na tohneft, be tunn toh tkafrhotna
na be yindhorhato tohruha.’ ” Sng 16.8-11
29 Pitar wom mrokfot yakhato kfo memor, “Barenko, nmoh nkifra Defitrhu mrokfot ptharhotant wawanyswakomt. Nd Defitr pthamo mrokfot nhai turn yirmot. Defitr ror bi nohngotmotr fopmomr. Rorhu yopt tot yuhre rhu hanitt. 30 Defitr profet hingrneft tohetrn Bro Nkifrar bi kfo hta memorr, ‘Ni yakitohwa king hingrneft kto tunhu frika yuhathu yonrn nd hingrneft yakitohrahrt.’ 31 Nd Defitr kfo memo nhai nohniyet yimam yita tkitt yiho tohruhatr, yo nhai mikfe bdgniruhatr, nd hus mrokfo nmbuhaf nhai tur kformor. Nhai. Bro Nkifrarhu dukefm yakhato kfomor. Bbinysof thofroh minrfa htiyakyuk yimarn kfo pthamor. Nd yimarn nohruharn tfit sinyarahr. 32 Nd yima Jisasr yopt bi ruhetr Bro Nkifrarn kasinyamotrr tfit yafothetr rhumor. Nd yimar sinyamohat nom hti bugamonomr. Nom tunomn htihato rorhu sinya yuhathu mrokfomn pthewunom. 33 Jisasr bi sinyanihato hefenko muhmor. Tu Bro Nkifrarhu bro bbukeft yorhwa tirmifko mrhumor. Mrhuhato Bro Nkifrarhu Yafothat fakmort. Yakhato hrek nd Yafothat nom buganom yahutrnom nd Yafothatn thu nhombrettnom pthewunom. 34 Defitr nhai Jisasr muhmo kanjo muhrmor. Nhai. Ror tor be kfo memor,
‘Yawern nanhu Bror kfo memorr, “Nanhu bro bbukeft yorhwa tirmifko wamrhun.
35 Wamrhukahtn nd ni hti dbnotmoa yimam
afo ninhu mofsinhitn yak htahiruhann.” ’ Sng 110.1
36 Ndnettn niko Isrerko dukakfot. Nd niko wasmo yima Jisasrn bi Bro Nkifrar fak htamorr nmoh Nungothetr. Rorn nrfa htiyakrahrm kmi kmim.”
Bok met yindarim fasoh nefm mong trohhato baftaismo yuhat
37 Nd mrokfom Pitar sinyahato pthamom, bok met yindarim kfram kanjo wasmomm. Sinyahato mkfo memom, “Nd mrokfom nndo kfraye fwitmm nmoh yima yuhum. Finji naruhanom?” 38 Pitar kfo memorm, “Nhai finji. Nikmoh yima yuhum yorhwa fasoh fasoh nefm mong trohkfot. Mong trohhato Jisas Kraisrhu yufatpno baftaiskfot. Inji narahko, nikmoh fasoh fasoh nefm Bro Nkifrar nhai wom dukaruhatrm. Duka mumafhato turhu Yafothat hirahrko. 39 Bi tu Bro Nkifrar kfo hta memor, ‘Na kfak hanyruha yimam tukanhu Yafothat hi hanyruhanm.’ Nhai be nikomrpakom. Nikmoh yonm hi hany bugarahrm. Wuri toh hanyukm he buga hanyrahrm.”
40 Pitar nhai be nd mrokforpam ptharmor. Bok kfo yanho mrokfom kfo memorm, “Yo niko dukahato tohkfot. Fasoh fasoh nefm nayet yimampno kanga rpat faso yak bebrahrko.” 41 Pitar kfo pthamo mrokfom nhai hanyjbornarmomm. Hifa wany yakiohato baftaismom. Nd yiha wom nfri 3,000 yimam Jisasr hiket yimampno mnathu hmbrehato be yonmari rifuhetr rhumor.
Met yindars rpa yima yuhurpar rhumo yuhat
42 Nd nfri yimam nia hanyukm tu aposermpno afo rpat tohhato afo kak nuhas bonuhasmoumm Jisasrhu hik yuham, Kristen yimaroh tohefm, tamoh komunion yaknefm, kfo bruttnanefm, hti hik bohikmoum afo. 43 Bok mirakerkfom Bro Nkifrar aposermn mithu nawohhato namoatmm bok met yindarim yafotha duhatm rhumoum. 44 Nd tuhant yindars Jisasrhu mrokfom yi wany yakiomoam nhai nndoh nndoh yima yuhetm rhurmom. Rroh yima yuhum be rpa yima yuhurpa mifr rhumor. Tamoh tamoht tum be rim nahiyak mnahiyakmom. 45 Yimam bbinysofetm wom yimam yihato wiknamoahat nd bbinysofetmn yakyuk marut yakmoamtn tfit yimam wuska duhatm o marufapa duhatmn tfit nd marut thu brurhemoum. 46 Yiha yiha Bro Nkifrarhu temperr yi rifinyneft rom rpat yihato rifinymoum. Nuwa yanyeft nhaf, wom yiha womrhu kunys famoamn tfit wom yiha womrhu kunys yi famoum. Tum rpat ptha yindhorhato niyak marnyahato rpat nuwa famoum. 47 Rpa yima yuhurn rhu yindhormoatm womm inji htihato kfo yindhormoumm. Yiha yiha bok met yindarim Bror yak miyak hanymoatrm nd Kristen yimam nhai wom kuken rifhur rhurmor.

*2.1 (2.1) Nd Pentikos yihar, Pasofa yiham rhu hanyhato fiftiyuk marrpno tfit Pentikos yiham riruhakmom.