3
Iesu Munoꞌu Uala Tila Muaꞌulixu Mosesi
1 ✡ Iti 12:7; Eva 4:14; 7:26Ioxe ta vivilo, noxou Iesu Lataua muxolu teitexi no opo loxotolo muꞌavalinge mo mukalipalangengi lexe ngingi ta noxou muisalili ngaxolu. Mo ngaxavutala Iesu. Anu aposeli noxou Lataua mo kisiꞌa ta ailiꞌi e nenge temuxaxu tanenge noxou xe taaꞌaloxu ualasou lamana. 2 Anu mumulinu vaikala noxou Lataua mo muxaxaisou xaixai ane Lataua musosovosou sou uxaxaisou ne laixe. Xaixai noxou ne anu iouvilesisi aloxo Mosesi muꞌoxonu, sou muxaxaisiꞌa ta mitema laixe loxo aneꞌi Lataua taasou. 3 Ia Lataua mulosou Iesu uala tila manina muaꞌulixu Mosesi. Aloxo nenge telavusou itema vile utulusou tani vile lailaixe manina la. Nenge tavikalasou tani ne malaxo uasi, ia talosou uala tila manina noxou moosou e mutulusou ne. 4 Aloxo tanitani ne itema vilevilesi mutulusou, ia Lataua anu molu muxalixu mimii latala mukalusi. 5 ✡ Iti 12:7; Lap 18:15-19Mosesi ne anu itema sou xaixai noxou Lataua mo mumulinu vaikala noxou Lataua la muꞌoxonu xaixai laixesi sou musaxilaꞌu tani noxou. Mo anu muvikala lamana no anu mii maꞌia ane sou Lataua ulemolu iliꞌi. 6 Ia Kalisito ne Anu Lataua ꞌOlu la sou anu xaixai noxou ne sou musaxilaꞌa ta mitema mukalusi loxo aneꞌi tani noxou Lataua. La mumulinu vaikala noxou Lataua la, muꞌoxonu maninasou xaixai noxou ne. La sou nenge ane tanenge utulu pekiaꞌu mo taꞌosaꞌosa sou tanoꞌu mii maꞌia nenge texolu teloloopalanu sou tanoꞌu, la nenge kalumo ne texolu loxo Lataua taasou.
Ta Mitema Ilomuxu Lataua Uasi ne Ilaxaꞌi Laixe
7 ✡ Lex 95:7-11La sou anu aloxo Uleenu Tavuna mulemolu, Anu muvikala aloxo ꞌo,
“Vaimomo ꞌo lexe ngalomusou Lataua xolinu
la mamu sou ngatatusou opongengi pekiaꞌu
8 ✡ Mul 17:7; Iti 20:2-5loxo ta ꞌiliꞌilisungengi miꞌoxonu tatei.
Xo no voxo loxo mixolu no xalee lia ꞌesiꞌesi
la mixiunu tumaliꞌa noxilo xe mitovoleli.
9 La mimaisou mimii ta tatila eꞌoxonu muxali noxiꞌa
mumomomo no anu tauu ie itemaxu ta tamei (40).
10 Xo ta mitema no anu taunu ane ne miꞌoxonu laꞌiaxo la eni evikala lexe,
‘Ta mitema ane ꞌo ne, oponeꞌi muxolu vaꞌaxu noxilo manina,
mo ilavusou imulinu voteꞌi noxilo e lexe imulinu ne la uasisi.’
11 ✡ Iti 14:21-23La miꞌoxoleli laꞌiaxo la eni evikalaneꞌi aloxo ꞌo,
‘Manina teitexi, aneꞌi imomomo sou iꞌunalai no nano no tualasou maꞌila
noxilo uasisi manina.’ ”
12 Ta vivilo noxou Iesu, ngalaxaꞌingengi laixe, loxo ꞌo io vivinge vile no taingengi ne opo masumasua muxolu no anu xavutalau la umomomosou umuxaxu tanu uasi la uxiunu tumalou noxou Lataua e Anu umauli. 13 La sou anu laixe sou ngapatetelingengi ngatongatoꞌo no voxovoxo utotomu. Xo nenge tamaisou voxo vilevilesi uxaxai la nenge tavikala lexe anu voxo ane vaimomo ꞌo si, ia talavusou telexu uasi. Aloxo ne la sou anu laixe sou ngasuꞌulingengi ngatongatoꞌo mo ngaavutinoxu xavutalamengi, loxo ꞌo io ꞌilixo sou susu uꞌoxo loloxaꞌa seꞌi noxinge la itatusou taneꞌi pekiaꞌu. 14 No mine nenge temuxaxu tanenge noxou Lataua pekiaꞌu, la loopala noxinge ne pekiaꞌu manina. Lexe nenge tatulu pekaꞌinge aloxo ne ulai utalo no telexu, la nenge nengeꞌa Kalisito taxolu tapita. 15 ✡ Eva 3:7-8Aloxo Lavuku Tavuna teinu, muvikala aloxo ꞌo,
“Vaimomo ꞌo, lexe ngalomusou xolinu,
la mamu sou ngatatusou opongengi pekiaꞌu loxo ta ꞌiluꞌilusungengi miꞌoxonu tatei.
Xo ta ꞌiluilusungengi miꞌoxonu tatei aloxo ne
la mixiunu tumaliꞌa noxilo xe mitovoleli.”
16 ✡ Iti 14:1-35Aneꞌi ta ꞌei ane miavutinoxu Lataua opoonu la laꞌiaxuiꞌa no mine milomusou vaikala noxou la mixiunu tumaliꞌaou ne? Aneꞌi ta mitema mukalusi ane Mosesi muulaxuneꞌi milaa ne Aixiputo. 17 ✡ 1Ko 10:10Mo anu laꞌiaxuiꞌa ta ꞌei mumomomo no anu tauu ie itemaxu ta tamei? Anu laꞌiaxuiꞌa aneꞌi ta mitema e misusu xe misoisoli la vasimeꞌa mutaꞌotaꞌolu no xalee lia ꞌesiꞌesi ne. 18 Xe noxiꞌa ta ꞌei e Lataua muvikalaneꞌi pekiaꞌu lexe umomomo sou iꞌunalai no nano no tualasou maꞌila noxou uasi ne? Anu mulelemeꞌa ta mitema e imulinu vaikala noxou uasi. 19 La sou nenge tamaisou lexe aneꞌi imomomo sou iꞌunalai no tuala sou maꞌila uasi, xo tavaꞌu vilesisi aloxo ꞌo imulaxu taneꞌi uasi.