84
Gode Ea Diasuga Heda:musa: Hanasu
1 Hina Gode Bagadedafa,
na da Dia Debolo diasu amo bagadewane hanai gala!
2 Na da amoga esalumusa: hanai bagadewane gala.
Na da Hina Gode Ea Debolo Diasu
amo ganodini esalumusa: bagadewane hanai gala.
Na da:i huluane amoga na da esalebe Godema hahawane nodone gesami
hea:sa.
3 Gogobe amolawane da ea musugai gala
amola segena:dia amolawane da ilila: diasu gala
amola ilia da ilia mano amo Dia oloda gadenene dialoma:ne hamosa.
Hina Gode Bagadedafa da na Hina Bagade amola na Gode!
4 Dia Debolo ganodini esalebe dunu ilia da eso huluane hahawane bagade gala!
Ilia da Dima nodone eso huluane gesami hea:lala.
5 Dimadi misi gasa lai dunu ilia da hahawane bagade gala.
Ilia da Saione goumi amoga masunusa: bagadedafa hanai gala
6 Ilia da Ba:iga hafoga:i fago amodili baligisa ba:loba,
amo soge da bubuga:su soge hamonanebe ba:sa,
amola woufo dialu gibu dabe amoga da si hano nabale gagai.
7 Ilia mae gogaeane gasa filiwane ahoa.
Ilia da Gode (E da eno ‘gode’ bagade baligisa) Saione goumi da:iya ba:mu.
8 Gode Hina Bagade Ya:igobe ea Gode,
na sia:ne gadobe nabima!
9 Gode, nini Hina Bagade amo Di ilegelesi,
Ema hahawane hou ima!
10 Eso afae Dia Debolo diasu ganodini esalumu
da eso 1,000 eno sogega esalumu bagadewane baligisa.
Na da na Gode Ea diasua logo ga:su gadili lelumu da defea,
be wadela:i hamosu dunu ea diasu ganodini esalumu da defea hame.
11 Ninia Hina Gode da nini Gaga:sudafa amola hadigidafa Hina Bagade.
E da ninima olofosa amola nodone dawa:sa.
E da molole hamonanebe dunu amo ea adi liligi adole ba:sea, amo ema iaha.
12 Hina Gode Bagadedafa! Nowa dunu Dima dafawaneyale dawa:le
fa:no bobogebe dunu, ilia da hahawane bagadedafa gala.