2
Awatedo embo neneida yai sinigambarida kotembari berari dowo. Edo udumbari buro berari embo neneida yai dowo. Edo iwawa tote (2) jigamo ari, edo embo neneida rorae bain jipapa ari, edo ge bebegae embo neida daoda tari awa berari dowo. 2-3 Ainda edo kando davegave awa Badari mi itomane yai piesiri matu buritewa, awaembo mamai teka engari dá awamaneda aida ami inain udojipapabé era ango, imomane God da ge beyae itae awa udojipapabé ewo, amimi ari imomane embobé badave.
Iesu awa God da gerari ganuma edo Iesu da embomai awa God da gerari embomai.
Imomane Badari da yai gundo ewa, edo embo awa ganuma wasiride ango. Embo awa embomaimi ajiregesitera, ata God mi gerisina, edo embo awa deposibé God da yai. Edo dá embomaimi oro ganumami gamboro visido era ango, imomane awa ganuma wasiride angogo God mi ainda Asisi da oro gamburi visido eira awa. Edo God jipapa eira awa inemane pirisi kokotopu angomi Iesu Keriso da toda do itomane ami rorou davegave God da jisida ainde piawate. Awatedo God da Ove Gaiari doda ainda tari daedo isira,
“Giwo, nane tutuvida ganuma davebé dave* tutuvida ganuma davebé dave. Iji matu ainde Israel embo nenei awawaneda oro ganumami gamundo esitera. Edo awamaneda oro tuturoda gapeite awamanemi ganuma okain kupo berari dambu dararide tamundo oro tekada tutuvi umbugoda piedo esitera. Ainda amboda awamanemi ganuma einda kupo kupo dambu dararide inono goteite ainda demonda ganuma nenei tano kokopibéda piedo oro teka gamundo esitera. Daedo, ganuma davebé awawa awamanemi jigamo edo esitera ango, ami ganuma demonda tandodeite eiuri oro okain edo dave petedo isima edo esisina. awa Zion nasida pipitena.
Awawa nato gerari edo deposibé.
Edo embo ainmi ainda gebé ari ainda yai piedo eira awa
mana mengaina.” Isaiah 28:16
Awatedo imomane ainkain gebé ari ainda yai pisido ewa, embo awa deposibé itomane yai. Ata embomai ainkain embo eiwa kera ae edo era,
“Ganuma oromando ari embomi ajiregesitera awa,
God mi esiri tutuvida ganuma davebé dave esira,
edo ami awa jigamo esiri oro okain esira.” Psalm 118:22
edo,
“Ganuma einda awa ganuma embomi tai koingedo era ango,
edo banga dá ami euri awamane durudo era.” Isaiah 8:14
Embo ainkain God da ge kera ae edo era awa, tai koingedo era. Edo God mi awamanede ainda ge ajiregarida mina awawa ango sirigesisina.
Ata imomane awa God da gerari embomai, daotarida pirisi mane, orobe kotopu, edo ainda embomai deposi. God mi imomane dao sisina muyaeda edo ainda parara davebé daveda gundo ainda wasiri davebé dave awa karigawate. 10 Iji gisi imomane awa God da embomai ae, ata boroko imomane awa God da embomai. Edo iji gisi imomane God da do ari bae, ata boroko imomane ainda do ari buritewa.
11 Nato dubobari otatawo, dederi embomai yai neneida ango, na imomane atega ena. Tamopisida jipapa bebegae awa itomane wasirida gitopo, awatedo gunjindewo. 12 Imomane God gae embomai God gae embomai. Guriki ge einda awa Gentile embomai, ata Ove Kotopuda atopapasigarimi kotembedo era ainda moka awa ‘God gae embomai’. de daedo isite iwata dave edo ewo. Edo awamanemi ge bebegae itomane daoda tara gido, ainda amboda awamanemi itomane buro davegave awa gara, edo iji ainde God mi awamaneda yai gundo etega ari God mi awamaneda yai gundo etega ari. Ge einda moka rori? Ove Kotopuda atopapasigari kotembari evekara budo era. Awatedo atopapasigarida kotembari tote (2) einda gave: Kotembari da (1) awa iji angode God da Asisi mi gundo Iesu da embomaida gitopo etega edo awamaneda do pirigaina, awamanemi God da dave ari gido awamaneda do ainda yai wareregedo God dasiga ara. Kotembari tote (2) awa God da etega ari iji ainde Iesu tekago butuda gundo embomai berari kataina. Edo iji ainde embomai berari butu dededa ami Iesu tumondebain eite imo awa Badari karigara. awamanemi God da yai taogari piara.
Iesu da embomaimi daotari de gisijijiegari de awa kera edo ore.
13-14 Awatedo, Badari awaembo babadegari berari embomi avigedo etera awa kera edo ewo. Imomane daotari, gisijiari bajinabé bajina, ainda ge kera ewo, edo gavana mane ainda tuda ami pipisisina, awamaneda ge kera ewo. Daotari ami ainda gisijijiegari piesiri gumbera awa, embo buro bebegae edo erada yai rirowa piorote, edo embo buro davegave edo erada yai dasiga piorote. 15 Gebé, God da jipapa awa inemane buro dave edo ewa ami embo kotembari jigamo aededa ge gari itaede awamanemi imondemane tedo era awa engiregawate. 16 God da udegari embomai ango isiwo. Awarata itomane udegari jigamo eite itomane buro beyae onjigainyae, ata God da buro embobo ango isiwo. 17 Embomai berari tou ewo. Gebé ari nanonameji dubobudo ewo. God tou ari bajina edo ewo. Daotari tou edo ewo.
Iesu da embomaimi awamaneda babadegari kera edo ore.
18 Buro embobo, itomane babadegari tou ari bajina berarimi kera edo ewo. Edo babadegari davede edo tataimbaride akuta ainyae, ata babadegari wasiri dambu darae daedo. 19 Edo itomane buro beyae awa itae, edo awamanemi memesi itomane yai piedo era, ata aindabé imomane God da jipapa awa gari imomane memesi bureite goroba edo buro matawa edo ewa, God itomane yai dubodave eira. 20 Ata, edo buro bebegae eiawo awamanemi imomane vedeiaro gido goroba edo buro matawa edo awa, embo ain imomane dasiga aini? Awarata, edo imomane buro dave eite memesi bureite goroba edo buro matawa edo awa gido, God itomane yai dubodave aina. 21 Keriso daedo kaena embo memesi burisina, awatedo God mi imomane engo awate dao sisina. Ami kariwa awa itomane yai pipisisina awa, imomane ambo ambo awa.
22 “Embo awa jimbo da ji ae,
edo ainda beda ge pitawa itae.” Isaiah 53:9
23 Edo iji angode embo ainde awamanemi ge bebegae tedo esitera, ami ge bebegae awamanede mina tae edo esisina; edo iji angode memesi budo esisina, ami rirowa ge awamanede tae edo esisina. Ata imo gosisina awa, God mi iji berari katari dambu darari edo eira, awatedo embo ami God tumonda eite ainda wasiri God da yai piedo esisina. 24 Ami akuta kaenato jimbo bebegaeda rirowa ainda tamoda budo oregada besisina awa, kaenane jimbo bebegaeda wasiri dodo wasiri dambu dararida begatada pepeta anate tedo. Ami kambo awa burisina, amimi esiri imomane kaviegari buritewa. Isaiah 53:5 25 Iji gisi imomane wo sipumane ango, begatabé awa dodo yai neneida mambae dumbae edo esitewa. Ata boroko imomane overegedo Iesu da yai tekago guputewa itewa. Edo embo ami dá sipumaneda sima ari embo ango imomane sima edo eira, edo gisijido eira.

*2:6 tutuvida ganuma davebé dave. Iji matu ainde Israel embo nenei awawaneda oro ganumami gamundo esitera. Edo awamaneda oro tuturoda gapeite awamanemi ganuma okain kupo berari dambu dararide tamundo oro tekada tutuvi umbugoda piedo esitera. Ainda amboda awamanemi ganuma einda kupo kupo dambu dararide inono goteite ainda demonda ganuma nenei tano kokopibéda piedo oro teka gamundo esitera. Daedo, ganuma davebé awawa awamanemi jigamo edo esitera ango, ami ganuma demonda tandodeite eiuri oro okain edo dave petedo isima edo esisina.

2:6 Isaiah 28:16

2:7 Psalm 118:22

2:8 Isaiah 8:14

2:12 God gae embomai. Guriki ge einda awa Gentile embomai, ata Ove Kotopuda atopapasigarimi kotembedo era ainda moka awa ‘God gae embomai’.

2:12 God mi awamaneda yai gundo etega ari. Ge einda moka rori? Ove Kotopuda atopapasigari kotembari evekara budo era. Awatedo atopapasigarida kotembari tote (2) einda gave: Kotembari da (1) awa iji angode God da Asisi mi gundo Iesu da embomaida gitopo etega edo awamaneda do pirigaina, awamanemi God da dave ari gido awamaneda do ainda yai wareregedo God dasiga ara. Kotembari tote (2) awa God da etega ari iji ainde Iesu tekago butuda gundo embomai berari kataina. Edo iji ainde embomai berari butu dededa ami Iesu tumondebain eite imo awa Badari karigara.

2:22 Isaiah 53:9

2:24 Isaiah 53:5