112
Dunu Noga:idafa da Hahawane Esalumu
1 Hina Godema nodoma!
Nowa da Hina Godema nodone dawa:sea
amola Ea hamoma:ne sia:be amo hahawane noga:le hamosea,
e da hahawane bagade gala.
2 Noga:idafa dunu ea mano da Isala:ili soge ganodini gasa bagade ganumu.
Amola egaga fifi mabe da hahawane ba:mu.
3 Ea sosogo fi da bagade gaguiwane ba:mu.
Amola e da hahawane, bagade gaguiwane fifi ahoanumu.
4 Noga:idafa dunu (ilia da asigidafa amola moloidafa amola gogolema:ne olofosu
dawa:), ilia da gasi ganodini esalea, hadigi ba:sa.
5 Nowa dunu da mae hihini eno dunuma fa:no lamusa: muni iasea,
amola bidi lamusa: molole hawa: hamosea, e da hahawane gala.
6 Noga:idafa dunu da hamedafa dafamu.
Amola eno dunu da ea hou hame gogolemu.
7 E da da:i diosu sia: nabasea, hame beda:sa.
Bai ea dafawaneyale dawa:su hou da gasa bagade.
Amola e da Hina Godema dafawaneyale dawa:sa.
8 E da da:i dione bagade hame dadawa:sa, amola hame beda:sa.
E da dafawane ea ha lai dunu ili hasalasi dagoi ba:mu.
9 *2 Golidia 9:9E da mae hihini hahani dunuma iaha.
Ea dogolegei hou da hamedafa dafasa.
E da gasa bagade amola mimogo dunu agoane esalumu.
10 Wadela:i hamosu dunu da amo hou ba:sea, ougisa.
Ilia da higale ha:giwane sosodola aligili, alalolesisa.
Ilia dafawane hamoma:beyale dawa:su ahoawane,
bu hamedafa ba:ma:ne, asi dagoi ba:sa.