85
Isala:ili Fifi Asi amo Noga:le Ouligima:ne Sia:ne Gadosu
1 Hina Gode, Di da Dia soge amoma asigi hou hamoi,
amola Di da Isala:ili bu noga:le hahamonesi.
2 Di da Dia dunu ilia wadela:i hou gogolema:ne olofoi dagoi,
amola ilia wadela:i hou huluane gogolema:ne olofolesi dagoi.
3 Di da ilima ougisu amo yolesi dagoi,
amola gasa bagade nimi hou amo Di guminisi dagoi.
4 Nini gaga:su Gode, nini bu oule sinidigima,
amola ninima hahawane hame ba:su amo yolesima!
5 Di da mae yolele ninima gebewane ougi dialoma:bela:?
Dia ougi da mae gumini gebewane dialoma:bela:?
6 Nini bu gasa filisima,
amola Dia fi dunu ninia da Dima nodone sia:nanumu.
7 Hina Gode, Dia mae fisili asigidafa hou amo ninima olema,
amola Dia nini fidili gaga:ma.
8 Na da Hina Gode Ea sia:be amo nabala.
E da Ea fi dunuma hahawane olofosu hou amo imunusa: ilegele sia:sa,
be amo da ninia musa: gagaoule hamonanusu hou amoga hame buhagisia,
9 E da dafawanedafa Ema nodone sia:be dunu amo gaga:musa: momagele ouesala,
amola Ea gaga:su hou da ninia soge amo ganodini dialumu.
10 Asigi hou amola didili hamosu hou da ela disimu!
Moloidafa hou amola olofosu hou da ela yosia:mu.
11 Dunu ilia madelagisu hou da osoboga gudunini gado heda:mu,
amola Gode Ea moloidafa hou amo da fedege agoane
Hebenega gadonini gudu ba:legudumu.
12 Hina Gode da nini bu noga:le hahamonesimu
amola ninia soge da ha:i manu noga:le heda:mu.
13 Moloidafa hou da Hina Gode Ea midadi bisili,
E misa:ne logo fofodola masunu.