44
Gaga:ma:ne Adole Ba:su
1 Gode! Di da hemonega, ninia aowalali ilia esalebe eso amoga
gasa bagade hou hamoi dagoi.
Ninia amo hou ninina: ge amoga nabi dagoi.
Amola amo ninia aowalali ilia da ninima alofele olelei.
2 Di Disu da Dia hou hame dawa: dunu, amo Ga:ina:ne sogega gadili sefasili,
amola Dia fi dunu ilia soge ganodini ha:ini fima:ne hamoi.
Di da fifi asi gala eno ilima se bidi i.
Be Dia fidafa dunu amo hahawane bagade gaguiwane esaloma:ne hamoi.
Amo sia: ninia da nabi dagoi.
3 Dia fi dunu ilia gegesu gobihei amoga amola ilila: gasaga hame hasali.
Be ilia da Dia gasaga hasali.
Di da ilima esalu amola ilima asigisa, amo Di da ilima olelei.
Amola ilia amo dawa:beba:le, hasali dagoi.
4 Di da na Hina Bagade amola na Gode.
Di da Dia fidafa dunu ilima hasalasu hou iaha.
5 Amola ninia da Dia gasaga
ninia ha lai dunu ilima hasalasisa.
6 Na dadi amola na gegesu gobihei da na gaga:mu,
amo na dafawaneyale hame dawa:be.
7 Be Di fawane da ninia ha lai amoga gaga:i dagoi,
amola ninima higa:i dunu amo hasali dagoi.
8 Ninia eso huluane mae fisili, Dima nodonanumu.
9 Be wali, Dia da nini yolesi dagoi.
Amola ninima ha lai amo nini hasalimusa:, logo doasi dagoi.
Di da ninia dadi gagui dunu wa:i, ilima wali hame gilisili mogodigisa.
10 Dia nini hame fidibiba:le, ninia da ninia ha lai amoba:le hobea:i.
Amola ilia da ninia gagui liligi iligili gagumusa: lai.
11 Di da nini sibi fane legebe agoane hamoma:ne ninima gua:si.
Di da nini ga fi soge amoga esaloma:ne afagogolesi.
12 Dia da Dia fidafa dunu amo bidi fonobahadi adole, amoga bidi lai.
Ilia da hamedei liligi, amo Di dawa:bela:?
13 Ninia fi gadenene fi dunu ilia da Dia ninima hamoi amoba:le
niniba:le habosesesa amola oufesega:sa.
14 Dia hamobeba:le, fifi asi gala dunu huluane da ninima higale ba:sa.
Amola ninia da hamedei liligi, ilia dawa:sa.
Ilia da ninima higale, dialuma fofoga:sa.
15-16 Na da eso huluane gogosianana.
Na da nama ha lai amola higa:i dunu
ilia nama odagia adoleba:le amola lasogole sia:beba:le
na baligiliwane gogosiasa.
17 Amo hou huluane da ninima doaga:i dagoi.
Be ninia da Di hame gogolei.
Ninia da sema gousa:su amo Di ninima hamoi, amo hamedafa fi.
18 Ninia Dima fa:no bobogebe hame yolesi.
Ninia da Dia hamoma:ne sia:i nabawane hamonanu.
19 Be Di da fedege agoane nini sigua ohe amoga gasomoma:ne udigili yolesi.
Di da gasidafa amo ganodini esaloma:ne nini yolesi dagoi.
20 Ninia da ninia Godema nodone sia:ne gadosu amo yolesi ganiaba
amola ga fi ogogosu ‘gode’ ilima sia:ne gadoloba,
21 Di da amo dafawane ba:la:loba.
Bai Di da ninia muguniai asigi dawa:su huluane dawa:.
Be ninia da Di hame yolesi.
22 *Louma 8:36Be ninia Dima fa:no bobogebeba:le, eso huluane bogosu ba:lala.
Ninima ha lai dunu da dunu amo da sibi medole legelala
amo defele nini medole legelala.
23 Hina Gode! Di nedigima! Dia abuliba:le golai dianabela:?
Disu wa:legadoma! Ninima higa:iba:le, eso huluane nini mae yolesima!
24 Dia abuliba:le ninima wamoaligi dianabela:?
Ninia se nabasu amola bidi hamosu amo mae gogolema!
25 Ninia da osoboga gala:la daha.
Ninia enoga hasali dagoiba:le, osobo gulu da:iya diafula.
26 Nini fidila misa! Nini gaga:ma!
Bai Di da mae fisili, asigidafa hou gala.