UOLI VOLOXU VILE ANE PAULO MUKAUKAVU MULAI NOXOU
TIMOTI
Vaikala lamana
Timoti anu maulu vile mumuxaxu tanu noxou Iesu, la muxali itema noxou Iesu. Anu sou tuala tila ne Lisita no xalee lia tila ne Xalatia. Nenu ne ane sema Iutaia xe momu ne anu Xiliki. No mine Paulo muxixaoxao no tuatuala sou mulai muaꞌaloxu aꞌalo laixe sou Kalisito, la Timoti mumulinu (Aposeli 16:1-3). No mine ilou mineꞌe mixali ne Epeso la Paulo muitalonu Timoti muxolu ne sou usaxilaꞌu lalotu ne, ia anu mulai ne Makedonia (1:3). Ia no mine anu mulavusou lexe ulivu uneꞌe palea uasi, la sou anu mukaukavu uoli voloxu ane ꞌo mulai noxou (3:14-15).
Mii tei Paulo mupelaꞌu Timoti no anu ane lexe anu usaxilaꞌa ta temanu lalotu laixe noxiꞌa ta mitema moseꞌi e itovo sou italoxolixu muxamuxaxu taneꞌi noxiꞌa noxou Iesu. Ta mitema ixavutala lexe mimii no lialia ꞌo ne anu masua mukalusi. La sou lexe itema vile umasaxa lexe unoꞌu mauli kaluxu uasi, la laixe lexe anu uꞌou lailali moseꞌi mamu xe utaulaꞌi mamu (1:3-7; 4:1-8; 6:3-5, 20-21). Mii ta tameisou Paulo mupelaꞌu Timoti no anu ane lexe usaxilaꞌu lalotu xe uxaxaisou laixe. Xe mupelaꞌuxu sou ꞌiliꞌilixo maꞌia ta kisokisou lalotu iloꞌa ta mitema sou xaixai no anu lalotu imulinu xe uxolu no anu maulixaꞌa (3:1-13, 5:17-25), la sou aneꞌi imomomo sou inoꞌu xaixai no ꞌa lalotu.
Vaikala kaluxusou la mupelaꞌu Timoti no anu ꞌilixo maꞌia anu umulinu la sou anu uxali itema sou xaixai laixe noxou Iesu Kalisito. Xe mupelaꞌu no anu xaixai noxou sou uxaxaisiꞌa ta mitema e mimuxaxu taneꞌi laꞌuluxaꞌa iouiou.
Aꞌalo muai no nano aloxo ꞌo
Vaikala lamana 1:1-2
Pateteli no anu lalotu xe xaixaisou lalotu 1:3–3:16
Paulo mupatetelinu Timoti no anu xaixai noxou 4:1–6:21
1
1-2 ✡Apo 16:1-3; Tit 1:4Eni Paulo, ekaukavunu vaikala ane ꞌo mulai noxine, nini Timoti. Nini loxo ꞌalixeni manina, xo nemulaxu taneni noxou Kalisito Iesu. Eni ne, Lataua anu itema sou pamauli ilou Kalisito Iesu, mipalusilo lexe eni itema sou xaixai noxou Kalisito Iesu e nenge tamolo tanenge sou taxomaiou ulivu uneꞌe.
Eni alinga lexe alauna mo tanutanuxu mo opo seꞌisisi noxou Lataua Maminge nengeꞌa mo Tila noxinge Kalisito Iesu umomomo sou uxolu noxine.
Nasaxilaꞌine Noxiꞌa ta Mitema sou Kalakalavoi
3 Tei no mine eni elutu sou elai ne Makedonia, la eni elingaꞌine pekiaꞌu lexe nini naxolu ne Epeso ne sio. Mo sou navikalaneꞌi ta mitema seꞌi pekiaꞌu lexe aneꞌi ilosieixaꞌa ta mitema lavulavu ane iouvilemo ne uasi. 4 ✡1Ti 4:7; Tit 1:14Mo lexe aneꞌi ixiu tumaliꞌau aꞌalo vitavitanisi ne mo nana veveeni noxiꞌa ta ꞌiluꞌilusuneꞌi iloꞌa ta xaixasiꞌa ne. Mimii ane loxo ne, uxovulaulaulixu xavutalaiꞌa, xe anu ulavusou usuꞌulineꞌi ta mitema sou imuxaxu taneꞌi noxou Lataua mo iꞌoxonu xaixai noxou uasi. 5 Ia, tavaꞌu vaikala pekiaꞌu ane eni elosine ꞌo ne, xo eni emasaxa lexe aneꞌi itetelisou ꞌilixo sou imasaxaiꞌa ta mitema. Lexe aneꞌi oponeꞌi ne, malemalengasi mo maninasou xe aneꞌi imuxamuxaxu taneꞌi maninasou noxou Iesu, la sou mii tatalu ne, uxalixu ꞌilixo ane sou imasaxaiꞌa ta mitema. 6 Seꞌi noxiꞌa mipolo vaꞌaxu no anu ꞌiliꞌilixo ane ne, la sou milai no anu vaikala vitavitanisi ne. 7 Aneꞌi imasaxa lexe ilosieixu ta mitema no anu lapuloto noxou Lataua, ia ilavusou mii maꞌia ane aneꞌi ilelemolu ne mo ilavusou vaikalaiꞌa tavaꞌu ne uasi.
8 ✡Rom 7:12, 16Nenge latala telavusou lexe lapuloto noxou Lataua ne, anu mii laixe lexe nenge tamulinu laixe. 9 Lapuloto ne, anu sou siꞌa ta mitema mulapu uasi. Anu sou usuꞌulineꞌi ta mitema ta masua aloxo ꞌo. Ta mitema ane ixiu tumaliꞌau mo imulinu lapuloto uasi. Mo aneꞌi ane mixiu tumaliꞌa noxou Lataua xe ilavusou iꞌoxo ꞌiliꞌilixo masumasua. Mo ta mitema ane ilavusou imasaxau ꞌilixo noxou Lataua uasi, ia imulinu ꞌilixo sou lialia. Mo ta mitema e ilavusou iveꞌa ta mamiꞌa iloꞌa ta neniꞌa mo ta mitema isoisoli. 10 Mo ta mitema ane ilavusou iꞌoxoꞌoxonu ꞌilixo sou voteꞌi, mo ta mulu ane ilavusou iꞌoxo ꞌilixo masua noxiꞌa ta mulu la, mo ta mitema ane ilavusou ipakalineꞌi ta mitema sou ilotoneꞌi, mo ta mitema sou kalavoi xe ta mitema e iꞌoxonu pekiaꞌu sou kalavoi noxiꞌa, la ilemolu manina teitexi. Lapuloto ne, sou usuꞌulineꞌi ta mitema aloxo ne, mo usuꞌulineꞌi aneꞌi ane ixiunu tumaliꞌa no anu ꞌiliꞌilixo seꞌi laixe ane vaikala manina noxou Lataua ulemo kalumo. 11 Lavulavu manina ne, anu muxolu no anu aꞌalo laixe noxou Lataua e Anu itema sou ualusinge. Anu muꞌitalonu muneꞌe noxilo sou lexe eni aaꞌaloxu.
Alauna Noxou Tila Muneꞌe Noxou Paulo
12 ✡Apo 9:15; 1Ko 15:9-10; Xal 1:15-16Eni alemolu laixe musuku ulai noxou Kalisito Iesu, Tila noxinge ane Anu mulosilo xavi. Xo musosovosilo mo mulavusilo lexe eni emomomo sou aꞌoxonu xaixai noxou. 13 ✡Apo 8:3; 9:1-5Tei, la eni evikala masua mulai noxou Kalisito Iesu mo eni eꞌoxo masuaneꞌi ta mitema e imulimulinu, mo eni eveꞌa ta mitema. Ia Lataua tanuxo, xo eni alavusou aꞌalo laixe noxou uao mo amuxaxu taleli noxou uao. 14 La sou Tila noxinge muꞌanaꞌanalixo no anu alauna noxou xe musuꞌulileli sou emuxamuxaxu taleli noxou Kalisito Iesu, la sou eni emasaxaiꞌa ta mitema kalumo.
15 ✡Luk 19:10Eni amitema vile sou ꞌilixo masua ano, ꞌilixo masua noxilo muuli noxiꞌa ta mitema sou ꞌilixo masua mukalusi. Ia Kalisito Iesu muluꞌe no lia ꞌo sou umapaulinenge ta mitema sou ꞌilixo masua. Vaikala ane ne, manina misevile, mo anu umomomo sou ta mitema tavuꞌalo ilomusou mo imuxamuxaxu taneꞌi no anu. 16 Eni amitema sou ꞌilixo masua manina, ia Anu tanuxo tei sou ulosieixu ta mitema lexe Anu itema sou laꞌiaxuiꞌa palepalea uasisi manina. Aneꞌi ta mitema ilavusou aloxo ne, la sou aneꞌi kalumo imuxaxu taneꞌi noxou sou inoꞌu mauli ane kaluxu uasi. 17 Anu tatananu tuala sou usaxilaꞌinge no voxovoxo utotomu. Anu umomomo sou usoli uasi, mo itema vile umomomo sou umaisou uasi. Anu Anusisi Lataua manina. Nenge tatoxonu mo taꞌitinu ualasou no voxovoxo utotomu mo kaluxu uasi. Manina.
18 Timoti, nini loxo ꞌalixeni. Eni apeletotosine no anu vaikala e ta mitema sou palomatana mivikalanenixu no anu tei. Lexe nini namulinu vaikala ane ne, la naꞌotoꞌoto pekiaꞌu. 19 Nini naꞌotoꞌoto, la namuxamuxaxu taneni mo oponeni manina. Xo ta mitema seꞌi ne, mixiu tumaliꞌa no anu mii tamei ne. La sou aneꞌi misusu no anu muxamuxaxu taneꞌi. 20 ✡1Ko 5:5; 2Ti 4:14-15Tamei noxiꞌa ne, ualasiꞌa aloxo ꞌo Amenio ilou Alekisanda. La eni emuxaxaꞌa ilou no avolu Satani, mo sou aneꞌi ilou ilavusou lexe ilea vaikala masua ulai noxou Lataua la uasi.