4
Daeya Gode Ea Fidima:ne Sia:ne Gadosu
Na sia:ne gadobe goe bu sia:ne ima.
Hina Gode, Di da na gaga:su dunu.
Na se nabaloba, Dia na fidi.
Wali, Di da nama asigima amola na sia:ne gadobe nabima.
Eso habowali dilia fi dunu da nama higama:bela:?
Eso habowali dilia da hamedei liligi amo hanama:bela:,
amola ogogosu liligi amoma fa:no bobogema:bela:?
Dawa:ma! Hina Gode da moloidafa noga:i dunu
amo Ea fidafa hamomusa: ilegei dagoi.
Amola na da Ema wele sia:sea, E da na wele sia:su naba.
* Efesase 4:26Dilia beda:ga yaguguma!
Amola wadela:le hamosu hou fisima.
Dilia da ouiya:le agoane dilia debea da:iya dialea, bagade dadawa:laloma.
Gobele salasu moloidafa amo Hina Godema ima,
amola Ema dafawaneyale dawa:ma.
Dunu bagohame da agoane sia:ne gadosa,
“Hina Gode! Ninima Dia hahawane fidisu hou baligili ima.
Ninima asigiwane ba:ma.”
Ilia da gagoma amola waini lai dagoiba:le hahawane ba:sa.
Be hahawane hou Di da nama i dagoi,
amo da amo osobo bagade hou bagadewane baligisa.
Na diasa:ili gasia golai dialoba, hahawane golasa.
Hina Gode! Di fawane da na noga:le gaga:sa.

*4:4: Efesase 4:26