1 Eutumai, itomane ibonomai dá ango kera edo ewo. Ango awo itomane ibonomai nenei God da ge kera ae edo era ami itomane wasiri gido, inemane ge da (1) awamanede tae, awamaneda do Keriso da yai wareregara. 2 Edo awamanemi itomane wasiri dono itae edo tou aride awa matawa gido, awamaneda do wareregara. 3 Edo itomane giro ari arapada—kopuru tu pundari ta, rorae gold piari ta, ombarijiari ganu bajina piedo bari ta—awa akuta kotemainyae. 4 Ata rorae davebé dave, ainda duroka mana manaina, ami itomane do giropagiro ewo. Edo rorae ango deposibé God da jisida awa kotembari netegaride edo damodamode. 5 Iji gisi eutumai kotopu begata dá ango awa ambo ambo edo awamaneda tumonda ari God da yai piedo esitera. Edo awamane kera ari awamaneda ibonomaida yai ami awamanemi akuta giropagiro edo esitera. 6 Sarah mi dá ango Abraham kera edo “badari” embo ainde dao tedo esisina. Edo imomane rorae da ro adu ae buro dave edo ewa gido, imomane awa Sarah da maigagara ango.

7 Ibonomai, itomane eutumaide dá ango isite kotembari dave budo awamane tou edo ewo. Itomane eutumaida goroba awa bajinabé ae, edo God mi imomane aedade wasirida kando dave piesiri buritewa, awatedo ango awo rorae da nomi itomane benunu tari awa engiregainyae.

8 Edo ge einda beao ari awa eire. Imomane berari kotembari dá ango budo ewo, edo itomane dubo vevera mina bara edo ewo. Nanonameji ango dubobudo ewo, edo do memesi mina bara edo ewo, edo atoto mina ara edo ewo. 9 Edo embomi wasiri beyae itomane yai aro gido, mina beyae ainyae. Ko embomi ge bebegae itomane daoda taro gido, mina ge bebegaemi tainyae. Ata God da yai benunu tedo ewo, ami awamaneda yai ao ari piare. Aindabé God imomane dao sisina awa, buro ango awa awo ainda ao ari itomane yai piari bawa. 10 Gebé,

13 Edo imomane buro dave awa, embo ainmi itomane yai memesi piaini? 14 Ata gebé, edo imomane wasiri dambu darari eiawo embomi itomane yai memesi piaro bawa gido, God mi imomane ao aina. “Edo awamanemi adu ari ge taro gido, adu ainyae, edo do itomane dowawo buriya ainyae.”Isaiah 8:12 15 Ata itomane doda Badari God tou ewo. Edo iji matawa embo berari ainmi imondemane ro awaembo itomane tumonda ari God da yai piedo evi awa gain siari gido, itomane ge mina matu siya ari awa ainde netegaride edo tou aridemi tewo gare. 16 Itomane dokotembari dave awa sima edo ewo. Edo ango eiawo, iji ainde embo neneimi imomane awa bebegae ari embomai tara, aindabé imomane awa Keriso da embomai edo iwata dave edo ewa, awamanemi mengari bara. 17 Iji nenei God da jipapa awa imomane memesi bawa. Awatedo edo imomane buro dave eowo embomi itomane yai memesi piedo era, awa itomane dave. Awarata edo imomane buro beyae edo ewa gido, embomi itomane yai memesi piedo era, awa itomane buriya akuta.

18 Kotembewo, Keriso, embo jimbo beyae itae, ami daedo embomai jimbo beyaede awaembo iji dabé memesi burisina. Embo ami imomane God da yai kundo gumaintedo jimbo bebegae awaembo memesi burisina. Awamanemi ainda tamo detero besisina, ata God da Asisi mi jiri erido wasiri tenda burisina. 19-20 Edo iji gisi ainde Noah mi un ma bajina dao ‘aki’ sirigedo esisina, God da Asisi mi daedo Keriso*Keriso. Guriki da ge einda awa embo awa, ata ainda moka awa Keriso (1 Peter 3:18 giwo.). kondade esiri ami maundo, asisi ainkain boroko bundari oroda itera, awamaneda yai God da ge karigesisina.†Ge einda moka awa rori? Ove Kotopuda atopapasigari kotembari evekara budo era. Awatedo atopapasigarida kotembari tote (2) einda gave: Kotembari da (1) awa Noah da ijide, Keriso da Asisi mi Noah da toda embo enembode God da ge karigedo esisina. Ata awamanemi ainda ge gunjindetero God mi dauma piesiri gumbiri awamane bebetegesitera. Awatedo awamaneda asisi boroko yai niyao matawa aveira ainda bundari oroda itera (Mark 9:42-48; Luke 16:22-26). Edo Kotembari nei (2) awa Noah da ijide, anelamane bebegaeda asisi daedo butuda isima edo esitera. Edo iji angode Noah mi God da ge karigedo esiri, awamane ainda ge gunjindetero God mi rirowa awamaneda yai pipisisina. Awatedo anelamaneda asisi awawa boroko yai niyao matawa aveira ainda bundari oroda itera. Ango edo iji toropu Keriso da betari edo erari, ine anelamane bebegaeda asisida bundari yaida maundo nongo edo imo awamane daginegesira awamanede karigesisina (Matthew 25:41-46; 2 Peter 2:4-11). Edo God mi awamane embo tataimbesite sima edo esisina, ata awamanemi ainda ge kera ae esitera. Edo embo indewae, 8 akuta, akida torero un dauma gumbiri un made peka peka ero God mi awamane toregesisina.Genesis 6:1—7:24; 8:18; Hiburu 11:7; 2 Peter 2:5 21 Un eiwa awa bapataito arida kariwa ango. Edo kaenane God da yai kaenato jimbo beyae kotembedo dowarate benunu tedo era, God mi kaenato jimbo teiedo kaena toregedo eira. Bapataito ari un mi kaenato tamoda dono awa teiae edo eira. Ata bapataito arida un ami arapa edo eira, kaenato jimbo dodo era, edo kaenato dokotembari awa dono itae God da jisida. Ata ge bajinabé awa God mi, Iesu Keriso da betedo erarida toda, kaena toregedo eira. 22 Edo Keriso‡Keriso. Guriki da ge einda awa embo awa, ata ainda moka awa Keriso (1 Peter 3:21 giwo.). utuda visido maundo God da ipa beda anumbesisina isira, edo anelamane de asisi nenei gorobade ae awamaneda babadegari demi ainda ge kera edo era.