3
Se Bidi Iasu, Godema Sinidigisu amola Hamoma:bela:le Dafawaneyale Dawa:su
Na da Gode Ea se bidi iasu amo dawa:.
E da na gasidafa ganodini, amoga sefasi.
E da mae asigiliwane, na bubulufalalu.
E da na hu fa:gini ale sasalili amalu na gasa fifili yolesi.
E da fedege agoane baligili se iasu diasu ganodini na ga:si.
E da na seseiba:le, na da gasi ganodini bogosu gaha agoai dialu.
E da na sia:inega lala:gi dagoi.
Na da fedege agoane, se iasu diasu ganodini esala.
Na da hobeamu gogoleidafa.
Na da na fidima:ne, Godema ha:giwane disa wele sia:sa.
Be E da na wele sia:su nabimu higasa.
Na da emoga ahoasea, fefeloa ahoa.
Na da habidili delegisia, gelega logo ga:su fawane ba:sa.
10 Hina Gode da nama doagala:musa:, ‘bea’ ohe agoai ouesalu.
E da ‘laione’ wa:me ea hou defele, nama doagala:le, gagula dasu.
11 E da na logo hamega ga sefasi.
E da na da:i hodo gagadelale, dodosa:ne, na yolesi.
12 E da Ea oulali dili, na gala:i.
13 E da na Ea dadiga, na da:igadafa gano gala:i.
14 Dunu ilia da hahabe asili daeya nama oufesega:sa.
Ilia da nama lalasogole oufesega:sa.
15 Hina Gode da fedege agoane se nabasu fawane,
ha:i manu amola hano defele nama moma:ne i.
16 E da na odagi osobo da:iya bugisili, geselalu.
E da na bese gelega fifilisi.
17 Na da da:i dioiba:le olosa, amola olofosu amola hahawane hou gogolesa.
18 Na da fonobahadi fawane bu esalumu.
Na Hina Gode da na fidima:bela:le dawa:su hame ba:sa.
19 Na da golasu hamedei amola se bagade nabala.
Na da amo dawa:sea, amo da nama gamogai medosu hano nasu defele ba:sa.
20 Na da na se nabasu amo mae fisili dawa:lala.
Na a:silibu ganodini da:i dioi bagade nabala.
21 Be na da liligi afadafa dawa:sea,
na dafawane hamoma:beyale dawa:su da bu nama maha.
22 Amo liligi da Hina Gode Ea da nama mae fisili, asigisa.
Amola E da gogolema:ne olofosu dawa:.
23 Ea asigidafa hou da hahabe nasegagi defele,
amola eso ea mabe defele, hame yolesisa.
24 Na da liligi eno hamedafa gala.
Hina Gode Hifawane da na Fidisu Dunu.
Amaiba:le, na da Ema fawane dafawaneyale dawa:sa.
25 Hina Gode da nowa dunu amo da Ea hou dafawaneyale dawa:sea, lalegagusia,
amo dunuma hahawane hamosa.
26 Amaiba:le, ninia da Ea fidisu amola gaga:su lamusa:,
gebewane mae momabone ouesalumu da defea.
27 Amola amo hou ninia ayeligi amola afini eso amogainini dawa:mu da defea.
28 Ninia da se nabasea, ninisu ouiya:le esalumu da defea.
29 Ninia Hina Gode Ea sia: nabawane, begudumu da defea.
Bai ninia da hobea misunu hou noga:idafa ba:ma:bela:le.
30 Eno dunu da ninima fasea amola gadele sia:sea,
ninia ouiya:le esalumu da defea.
31 Hina Gode da ninima gogolema:ne olofosu dialebeba:le,
E da nini hamedafa fisiagamu.
32 E da eso enoga ninima da:i diosu iaha,
be Ea ninima asigisu hou da dafawanedafa amola gasa bagade.
33 E da da:i diosu amola se nabasu amo,
Ea hanaiba:le ninima hame iaha.
34 Ninia da se iasu diasu ganodini, da:i dioiwane esalea,
Hina Gode da nini dawa:lala.
35 - 36 Hina Gode da osobo bagade dunu
ilia moloidafa fofada:su hou hamoma:ne ilegei.
Be ninia amo hou hamobe hame ba:sea, E da dawa:lala.
37 Hina Gode Ea hanai hou fawane da didili hahamona ahoana.
38 Hina Gode da logo doasibiba:le fawane,
hou noga:i amola wadela:i ele defele doaga:sa.
39 Ninia da wadela:i hou hamobeba:le, dawa:ma:ne se dabe iasu ba:sea,
abuliga Godema egane sia:ma:bela:?
40 Ninia da ninia hamobe hou ba:lalu, Godema sinidigila:di!
41 Ninia da ninia wadela:i hou hamoi Godema sisane fofada:nanu,
noga:le amane sia:ne gadomu da defea.
42 “Ninia da wadela:le hamoi dagoi, amola Dima odoga:i.
Amola Hina Gode! Di da ninia wadela:i hou hame gogolema:ne olofoi.
43 Di da ninima sinidigili amola nini fane lelegei.
Be Dia gogolema:ne olofosu hou amo da Dia ougi hou amoga dedeboi galu.
44 Di da ninia sia:ne gadosu amo Dima mae doaga:ma:ne,
Dia ougi hou da mu mobi agoane bagadedafa gadugagilisi.
45 Di da nini osobo bagadega isu salasu agoane hamoi
46 Ninima ha lai dunu huluane da ninima gadesa amola oufesega:sa.
47 Ninima gugunufinisisu da doaga:i dagoi.
Ninia da se nabasa:besa:le bebeda:iya esafulu.
48 Na fi dunu ilima gugunufinisisu hou ba:beba:le,
na si hano da hano defele dala.
49 Na si hano da hame hasu hano agoane daleawane,
50 Hina Gode da Hebene gadodili ninima ba:le gudusia, nini ba:sa.
51 Na da moilai bai bagade ganodini fi uda,
amo ilima hamoi amo ba:sea, Na da dogo faga:sa.
52 Nama ha lai dunu ilia nama higabe da bai hame gala.
Be dunu ilia da sio sanigebe defele,
nama ha lai da na sa:ima:ne sani gei.
53 Ilia da na esalumuna:wane uli gelaba sanasili,
gelega gadodili ga:si.
54 Na da gudu esaloba hano da na dedebomusa: heda:beba:le,
na bogomu gadenebeyale dawa:i.
55 Hina Gode! Na da uli dogoi gudu lela,
na da Dima disa wele sia:i.
56 Amola na da Dia fidima:ne dini iabe nabima:ne sia:beba:le,
Di da na dibi nabi dagoi.
57 Di da nama bu adole i, “Di mae beda:ma!”
58 Di da na esalusu gaga:musa: misini,
na esaloma:ne hamoi.
59 Hina Gode! Di da na wadela:le hamoi amo Di dawa:.
Dia fofada:nanu, na hou da moloidafa sia:ma.
60 Dia dawa:! Nama ha lai dunu da na higale,
amola na medomusa: wamo sia:daha.
61 Hina Gode! Ilia nama gadebe,
amola na famusa: wamo sia:dabe, amo Dia dawa:.
62 Hahabe ganini asili gasia, ilia da na hou amoga ilegele sia:daha
amola na famusa: wamo sia:daha.
63 Hahabe ganini asili gasia,
ilia da nama lalasogole oufesega:sa.
64 Hina Gode! Ilia nama wadela:le hamobeba:le,
ilima se dabe ima!
65 Ilima gagabusu aligima:ne ilegema!
Amola ili lobo hehealema:ne hamoma!
66 Ili osobo bagadega mae esaloma:ne,
gala:la bobogema!