UOLI VOLOXU TAMEISOU ANE PAULO MUKAUKAVU MULAI NOXOU
TIMOTI
Vaikala lamana
Timoti ne anu muxaxai iouvilesisi aloxo Paulo. La sou anu Paulo mukaukavu mulai noxou sou mupelaꞌu sou umulimulinu ꞌiliꞌilixo lailaixesi. Mo umulinu vaikala noxou Lataua laixe xe uaꞌaloxu aꞌalo laixe sou Iesu Kalisito ulai noxiꞌa ta mitema la uꞌoxo maninasou. Mo no mine ta mitema ilosou tuꞌutuꞌumaxu, la anu utulu pekiaꞌu mo uxaxaisou xaixai noxou e Lataua mulosou sou uxaxaisou ne.
Paulo mupelaꞌu Timoti lexe ulomuxaꞌa ta mitema ilavusou mii vile uasi ne mamu. Xo vaikala ane loxo ne, anu umomomo sou uxalixu mii vile laixe uasi, ia uxalixu mamulosi no anu lolomu noxiꞌa ta mitema. Xe muvikalanu Timoti lexe anu umulinu ꞌilixo noxou anu Paulo. Laixe sou umuxaxu tanu pekiaꞌu mo opo seꞌisisi uꞌanaꞌana noxou, mo umasaxaiꞌa ta mitema moseꞌi maninasou xe tuꞌutuꞌumaxu iouiou uxali noxou, la anu laixe lexe anu utavulenusi.
Aꞌalo muai no nano aloxo ꞌo
Vaikala lamana 1:1-2
Vaikala ꞌosaꞌila ilou peletoto noxou Paulo 1:3–2:26
Tuꞌutuꞌumaxu uxali no anu voxo kalukaluxusou 3:1-9
Paulo muaꞌaloxu xaixai noxou 3:10–4:18
Vaikala kaluxusou xe vaikala sou sexela 4:19-22
1
1-2 ✡Apo 16:1; 1Ti 1:2Eni Paulo, ekaukavunu vaikala ano ꞌo mulai noxine nini Timoti. Eni emasaxaine loxo nini ꞌalixeni maninasou. Lataua musakiinu vaikala noxou lexe ꞌei ane umuxaxu tanu noxou Kalisito Iesu, la unoꞌu mauli ane kaluxu uasi. La sou Lataua mupalusilo loxo itema sou xaixai noxou Kalisito Iesu sou aaꞌaloiꞌa ta mitema no anu aꞌalo laixe ane ne.
Eni alinga lexe alauna mo tanutanuxu mo opo seꞌisisi noxou Lataua Maminge nengeꞌa mo Tila noxinge Kalisito Iesu, umomomosou uxolu noxine.
Vaikala Peletoto
3 ✡Apo 23:1Eni avikala laixe ulai noxou Lataua e eni aꞌoxoꞌoxonu xaixai noxou, la alavusou axavutalaneni utotomu no anu linga noxilo. Lataua ane eni alavusou axaxai noxou loxo ta xaixasilo iloꞌa ta ꞌiluꞌilusuleli mixaxai tei no anu oponeꞌi maninasou. 4 Eni axavutalanu tama noxine, la eni emasaxa lexe eni amaisine la. Lexe eni amaisine, la eni aꞌosa manina. 5 ✡Apo 16:1Eni axavutalaneni no anu muxamuxaxu taneni manina noxou Kalisito Iesu. Xo tei, la xasine ualasie lexe Loi ilee nenine Onike, aneꞌi mimuxaxu taneꞌi noxou, la sou eni elavu lexe nini kalumo namuxamuxaxu taneni noxou loxo aneꞌi ilou ne. 6 ✡1Ti 4:14Tavaꞌu aloxo ne, la sou eni avikalaneni la lexe nini naavutilixu mii laixe ane Lataua mulosine no voxo ane eni emulaxu avolo no kisine. 7 ✡Rom 8:15Uleenu ane Lataua mulosine ne, anu sou uꞌoxonenge taꞌume uasi. Anu sou ulosinge xavi mo, sou uꞌoxonenge tamasaxaiꞌa ta mitema xe, sou usuꞌulinenge sou tasaxilaꞌu muamuaꞌinenge.
8 La sou mamu nini namaela sou naaꞌaloxu Tilasinge ualasou, mo mamu namaela noxilo e eni axoxolu no taasou navunavu, xo eni exaxai noxou Iesu. Ia eni emasaxa lexe no anu xavi noxou Lataua, la nini natavulenu tuꞌutuꞌumaxu sou aꞌalo laixe loxo eni atatavulenu ꞌo. 9 ✡Ep 2:8-9; Tit 3:5Lataua mupamaulinenge mo muꞌavalinge, sou lexe nenge taxolu vaꞌaxu no anu ꞌiliꞌilixo masumasua. Nenge teꞌoxonu ꞌiliꞌilixo laixe, la sou Anu upamaulinenge mo uꞌavalinge uasi, Anu muꞌoxonu aloxo ne, no anu xavutala ilou alauna noxousi. Alauna ne, Anu mumaxaꞌu noxou Kalisito Iesu tatei no mine Lataua ukoinu mimii uao. 10 ✡Eva 2:14Ia vaimomo ꞌo, alauna ne muxali mupalaꞌa lamana noxou Kalisito Iesu, Anu itema sou pamauli. Anu mutaloxolixu soli, ia no anu aꞌalo laixe noxou, la mulosinge mauli ane kaluxu uasi. 11 ✡1Ti 2:7Lataua musosovosilo lexe eni aaꞌaloxu aꞌalo laixe xe amitema sou xaixai noxou Iesu mo amitema sou alosieixu ta mitema lavulavu. 12 Anu aloxo ne, la sou eni atavule tuꞌutuꞌumaxu ꞌo. Ia eni amaela no anu uasi. Xo eni elavusou ꞌei ane eni emulaxu taleli noxou mo elavusou manina lexe Anu usaxilaꞌu mii ane eni eꞌitalonu mulai noxou mole ulai utalo no voxo ane Anu ulivu uneꞌe la.
13 Mii maꞌia ane nini nelomusou noxilo, la nelavu lexe anu vaikala noxou Lataua mo nalosieixu ta mitema no anu. Mo namuxamuxaxu taneni noxou Kalisito Iesu mo namasaxaiꞌa ta mitema loxo Kalisito Iesu mumasaxaine. 14 ✡1Ti 6:20Eni emasaxa lexe nini nasaxilaꞌu mii laixe ane Lataua muꞌitalonu noxine laixe no anu xavi noxou Uleenu Tavuna e uxolu noxinge.
15 Nini nelavusou aloxo ꞌo. Ta mitema noxou Lataua latala no xalee lia tila ne Asia ne, aneꞌi mixiu tumaliꞌa muneꞌe noxilo mukalu ne. Ta tamei noxiꞌa ualasiꞌa lexe Pixelo ilou Emoxenesi.
16 Ia eni alinga lexe Tila tanuxu Onesipolo iloꞌa ta tema tani noxou. Xo anu muꞌoxonu opoleli muꞌosa alaxu tavuꞌalo misevile mo umaela noxilo sou aneꞌi misakileli ꞌo uasi, 17 ia anu molu muneꞌe no tuala tila ne Romu, la anu ukakamulileli misevile xoo mole muxalisilo. 18 Eni alinga lexe Tila tanuxu no voxo ane Iesu ulivu uneꞌe la. Xo nelavu laixe lexe no tuala tila ne Epeso ne, la anu musuꞌulileli laixe no anu mimii tavuꞌalo misevile.