59
Gaga:ma:ne Sia:ne Gadosu
* 1 Sa:miuele 19:11Na Gode! Nama ha lai dunu ilia na fane legesa:besa:le, Dia na gaga:ma!
Nama ha lai dunu da nama doagala:be amoga na gaga:ma!
Amo wadela:i hamosu dunu ili na fane legesa:besa:le, na gaga:ma.
Ba:ma! Ilia da na fane legemusa: oulela.
Dodona:gi dunu ilia da na fane legemusa: gegedosa.
Bai na wadela:i hou hamoiba:le, hame amaha.
Hina Gode! Na da giadofale hame hamoi.
Be ilia da hedolowane na doagala:musa: oulelefula.
Hina Gode Bagadedafa! Na fidimusa: wale gadoma!
Isala:ili Gode! Disu ba:ma!
Walegadole, wadela:i hamosu dunuma se bidi ima!
Wadela:i hohonosu dunu ilima mae asigima!
Ilia da wa:mega gesenebe agoane, daeya bu misini,
moilai bai bagade ganodini gegesenesa ahoa.
Ilia odagia gadesa amola magagisu hou amo nabima!
Ilia lafi ganodini gona:su da gegesu gobihei agoai gala.
Be ilia hamobe amo da enoga hame nabahayale, ilisu dawa:sa.
Be Hina Gode! Di da iliba:le ousa!
Di da wadela:i hamosu dunu huluane amoba:le oufesega:sa.
Gode! Di da gasa bagadeba:le,
na da hahawane bagade Dia hou dafawaneyale dawa:sa.
Gode! Di da na wamoaligisu sogebi gala.
10 Na Gode da nama asigisa.
Amola E da nama fidimusa: misunu.
E da na siga ba:ma:ne, nama ha lai dunu ili hasalimu.
11 Gode! Na fi dunu ilia Dia hou gogolesa:besa:le,
nama ha lai dunu mae fane lelegema.
Be ninia Hina Gode! Ninia Gaga:su!
Dia gasaga ili afagogolesili, ili hasalima.
12 Ilia wadela:i hou da ilia lafi gadofo da:iya diala.
Ilia sia:be huluanedafa da wadela:i sia: fawane sia:sa.
Ilila: gasa hidale hou hamobeba:le,
ilia da fedege agoane saniga sa:i dagoi ba:mu da defea.
13 Ilia da wadela:i sia: amola ogogosu bagade sia:beba:le,
Dia ougi hou amoga ili dafawanedafa gugunufinisima.
Amasea, dunu huluanedafa da Gode da Isala:ili fi dunu
amola osobo bagade fifi asi gala dunu huluanedafa ili ouligisa, amo dawa:mu.
14 Nama ha lai dunu, ilia da wa:mega gesenebe agoane,
daeya bu misini, moilai ganodini gegesenesa ahoa.
15 Ilia da wa:me ha:i manu hogola labe
amola ha:i manu hame galea gaga:nosa labe, agoai gala.
16 Be na da Dia gasa dawa:beba:le, gesami hea:mu.
Hahabe huluanedafa, na da Dia mae fisili asigidafa hou
amoma nodoma:ne, gesami ha:gidafa hea:mu.
Di da na bidi hamosu ba:i eso amoga, na wamoaligisu sogebi dialebe ba:i.
17 Na Gaga:sudafa! Na da Dima nodomu!
Na wamoaligisu sogebi da Gode!
Amola Gode da nama hahawane dogolegesu gala.

*59:1: 1 Sa:miuele 19:11