20
Iesu mi betarida edo erorisina.
(Matthew 28:1-8; Mark 16:1-8; Luke 24:1-12)
Ango edo deguta pura tuturoda, sipo ataede muyae matawa isiri, Mary, nasi Magadala eutu awa banga toda maunsisina. Edo ami ganuma to beda awa kundo demonda piari gosisina. Edo eutu awa ainto tumundo maundo Simon Peter ae ambodani nei (Embo awa Iesu mi dubobé budo esisina.) aindeda yai gupusina. Edo Mary mi awamane tote (2)de sisina, “Awamanemi Badari da tamo goiari banga toda awa kundo eve mambera, edo yai nonda pieteri awa nakare gae.”
Awatedo Peter ae ambodani nei de idegedo goiari banga toda tuturo edo maunsitera. Edo awamane tote (2) ainto inono banono tuputera, edo ambodani nei ami tumundo Peter daginegedo goiari banga toda gisi gupusina. Edo embo awa petedo anega edo jisi banga to doda pipisite gongo jibigi riribo virarae awa durari isiri gosisina. Awarata imo torae. Ango edo Simon Peter embo awa ambo ambo eite gundo banga toda torido gongo jibigi riribo virarae durari awa gosisina. Edo imo daedo gongo gisi dombu gaigari ami Iesu da kopuru doisina awa gosisina. Edo dombu gaigari awa gongo jibigi virarae de daedo itae, ata awa akuta bodedo yai eve demonda piari. Edo ambodani nei gisi banga toda gupusina awa daedo torido gido gebé esisina. Awarata awamanemi God da Ove Gaiarida ge, Iesu betarida erarate tari isira awa gae arapa ae. 10 Edo ambodani tote (2) overegedo awamaneda mandoda tekago maunsitera.
Iesu mi Mary Magadala eutuda yai idegesisina.
(Mark 16:9-11)
11 Ata Mary banga to beda petedo ji site isiri jiriri banga to doda gain anega esisina. 12 Edo eutu ami anela tote (2) ombarijiari pararade anumbedo itero gosisina. Anela nei awa kopuruda edo nei awa taida, yai Iesu da tamo pietero dudurisina ainda.
13 Ango edo awamanemi eutu ainde sitera, “Eutu, ro awaembo imo ji tesi?”
Edo ami awamanede sisina, “Awamanemi Badari nato budo eve aimbera, edo yai nonda embo awa pieteri na gae.” 14 Edo eutu awa ge engo tedo awa wareregedo Iesu ainda petedo isiri gosisina, ata ami Iesu gae arapa ae.
15 Iesu mi ainde sisina, “Eutu, ro awaembo ji tesi? Imo ave gain esi?”
Eutu ami kotembesisina imo awa buro sima ari embo, edo ainde sisina, “Dave embo, inemi embo awa budo eve aimbeta gido, yai nonda aundo pieteta awa namonde te, nane aundo embo awa budo eve mamane.”
16 Iesu mi ainde sisina, “Mary!”
Eutu awa wareregedo embo ainde sisina, “Rabboniǃ” (Ge ainda moka awa Atopatari.)
17 Iesu mi eutu ainde sisina, “Na Mamo natoda yai vitae matawa itena, awatedo imo na ikanade jiote. Ata nato nanonamejida yai maundo awamanede teyo, ‘Na Mamo natoda yai edo Mamo itomaneda yai vitain ena, edo God natoda yai edo God itomaneda yai.’ ”
18 Edo Mary Magadala eutu ami gundo ambodanide karigesisina awa, imo Badari gosisina, edo embo ami ge eiwa ainde sisina.
Iesu ainda ambodanida yai gupusina, ata iji ainde Thomas awa itae.
(Mark 16:14; Luke 24:36-43)
19 Ango edo deguta dá ainda turode, deguta pura tuturoda, ambodanimi Jew embobo awa adu esitera. Awatedo mando do jiumbari ainda doregedo manguro berari doda awa jijitera. Edo Iesu gundo awamaneda doregari doda petedo sisina, “Béga itomane yai itare!” 20 Edo embo ami ge eiwa sisina, edo ainda ipa de ainda dendegi de awamaneda yai esiri gositera. Edo iji ainde Badari gido ambodanimi do yawa esitera.
21 Edo Iesu mi awamanede tekago sisina, “Béga itomane yai itareǃ Dá ango Mamo mi na piesiri guputena, daedo nane imomane pipitena.” 22 Edo embo ami ge eiwa sisina, edo oena awamaneda yai putedo awamanede sisina, “Asisi Kotopu buwo. 23 Embo neneida jimbo inemane kotembedo dodo ewa gido, God mi awamaneda jimbo kotembedo dodo eira. Edo inemane embo neneida jimbo kotembedo dowae gido, God mi awamaneda jimbo kotembedo dowae.”
24 Ata iji ainde Iesu awamaneda yai gupusina, embo da (1) ambodani 12 ainda doda awamanede itae. Edo embo awa Thomas. (Ainda dao nei awa Didymus.)* Didymus da moka awa ‘jinjiga’. 25 Awatedo ambodani neneimi ainde sitera, “Nakare Badari geraǃ”
Ata embo ami awamanede sisina, “Na ainda ipada benoma dero awa gae, edo nato ipa toro benoma deroda piae, edo nato ipa ainda dendegi gaiarida deroda piae, na mana gebé ana.”
Deguta neide Thomas ambodani de daedo isiri Iesu awamaneda yai gupusina.
(1 Korinth 15:5)
26 Ango edo pura da (1) itae esiri, ainda ambodani tekago mando doda doregesitera, edo Thomas awamanede daedo dada esisina. Edo manguro berari doda awa jijitera, awarata Iesu gundo awamaneda toropuda petedo sisina, “Béga itomane yai itareǃ” 27 Edo embo ami Thomas de sisina, “Ipa toro ito awa ududugedo einda pieyo, edo ipa nato gi. Edo ipa ito awa ududugeyo einda, edo nato dendegi gaiarida deroda pieyo. Gebé ae eote, ata gebé eyo.”
28 Edo Thomas mi mina ainde sisina, “Imo awa nato Badari edo nato Godǃ”
29 Edo Iesu mi embo ainde sisina, “Imo na geta, awaembo gebé eteta. Ata God mi euri ouwamane dubodave edo era ainkain na gae awarata gebé edo era.”
Ro awaembo John mi ove eiwa gagurisini awa sisina.
30 Edo Iesu mi kariwa jiwae nenei ainda ambodanida doda daedo esisina, ove einda gaiae. 31 Ata ge eiwa gaietena awa, inemane gebé awate Iesu awa Keriso, God da Mai, edo itomane gebé ari ami wasiri ainda toda bawate.

*20:24 Didymus da moka awa ‘jinjiga’.