46
1 Hina Gode da amane sia:sa,
“Ba:bilone ilia ogogosu ‘gode’ da wadela:lesi dagoi.
Musa: ilia da Ba:ile amola Nibou elama nodone sia:ne gadosu.
Be wali ilia da amo liligi, dougi ilia baligi da:iya lidili legele,
amo dougi da dioiwane ahoa.
2 Loboga hamoi ‘gode’ liligi da ili gaga:mu hamedei.
Ilia eno dunu amoga lale, gaguli asi dagoi ba:sa.
Amalu, Ba:bilone fi ilia ‘gode’ da bu hame ba:mu.
3 Ya:igobe egaga fi! Na fi dunu amo da hame bogoi esala! Na sia: nabima!
Dilia lalelegeloba amola fa:no, Na da dili asigiwane ouligisu.
4 Na da dilia Gode amola Na da dili asigiwane ouligimu.
Dilia da:i hamone, dialuma hinabo da ahea:iai hamosea, Na da dili ouligimu.
Na da dili hahamoi amola Na da dili ouligimu.
Na da dili fidimu amola gaga:mu.”
Hina Gode da amane sia:sa,
5 “Dilia da nowa dunuma Na defema:bela:?
Dunu eno afae da Na defele hame ba:mu.
6 Dunu da ilia muni salasu doasili, gouli sogadigisa.
Ilia da silifa ea dioi defei ba:sa.
Ilia gouli hahamosu dunu amo ‘gode’ liligi loboga hamoma:ne, bidi iaha.
Amasea, ilia da amo ‘gode’ liligi amoma beguduli amola sia:ne gadosa.
7 Ilia amo ogogosu ‘gode’ liligi gaguia gadole, gisawane gaguli ahoa.
Ilia da ea sogebi amoga ligisili, amola amogawi amo liligi da lela.
E da ea gasaga eno sogebi amoga masunu gogolei.
Dunu afae da ema sia:ne gadosea, e da bu adole imunu gogolesa,
amola amo dunu gaga:mu gogolesa.
8 Dilia wadela:i hamosu dunu! Dawa:ma!
Na musa: hamoi amo bu dawa:ma!
9 Hou hemonega hamoi amo bu dawa:ma!
Ni fawane da Godedafa amola Na defele da ‘gode’ eno hame gala.
Amo dilia dafawane dawa:le, sia:ma.
10 Musa: hemonega, Na da hobea misunu hou huluane dawa:i dagoi.
Na da musa: hemonega, amo hou da wali doaga:i dagoi,
amo da doaga:mu sia:i.
Na da amane sia:i, ‘Na ilegesu da hame dafamu
amola Na hamomu dawa:i liligi, da didili hamoi dagoi ba:mu.’
11 Dunu da gusugoe amoga misa:ne Na da wele sia:nana.
E da buhiba defele sa:ili, Na ilegei amo e da hamomu.
Na da sia:i dagoi, amola Na sia:i huluane da hamoi dagoi ba:mu.
12 Dilia gasa fi hame nabasu dunu! Na sia: nabima!
Dilia da hasalasu hou da gadenene hame agoane dawa:sa.
13 Be Na da hamobeba:le, amo hasalasu eso da hobeadafa hame.
Amo eso da gadenenewane doaga:i dagoi.
Na hasalasu ba:ma:ne, dilia bagade hame ouesalumu.
Na da Yelusaleme gaga:mu.
Amola amogawi, Na hamobeba:le,
eno fifi asi gala da Isala:ili dunu fi ilima nodone dawa:mu.”