12
Badari da anelami Peter bundari oroda kundo dodo idegesisina.
1 Awara, iji ainde Daotari Herod*Daotari Herod da daobé awa Herod Agrippa I. Imo awa Herod Bajina da apiye edo Judea gisijido esisina (A.D. 37-44). erido Yesu gebé ari embomainda doregarida embo neneinda yai tuturo edo memesi neindekainde pisido esisina. 2 Edo embo ami itoro embobode tesiri John da nameji James awa kasiwomi detero besisina. 3 Ango esiri Judah embomai dubodave esitera. Awatedo, embo ami tesiri itoro embobo maundo Peter kuputera. Edo iji einde Judah embomaimi awamaneda Bread Badari Siwo Piaeda Bondo†Bread Badari Siwo Piaeda Bondo da ge jirari Exodus 12:15-20; 13:3-10; Leviticus 23:6-8; edo Deuteronomy 16:3-4 isira. ero Herod buro awa esisina. 4 Ango edo awamane Peter kundo maundo bundari oroda pipisitera. Edo Herod mi sirigesisina awa, deguta da da itoro embobo 16 ami Peter sima orote. Deguta da da ainda doda embo ipa ao pasido (4) da doregari evekara ami Peter sima edo esitera, sipode, ijide, turode, muyaende ango. God da Darutegari Bondo‡God da Darutegari Bondo da ge jirari Exodus 12:1-14; Leviticus 23:5; edo Deuteronomy 16:1-7 isira. Awarata, duberi jiwaebé itae esiri ainda amboda, iji angode Peter isinesina, embo jiwaemi dao ‘God da Darutegari Bondo’ kundo ‘Bread Badari Siwo Piaeda Bondo’ da deroda jigamo edo esitera. Awatedo, dao ‘God da Darutegari Bondo’ da moka ‘Bread Badari Siwo Piaeda Bondo’ daedo burisina. itae ari gido Herod da jipapa awa Peter kundo gundo Judah embomainda dombuda katedo dari betaina.
5 Awatedo, awamanemi Peter bundari oroda sima esitera, ata Yesu gebé ari embomainda doregari awa God da yai embo awa embo benunu matawa tedo esitera.
6 Edo muyae gisida Herod mi embo awa kundo idegedo embomainda dombuda kataina, Peter awa itoro embo tote (2)da toropuda asi okain aurimi ari tote§asi okain aurimi ari da moka English geda awa chain(s). (2) ami awamanede daedo bundetero jitao ausina. Edo itoro embo nenei ami manguroda isite bundari oro sima edo esitera. 7 Boraebé Badari da anelami ainda yai petesiri parara bundari oroda datembesisina. Edo anelami Peter da dendegida ipa pisido aujite sisina, “Burigibé erido pete!” Iji dá ainde asi okain aurimi ari tote (2) awa ainda ipada teugedo duduritera.
8 Ango edo anelami ainde sisina, “Ito bupuri jido ito tai woru pieyo!” Awatedo, Peter de ro sisini awa esisina. Edo anelami ainde sisina, “Ito dademo ombari omundo namonde daedo puyo!” 9 Ango edo Peter mi anela awa kera edo ambo ambo eite idegesisina. Atako buro ro anelami esiri gido awa, Peter kotembesisina awa gebé ae. Awa garago girago gari ango kotembesisina. 10 Edo aedade bundari oro sima ari embo da (1) daginegedo maundo sima ari embo nei daginegedo maunsitera. Edo awamanemi guwa be aurimi ari awa bundari oroda edo nasi bajinada mambari ainda guputera. Edo guwa be awa akuta awamane embo pirigesisina. Ainda amboda, awamane tote (2) arapada idegedo begata da (1) ainda pepeta edo maunsite boraebé anelami embo awa dodo maunsisina.
11 Ango edo Peter bé gidogogo esisina wasiri ro ainda yai idegesiri edo sisina, “Boroko na gotena, awa bé gebé. Badari mi ainda anela piesiri na Herod da gorobada edo Judah embomainda jipapada toregesira.”
12 Edo iji ainde Peter awa gari, God imo toregesisina, embo ami Mary da mandoda aunsisina. Eutu awa John Mark da ai. Edo iji dá ainde embomai jiwae ainda mandoda dada edo benunu site itero Peter gupusina. 13 Edo Peter guwa beda petedo tatain jivesina. Edo buro ari gagara dao Rhoda ami yavi ingido gain gupusina. 14 Ango edo gagara awa ainda ge yavi ingido awa Peter da dubo kariwabé gosisina. Edo gagara awa yawa eite guwa be pirigae, ata imo tenda egenembedo ainto tumundo embomai doda awamanede karigesisina awa, “Peter guwa beda petesira isira!” sisina.
15 “Imo duteta!” awamane ainde mina sitera. Ata gagara awa do jinenegedo, ge awa gebé tedo esisina. Ango edo awamanemi mina ainde sitera, “Awa ainda anela,”*Awa ainda anela. Awamaneda gebé ari awa God mi ainda gebé ari embomai berarida yai dedegari anela da da avigedo pisido esisina (Matthew 18:10; Hiburu 1:14). sitera.
16 Ata Peter tatain jiwari dowae matawa edo esisina. Ango esiri awamanemi maundo guwa be pirigedo embo awa gido bé korebakore esitera. 17 Edo Peter mi awamane ge doworote kariwa ipami pipisisina. Ainda amboda, ami awamanede ge jijirisina nongo edo Badari mi imo gisijido kundo bundari oroda edo idegedo gumbiri. Edo awamanede sisina, “Mambuwo! Ge eiwa James†James einda awa Yesu da nameji. Imo awa Yesu gebé ari embomainda doregarida gisijiari bajina Jerusalem nasi ainda. John da nameji James awa embo eve (Iwata Ari 12:2 giwo!). ae Yesu da gebé ari embo neneinde tewo gore.” Ango tedo embo awa dodo yai neinda maunsisina.
18 Edo sipo atesiri itoro embobo Peter tambari tao ae. Awatedo, awamane itadaita bajinabé eite mina tara esitera, “Nongo nongo edo embo eiwa udegesiri?” 19 Ango etero gido Herod mi ge okain tesiri itoro embo nenei maundo Peter kakowa edo tambae. Awatedo, Herod mi Peter da itoro sima ari embobo udugedo tedogosisina, “Peter nongo edo idegesiri?” Ata awamanemi Peter nongo edo idegesiri tari tao ae. Awa embo, Herod ge okain itoro embo neneinde tesiri awamane detero besitera. Ainda amboda, Herod yai Judea dodo wotedo nasi Seseria ainda isinesina.
Badari da anelami Herod dorisina.
20 Awara, iji ainde Herod awa bé Taia nasi ae Saidoni nasi embomai de sinigambari bajinabé esisina. Iji gisi awa nasi tote (2)da embomai ami Herod da butuda indari budo esitera. Ata iji amboda, Herod mi nasi tote (2)da indari bari ango engiregesisina. Awarata, awamanemi indari awa tenda bain jipapa esitera. Awa embo, nasi tote (2)da embomai dada edo kotembari da (1) bureite béga bari embobo pietero Herod da yai guputera. Ango edo awamanemi Daotari Herod da buro embo dao Blastus otawo esitera. Edo awamane embo ainde tedogositera, béga bari deguta dave awamane embo sirigarate.
21 Awatedo, deguta Herod avigesisina ainde, embo awa ainda daotarida ombarijiari dave omundo ainda daotarida anumbada anumbedo arapada embomai berarida jisida ge gorote tedo esisina. 22 Edo embomai aorogasite tedo esitera, “Embo emi ge sira awa embo enembo ae, ata god!” 23 Edo boitebé Badari da anelami embo awa desiri dudurisina, aindabé Herod mi God dasiga ae, awatedo. Ango esiri kosisimami ainda deoboge indero besisina.
24 Ata gebé ari embomaimi God da bino dave embomai yai neneinda yai karigesiworo embomai nenei jiwaebé Yesu da yai gebé eiworo God da bino dave ango arapu edo esisina.
25 Edo Barnabas ae Saul demi kondade ari buro‡kondade ari buro da moka awa Barnabas ae Saul demi Enteoki gebé ari embomainda kando kundo maundo yai Judea gebé ari embomainda orobeda kopuru mamainda yai pipisitera (Iwata Ari 11:30 giwo!). itae edo John Mark budo ainde daedo Jerusalem dodo tenda overegedo Enteoki nasida guputera.§John Mark budo ainde daedo Jerusalem dodo tenda overegedo Enteoki nasida guputera. Guriki ove gaiari neneinda ajigari einda awa, John Mark budo ainde daedo Jerusalem da tenda overegedo guputera.
*12:1 Daotari Herod da daobé awa Herod Agrippa I. Imo awa Herod Bajina da apiye edo Judea gisijido esisina (A.D. 37-44).
†12:3 Bread Badari Siwo Piaeda Bondo da ge jirari Exodus 12:15-20; 13:3-10; Leviticus 23:6-8; edo Deuteronomy 16:3-4 isira.
‡12:4 God da Darutegari Bondo da ge jirari Exodus 12:1-14; Leviticus 23:5; edo Deuteronomy 16:1-7 isira. Awarata, duberi jiwaebé itae esiri ainda amboda, iji angode Peter isinesina, embo jiwaemi dao ‘God da Darutegari Bondo’ kundo ‘Bread Badari Siwo Piaeda Bondo’ da deroda jigamo edo esitera. Awatedo, dao ‘God da Darutegari Bondo’ da moka ‘Bread Badari Siwo Piaeda Bondo’ daedo burisina.
§12:6 asi okain aurimi ari da moka English geda awa chain(s).
*12:15 Awa ainda anela. Awamaneda gebé ari awa God mi ainda gebé ari embomai berarida yai dedegari anela da da avigedo pisido esisina (Matthew 18:10; Hiburu 1:14).
†12:17 James einda awa Yesu da nameji. Imo awa Yesu gebé ari embomainda doregarida gisijiari bajina Jerusalem nasi ainda. John da nameji James awa embo eve (Iwata Ari 12:2 giwo!).
‡12:25 kondade ari buro da moka awa Barnabas ae Saul demi Enteoki gebé ari embomainda kando kundo maundo yai Judea gebé ari embomainda orobeda kopuru mamainda yai pipisitera (Iwata Ari 11:30 giwo!).
§12:25 John Mark budo ainde daedo Jerusalem dodo tenda overegedo Enteoki nasida guputera. Guriki ove gaiari neneinda ajigari einda awa, John Mark budo ainde daedo Jerusalem da tenda overegedo guputera.