1 No iou Lataua ilou Kalisito Iesu e Anu utulusiꞌa ta mitema aneꞌi ane imamauli xe aneꞌi ane misoisoli no anu vaivaikala mo Anu ulivu uneꞌe no lia ꞌo sou usaxilaꞌinge, eni avikalaneni pekiaꞌu manina aloxo ꞌo. 2 Nini xavineni sou naaꞌaloxu vaikala noxou Iesu Kalisito ulai noxiꞌa ta mitema. Voxo seꞌi, la aneꞌi ilomuxene xe voxo seꞌi, la aneꞌi imasaxa lexe ilomuxene uasi, ia nini naxaxaisi sou naaꞌaloiꞌaxu utotomu. Napelaꞌa ta mitema sou susu noxiꞌa mo nakaitoloneꞌixu, ia naavutilixaꞌa lexe sou imulinu ꞌiliꞌilixo noxou Lataua. Nini nalosiꞌa ta mitema lavulavu aloxo ne, la nini naꞌoxo seꞌisisi noxiꞌa mo laꞌiaxene palea uasi. 3 ✡1Ti 4:1Xo iliꞌi, la ta mitema ilomuxu vaikala noxou Lataua uasi. Ia sangaliꞌa uavuavuti sou ilomusou vaikala ane aneꞌi imasaxau, la sou aneꞌi iꞌavaliꞌa ta mitema tavuꞌalo sou ilosieixu ta mitema lavulavu, sou ineꞌe ilosieixu vaikala ane aneꞌi imasaxa lexe ilomusou. 4 Aneꞌi ixiunu tumaliꞌau vaikala manina noxou Lataua, ia imulinu aꞌalo vitavitanisi. 5 Ia eni avikalaneni pekiaꞌu aloxo ꞌo la. Nini naxavutala laixe utotomu mo natulu pekiaꞌine mo natavule tuꞌutuꞌumaxu ane uxali noxine xe naxaxai sou naaꞌaloiꞌaxu ta mitema aꞌalo laixe noxou Kalisito Iesu. Nini naꞌoxonu xaixai noxou Tila noxine, la naꞌoxonu maninasousi.

6 ✡Pil 2:17Xo eni ne, voxo sou soli noxilo ne a muneꞌe ꞌalai mukalu. Lexe eni asoli, la sialuxo unixi loxo uaini ulai noxou Lataua. 7 ✡1Ti 6:12Eni eꞌotoꞌoto laixe no anu ꞌotoꞌoto loxo amitema sou ꞌotoꞌoto vile laixe. Mo eni eiave no anu iaveiave noxilo mukalu, loxo amitema sou aiave no anu saisale. Xe eni etetelisou muxamuxaxu taleli noxou Iesu laixe mo muneꞌe mutalo vaimomo ꞌo. 8 ✡1Ko 9:24-25La sou Lataua mulalaxiinu kisivalu vile noxilo. Kisivalu ne, eni anoꞌu sou euli no anu saisale no voxo ane Tila ulosilo. Anu ulosilosi uasi, ulosiꞌa aneꞌi ane Lataua mumoxoꞌa lexe aneꞌi ta mitema mulapu no voxo ane Anu utulusiꞌa ta mitema no anu vaivaikala. No voxo ane ne, la anu ulosiꞌa ta mitema latala e ixomaiou Iesu manina sou ulivu uneꞌe kalumo.

9 Eni alingaiꞌine lexe nini napulili sou napalea uneꞌe noxilo. 10 ✡Apo 15:37-39; 2Ko 8:23; Kol 4:14Xo Temasi muxolu noxilo tei, ia anu mumasaxau ꞌiliꞌilixo sou lialia ꞌo misevile, la sou anu muꞌumesilo mo mulai ne Tesalonika. Xe Kulesikesi kalumo mulai no xalee lia tila ne Xalatia. Mo Tito kalumo mulai no xalee lia tila ne Talematia. 11 Aneꞌi miꞌumesilo mukalu, ia nexi noxou Lukasi a taxoxolu ꞌo. Lexe nini naneꞌe noxilo, la ngingi ngongou Maluko nganeꞌe. Xo anu usuꞌulileli no anu xaixai noxilo. 12 Eni epalusou Tukiko sou mulai no tuala ne Epeso. 13 ✡Apo 20:6Nini naneꞌe noxilo, la nanoꞌu tokolomoxeni veveeni a muai no taasou Kalipo no tuala ne Toloasi. Xe nanoꞌu lavukuxeni. Ia taneni vulusi uasi, nanoꞌu lavuku seꞌi ane miꞌoxonu no anu sipsip sosou kalumo.

14 ✡Ais 59:18; Rom 2:6Ia itema sou uꞌoxonu mimii no anu kopa, ualasou lexe Alekisanda ne, anu mulosilo tuꞌutuꞌumaxu tavuꞌalo misevile. Eni alingau Tila noxilo lexe anu ukolinu ꞌiliꞌilixo ane anu muꞌoxonu muneꞌe noxilo ꞌo. 15 Anu aloxo ne, la sou nini kalumo nasaxilaꞌine noxou. Xo anu ne, anu mutautalo ananexe no voxo ane nexi teaꞌaloxu aꞌalo laixe noxou Kalisito Iesu.

16 Xe no voxo ane aneꞌi mitulusilo no anu vaivaikala tei, la eni eꞌoxo laixesousi. Ia itema vile utulu no paꞌumelo sou usuꞌulileli uasi, ta menexilo miꞌumesilo sou milailai mukalu. Ia eni alinga ulai noxou Lataua lexe Anu ukolinu ꞌilixo e aneꞌi miꞌoxonu muneꞌe noxilo ne uasi. 17 Aneꞌi miꞌumesilo, ia Tila noxilo ne uꞌumesilo uasi. Anu mutulu no paꞌumelo sou mulosilo xavi sou eni eaꞌaloxu aꞌalo laixe ukalusi ulai noxiꞌa ta mitema, mo sou ta mitema no xalexalee tuatuala ukalusi ne ilomusou. Anu Tila noxilo ne, muꞌumeleli mulivunoxilo no anu tuꞌutuꞌumaxu ane ne, loxo anu muꞌumeleli no anaxu mii vile ilemolu lexe laeoni. 18 La sou eni elavu manina lexe iliꞌi, la Tila noxilo uꞌumeleli no anu ꞌiliꞌilixo masumasua e ta mitema iꞌoxo uneꞌe noxilo mo ulailixo laixesi no tuala noxou teitexi no opo loxotolo. Eni alinga lexe nenge taꞌitinu Tila noxinge ualasou utotomu mo ukalu uasi. Manina.

19 ✡Apo 18:2; 2Ti 1:16-17Nasova aso laixe noxilo ulai noxie Pilisila ilou mulue Akuila mo Onesipolo ilee semau iloꞌa ta ꞌolu. 20 ✡Apo 19:22; 20:4; Rom 16:23Elasito muxolu no tuala ne Kolinito, ia Tolopimosi ne, eni eꞌumesou no tuala ne Mileto, xo pipiena muꞌoxonu ne. 21 Eni emasaxa lexe voxo sou laꞌiua usoko uao, ia nini napulili sou naneꞌe noxilo. Uvuloi mo Puteni mo Lino iloꞌa Kalautia xe ta mitema noxou Lataua tavuꞌalo misova aso laixe mulai noxine.

22 Eni alinga lexe Tila uxolu noxine mo alauna noxou uxolu noxinge kalumo.